Azərbaycan deyəndə göz önündə əzəmətli, əlçatmaz bir zirvə - Heydər Əliyev Zirvəsi ucalır
Bakı, 2 may (AZƏRTAC). Azərbaycan deyəndə göz önündə əzəmətli, əlçatmaz bir zirvə - Heydər Əliyev Zirvəsi ucalır. Bu Zirvə dünyanın hər yerindən görünür.
Ümummilli lider Heydər Əliyev demişdir: “Mən həmişə fəxr etmişəm və bu gün də fəxr edirəm ki, mən azərbaycanlıyam”.
Azərbaycan da fəxr edir ki, dünya şöhrətli siyasi və dövlət xadimi, müdrik şəxsiyyət Heydər Əliyev onun övladıdır. Doğma Azərbaycanın müstəqilliyinin, dövlətçiliyinin möhkəmləndirilməsi, dünyada tanınması yalnız və yalnız Ulu Öndərin adı və fəaliyyəti ilə bağlıdır.
Ümummilli lider Heydər Əliyev bənzərsiz, nadir bir şəxsiyyət idi. Ulu Öndərin ideyaları öz qayəsini doğma Vətən və doğma xalq sevgisindən almışdır. Azərbaycanın tərəqqisinə, dünyada nüfuzunun yüksəlməsinə xidmət edən bu ideyalar daimidir, əbədiyaşardır.
Müdrik rəhbərin zəngin həyat və fəaliyyəti bütün dünyada sonsuz maraq doğurur. Azərbaycan Dövlət Teleqraf Agentliyinin (AZƏRTAC-ın) baş direktoru Aslan Aslanov “Dövlət siyasətinin informasiya təminatı” kitabında yazır: “Heydər Əliyevin böyüklüyü bütün dünyada etiraf edilmişdir: onu fenomenal şəxsiyyət, nüfuzlu dövlət xadimi, nadir natiqlik istedadına malik olan şəksiz lider hesab edirlər.
...Heydər Əliyevin hakimiyyətin yüksək pilləsində bir qərinə sürən siyasi uzunömürlülüyü ərzindəki nəhəng fəaliyyətini, sadəcə, göz önünə gətirəndə onun fövqəladə şəxsiyyət olduğunu görməmək mümkün deyildir.
...Heydər Əliyev və Azərbaycan. İndi artıq zərb-məsəl kimi səslənən bu sözlərin necə dərin məna daşıdığını hamımız bilirik. Çünki Azərbaycanın ən yeni tarixinin bütöv bir dövrünün Heydər Əliyevin adı ilə bağlı olması danılmaz həqiqətdir”.
Qüdrətli şəxsiyyət Heydər Əliyev həm Qərbdə, həm də Şərqdə misilsiz şöhrət qazanmışdır. ABŞ-ın sabiq prezidenti Corc Buş “Dünyada tanınmış görkəmli dövlət xadimi Heydər Əliyevin şəksiz liderliyinə, cəsarətinə, misilsiz dünyagörüşünə və nadir natiqlik istedadına valehəm”, Rusiya Federasiyasının Prezidenti Vladimir Putin “Mübaliğəsiz demək olar ki, Heydər Əliyev siyasət nəhəngi idi” fikirləri ilə Heydər Əliyevin böyüklüyünü, dahiliyini xüsusi qeyd etmişlər. Ulu öndər Heydər Əliyev haqqında yazılmış xatirələrdə, publisistik məqalələrdə və kitablarda, bu cür qiymətli fikirlərə çox rast gəlmək olar.
Ölkəmizdə bütün sahələrin, o cümlədən kütləvi informasiya vasitələrinin inkişafına böyük önəm verən ümummilli lider Heydər Əliyevin ideyaları bu gün Azərbaycan Prezidenti İlham Əliyev tərəfindən çox uğurla, qətiyyətlə davam etdirilir. Respublikamızda azad, demokratik mətbuatın fəaliyyəti üçün bütün imkan və şərait yaradılmışdır.
Dahi rəhbər Heydər Əliyev Azərbaycan Dövlət Teleqraf Agentliyinə (AZƏRTAC) xüsusi diqqət göstərmişdir. Ulu Öndərin AZƏRTAC-la bağlı fərman və sərəncamlarının bu qurumun inkişafında müstəsna rolu olmuşdur. AZƏRTAC-ın dünya mətbuat məkanına çıxması, beynəlxalq əlaqələrinin genişlənməsi Ulu Öndərin arzusu idi. Tam əminliklə demək olar ki, bu arzu indi reallığa çevrilmişdir.
Son on ildə AZƏRTAC sürətlə inkişaf edərək dünyanın nüfuzlu xəbər agentlikləri arasında özünə layiqli yer tutmuşdur. Azərbaycan həqiqətlərini müxtəlif dillərdə dünyaya yayan AZƏRTAC üzvü və həmtəsisçisi olduğu Asiya və Sakit Okean Ölkələri İnformasiya Agentlikləri Təşkilatı (OANA), Avropa Xəbər Agentlikləri Alyansı (EANA), Beynəlxalq İslam Xəbər Agentliyi (İİNA), MDB Ölkələri Milli İnformasiya Agentlikləri Assosiasiyası (ANİA) və Qara Dəniz İqtisadi Əməkdaşlıq Təşkilatına üzv ölkələrin Milli İnformasiya Agentlikləri Assosiasiyası (PANİA), Türkdilli Xəbər Agentlikləri Birliyi (TKA), Asiya Xəbər Agentlikləri Konsorsiumu (AsiaPulse) və digər beynəlxalq və regional qurumlarla əlaqələrini də genişləndirmişdir.
OANA-nın XV Baş Assambleyasında AZƏRTAC-ın baş direktoru Aslan Aslanov qurumun vitse-prezidenti və dalbadal üçüncü dəfə Büro üzvü seçilmişdir. OANA-nın növbəti Baş Assambleyasının 2016-cı ildə Bakıda keçirilməsi, 2016-2019-cu illərdə bu quruma AZƏRTAC-ın sədrliyi barədə qərar qəbul olunmuşdur.
Xəbər Agentliklərinin V Dünya Konqresinə 2016-cı ildə Azərbaycanın ev sahibliyi etməsi ilə bağlı qərar qəbul edilmişdir. Həmin qərarda 2016-2019-cu illərdə Xəbər Agentliklərinin Dünya Konqresinə AZƏRTAC sədrlik edəcəkdir.
Ümummilli lider Heydər Əliyev ideyalarının təcəssümü olan bu nailiyyətlər həqiqətən qürurvericidir.
Ulu Öndərlə bağlı mənim də xatirələrim vardır. 1992-1996-cı illərdə Bakıda nəşr olunan “Naxçıvan” qəzetində baş müxbir vəzifəsində çalışırdım. Xoşbəxtəm ki, həmin illərdə Azərbaycan Respublikasının Prezidenti Heydər Əliyevin jurnalistlərlə görüşlərində, mətbuat konfranslarında iştirak etmişəm. Ümummilli Lideri yaxından görmək, onun qiymətli fikirlərini dinləmək mənə də qismət olmuşdur. O görüşlər mənim üçün ən mənalı, ən dəyərli xatirələrdir, həyatımın ən xoşbəxt anları olmuşdur. Görüşlərdə dahi rəhbər jurnalistlərə kütləvi informasiya vasitələrində həmişə həqiqəti əks etdirməyi tövsiyə edərdi.
...Azərbaycan Prezidenti Heydər Əliyevin siyasəti nəticəsində Qərbin iri neft şirkətləri ilə uğurlu danışıqlar aparılaraq 1994-cü il sentyabrın 20-də bütün dünyada “Əsrin müqaviləsi” adı ilə tanınmış neft kontraktı imzalandı. O vaxt həmin neft kontraktı ilə bağlı Ulu Öndərin mətbuat konfransı keçirildi. İştirak etdiyim həmin konfransda ümummilli lider Heydər Əliyev “Əsrin müqaviləsi”nin mahiyyəti barədə geniş məlumat verdi. Müdrik rəhbər neft müqaviləsinin müstəqil Azərbaycanın tərəqqisində çox əhəmiyyətli rol oynayacağını vurğuladı. Azərbaycanın bugünkü dinamik inkişafı Ulu Öndərimizin o vaxt uzaqgörənliklə söylədiyi qiymətli fikirlərin əyani təsdiqidir.
Bu gün Azərbaycanın çox sürətli inkişafının, ölkədə qazanılan nailiyyətlərin əsasını müdrik rəhbər Heydər Əliyev qoymuşdur. Azərbaycanın xoşbəxtliyi, tərəqqisi dahi rəhbər Heydər Əliyev siyasətinin bəhrəsidir.
İbrahim Əsədov
AZƏRTAC-ın əməkdaşı
Bölmənin digər xəbərləri
