Azərbaycan Banklar Assosiasiyasının yaradılmasından 31 il ötür
Bakı, 30 mart, AZƏRTAC
Bu gün Azərbaycan banklarının ictimai birliyi olan Azərbaycan Banklar Assosiasiyasının (ABA) yaradılmasından 31 il ötür.
ABA üzv təşkilatların birgə korporativ maraqlarını təmsil edən, onları zəruri və faydalı məlumat və xidmətlərlə təmin edən, bank sektorunun inkişafına xidmət edən, təcrübə, ideya və təşəbbüslərin müzakirə edildiyi bir platforma kimi fəaliyyət göstərir.
Assosiasiyadan AZƏRTAC-a bildirilib ki, hazırda ABA-nın 26 bank və 2 bank olmayan kredit təşkilatı, eyni zamanda, “Azericard” MMC, “Millikart” MMC və Azərbaycan Kredit Bürosu olmaqla 31 üzvü var.
ABA-nın tərkibində 21 ildir fəaliyyət göstərən Azərbaycan Bank Tədris Mərkəzi, bundan əlavə Banklar və Biznes qəzeti, Banklar və Biznes jurnalı, Milli Qəhrəman Mübariz İbrahimovun adını daşıyan Biləsuvar bağça-lisey-məktəb kompleksi kimi törəmə qurumları, “Bank Ombudsmanı” və “Münsiflər Məhkəməsi” fəaliyyət göstərir.
Eyni zamanda, bank sektorunun qarşısındakı imkanlar və çağırışları müzakirə edən, ideya və təkliflər verən, bankların rəhbər nümayəndələrindən ibarət 12 Ekspert Qrupu da ABA-nın strukturuna daxildir.
Fəaliyyət göstərdiyi müddətdə ABA Azərbaycan Respublikasının Mərkəzi Bankı, digər dövlət qurumları, qanunverici, icraedici və məhkəmə orqanları, ictimai təşkilatlar və beynəlxalq qurumlarla sıx əməkdaşlıq əlaqələri yaradıb və bununla da bank qanunvericiliyinin təkmilləşdirilməsi sahəsində, eləcə də bankların beynəlxalq əlaqələrinin qurulması, bank infrastrukturunun formalaşması, ölkədə həyata keçirilən iqtisadi islahatların və digər işlərin bank sektoru tərəfindən dəstəklənməsinin təşviqində əhəmiyyətli işlər görüb.
ABA, eyni zamanda, çoxsaylı beynəlxalq əhəmiyyətli tədbirlərin təşkilatçılığı və ev sahibliyini həyata keçirir. Bunlardan hər ilin mayında Bakıda keçirilən Maliyyə və Texnologiyalar Sammiti (FINTEX SUMMIT) və noyabr ayında keçirilən Beynəlxalq Bankçılıq Forumunu qeyd etmək olar.
Qarşısında duran prioritet hədəflərə işğaldan azad edilmiş torpaqlarımızda müasir bank-maliyyə infrastrukturunun qurulmasına töhfə vermək, maliyyə savadlığının artırılması, maliyyə xidmətlərinə əlçatanlığın genişləndirilməsi və sektorda rəqəmsallaşmanın inkişafı, bütün vətəndaşlara müasir və etibarlı bank-maliyyə xidmətlərinin təqdim edilməsi, müştəri məmnunluğunun maksimum təmin olunması daxildir.
ABA üzvləri qlobal pandemiyanın gətirdiyi məhdudiyyətlərə baxmayaraq, eləcə də vətən müharibəsi zamanı cəbhə bölgəsində yerləşən yaşayış məntəqələrində fəaliyyət göstərən filial və şöbələr daxil olmaqla, əhalimizə, iqtisadi subyektlərə tam həcmdə, fasiləsiz bank-maliyyə xidmətləri göstərməyə davam edib.
Pandemiyadan təsirlənmiş sahibkarların dəstəklənməsi, onların kredit öhdəliklərinin restrukturizasiya olunması, 600 min aztəminatlı şəxsə 190 manat birdəfəlik ödəmələrin bank əməkdaşları üçün yaranan risklərə baxmayaraq tam həcmdə, bankların öz vəsaiti hesabına təqdim olunan ödəniş kartları ilə verilməsi, banklar tərəfindən Koronavirusla Mübarizəyə Dəstək Fonduna böyük miqdarda vəsaitlərin köçürülməsini qeyd etmək olar.
Torpaqlarımızın azad olunmasında iştirak edən hərbçilərimizin, onların ailə üzvlərinin, düşmən təxribatı nəticəsində zərər görmüş mülki vətəndaşların dəstəklənməsi istiqamətində ABA üzvləri bir çox işlər görüb, Silahlı Qüvvələrə Yardım Fonduna, Qarabağ Dirçəliş Fonduna böyük məbləğdə vəsaitlər ianə edib, “YAŞAT” Fondu ilə yaxından əməkdaşlığı davam edirlər. Banklar bundan sonra da bu kateqoriyadan olan şəxslərə münasibətdə həssaslıq göstərəcək.
Azərbaycan bank icması hər zaman olduğu kimi ölkə rəhbərliyinin tapşırıqlarını rəhbər tutaraq əhaliyə, iqtisadi subyektlərə bütün dövrlərdə keyfiyyətli və fasiləsiz bank-maliyyə xidməti göstərməyə, ölkədə həyata keçirilən iqtisadi islahatların və digər işlərin bundan sonra da dəstəklənməsinə davam edəcək.
Bölmənin digər xəbərləri
