AZƏRBAYCAN DÖVLƏT FİLARMONİYASI BİNASININ TƏNTƏNƏLİ AÇILIŞ MƏRASİMİ
MƏDƏNİYYƏT NAZİRİ POLAD BÜLBÜLOĞLUNUN ÇIXIŞI
Hörmətli xanımlar və cənablar!
Əziz qonaqlar!
Bu gün Azərbaycan mədəniyyətinin tarixində, Azərbaycan musiqisinin salnaməsində, bədii kollektivlərin, ayrı-ayrı sənət adamlarının və şəxsən mənim həyatımda böyük bir bayramdır, yaddaqalan bir gündür.
Amma eyni zamanda, bu böyük bayramda kədərimi gizlədə bilmirəm, məni qəhər boğur. Səmimiyyətimə inanın, bu gün bu səhnədə danışmaq mənim üçün çox çətindir. Ona görə ki, böyük öndərimiz, sevimli Prezidentimiz, ümummilli liderimiz Heydər Əliyev bu gün bizimlə bir yerdə deyildir. Amma istərdim, biləsiniz ki, Azərbaycanda Heydər Əliyevin çoxlu əsərləri var, bu gözəl Filarmoniya da Heydər Əliyevin əsəridir. Siz oturduğunuz İtaliyada istehsal olunmuş kreslolardan tutmuş, Çexiyada xüsusi layihə ilə bu bina üçün hazırlanmış çilçırağadək hər şey Heydər Əliyevin zövqü ilə edilmişdir. Bu böyük bina çox qısa müddətdə, cəmi 8 aya əsaslı təmir olunmuşdur. Mən inanıram ki, bu gün Heydər Əliyevin ruhu bizimlədir, buradadır. Qəlbən inanıram ki, Azərbaycan xalqı nə qədər varsa, onun ən xoşbəxt məqamlarında, ən böyük günlərində Heydər Əliyevin ruhu, Heydər Əliyevin siması həmişə bizimlə olacaqdır. Ona görə də hamımız bu böyük insanın əziz xatirəsini bir dəqiqəlik sükutla yad edərək, ona Allahdan rəhmət diləyirik.
Hörmətli cənab Prezident, Sizə xüsusi təşəkkürümü bildirmək istəyirəm ki, Siz Heydər Əliyevin yolunu tutaraq, onun mədəniyyətə, sənət adamlarına diqqətini davam etdirirsiniz. Bu kədərli günlərdən sonra vaxt tapıb ilk dəfə, belə böyük musiqi bayramında iştirak edirsiniz. Mən hamının - musiqiçilərin, bütün mədəniyyət işçilərinin adından Sizə dərin təşəkkürümü bildirirəm.
Əziz dostlar, hamınız bilirsiniz ki, bu gözəl bina XX əsrin əvvəlində tikilibdir və artıq 100 ilə yaxındır Azərbaycan xalqına xidmət edir. Bu gözəl memarlıq incisi həmişə Bakının yaraşığı olmuşdur. Burada, bu salonda dünyanın ən məşhur musiqiçiləri, ən görkəmli sənətkarları konsert veriblər. Bu divarlar nələr eşidib, nələr görüb, bu səhnəyə kimlər gəlib, kimlər gedibdir. Azərbaycanın milli musiqisinin korifeyləri dəfələrlə burada çıxış ediblər. Böyük Üzeyir bəy, Müslüm Maqomayev, Xan Şuşinski, Qara Qarayev, Fikrət Əmirov, maestro Niyazi, Bülbül, Rəşid Behbudov, Şövkət Ələkbərova bu səhnədə dəfələrlə çıxış ediblər.
Filarmoniya özü böyük bir təşkilatdır. Burada bizim dövlət kollektivlərimiz çalışır. Vaxtilə bunlara rəhbərlik edən çox görkəmli, böyük bəstəkarlarımız var idi. Ayrı-ayrı zamanlarda Filarmoniyanın müdiri Soltan Hacıbəyov, Rauf Hacıyev, Şəmsi Bədəlbəyli, hamımızın əzizi olan Tofiq Quliyev olmuşlar. Nəhayət, maestro Niyazi uzun illər bizim simfonik orkestrə və bu filarmoniyaya rəhbərlik etmişdir. Mən inanıram ki, indi yaranan bu gözəl şəraitdə dövlət kollektivlərimiz yeni-yeni nailiyyətlər qazanacaq, Azərbaycan musiqisini daha da böyük zirvələrə çatdıracaqlar.
Təbii ki, mən bu gün mədəniyyət işçiləri adından bu binanın bərpasında çalışmış insanlara, fəhlələrdən tutmuş bütün inşaatçılara dərin təşəkkürümü bildirirəm ki, onlar üç növbədə işləyərək qısa müddətdə işləri başa çatdırıblar. Sizə deməliyəm ki, Azərbaycan xalqı hərtərəfli istedadlı xalqdır. Fəhlələrimiz, bərpaçılarımız, memarlarımız, rəssamlarımız bu binanı əvvəlkindən də yaxşı gözəlləşdiriblər. Xüsusi bildirirəm ki, bu filarmoniya məhz Heydər Əliyevin göstərişi ilə ən müasir avadanlıqla təchiz olunmuşdur. Bu divarlar 8 bal gücündə zəlzələyə davamlıdır. Burada işləyən insanlarımız xarici mütəxəssislərlə birgə çalışaraq göstərdilər ki, bu gün Azərbaycan şirkətləri, mühəndisləri heç kəsdən geri qalmır və lazım olanda çox qısa bir müddətdə yüksək səviyyədə işləyə bilirlər. Bu fürsətdən istifadə edərək, burada əməyi olanların hamısına bir daha dərin təşəkkürümü bildirirəm. Diqqətinizə görə çox sağ olun.
X X X
Bakı Musiqi Akademiyasının rektoru professor Fərhad Bədəlbəyliyə söz verildi.
Bölmənin digər xəbərləri
