Azərbaycan FAO-Türkiyə Əməkdaşlıq Proqramı çərçivəsində həyata keçirilən layihələrə qoşulur
Bakı, 1 aprel, AZƏRTAC
Azərbaycanın FAO-Türkiyə Tərəfdaşlıq Proqramında iştirakı FAO-nun ölkədə kənd təsərrüfatının məhsuldarlığının artırılmasına, heyvan xəstəliklərinə və zərərvericilərə qarşı birgə mübarizə ilə bağlı mövcud fəaliyyətlərinə əlavə dəstək verəcək.
Azərbaycanın BMT-nin Ərzaq və Kənd Təsərrüfatı Təşkilatı (FAO) FAO-Türkiyə Tərəfdaşlıq Proqramı (FTPP II) çərçivəsində dörd layihəni təsdiqləməsi ilə iki ölkə arasındakı əməkdaşlıq daha da gücləndirilib. FAO-nun Azərbaycandakı nümayəndəliyindən AZƏRTAC-a bildirilib ki, bu əməkdaşlıq FAO, Türkiyə və Azərbaycanı ərzaq təhlükəsizliyinin təmin edilməsi, kənd yerlərinin inkişafının təşviq edilməsi və təbii ehtiyatların dayanıqlı şəkildə idarə edilməsi məqsədlərinə daha da yaxınlaşdıracaq.
Türkiyə hökuməti tərəfindən maliyyələşdirilən layihələr, Mərkəzi Asiya, Azərbaycan və Türkiyədə ərzaq itkisi və israfının azaldılmasına, dayanıqlı balıqçılıq və balıq məhsullarının yetişdirilməsinin təmin edilməsinə, buğda xəstəliklərinə qarşı mübarizəyə və milli qida təhlükəsizlik sistemlərinin yaxşılaşdırılması da daxil olmaqla müxtəlif sahələrdə potensialın inkişaf etdirilməsinə dəstək göstərəcək.
Bu layihələrdən birincisi olan balıqçılıq üzrə olan layihə (FISHCap), qida təhlükəsizliyinə dəstək olaraq şirin su ehtiyatlarının, balıqçılıq və dəniz məhsullarının, təbii ehtiyatların dayanıqlı inkişaf yolu ilə istifadəsi üçün milli potensialın artırılmasını hədəfləyir. Digər bir layihə "CAC-Rust", buğda xəstəlikləri sahəsində milli potensialı və regional əməkdaşlığı gücləndirərək buğda istehsalı zamanı xəstəliklərə qarşı mübarizəni, məhsuldarlığın, həmçinin də dayanıqlılığın artırılmasını hədəfləyir. Ərzaq itkisi və israfının qarşısının alınması istiqaməti üzrə həyata keçirilən digər bir layihə isə region ölkələrində milli qurumların potensialının inkişaf etdirilməsinə və ərzaq itkisi və israfının azaldılmasına dair milli və regional strategiyaların hazırlanmasına dəstək verəcək. Qida təhlükəsizliyi üzrə dördüncü layihə isə qida təhlükəsizliyi sistemlərini həm milli, həm də regional miqyasda yaxşılaşdırmağı hədəfləyir. Bu layihə, region ölkələrində qida təhlükəsizliyi nəzarətinə və risk kommunikasiyaların gücləndirilməsinə töhfə verəcək. Həmçinin, dövlət və özəl sektor üçün prioritet olan qida təhlükəsizliyi risklərini həll etmək üçün əlverişli bir mühitlə təmin edəcək.
Azərbaycanın FAO-Türkiyə Tərəfdaşlıq Proqramında iştirakı FAO-nun ölkədəki kənd təsərrüfatının məhsuldarlığının artırılmasına, heyvan xəstəliklərinə və zərərvericilərə qarşı birgə mübarizəsinə töhfə verəcək. FAO-nun Azərbaycandakı nümayəndəsi Mələk Çakmak, “Azərbaycanın FAO-Azərbaycan Tərəfdaşlıq Proqramı çərçivəsində davam edən layihələri və fəaliyyətləri tamamlayan FAO-Türkiyə Tərəfdaşlıq Proqramına qoşulması bizi olduqca məmnun edir",- deyə bildirib. FAO-Azərbaycan Tərəfdaşlıq Proqramı 2015-ci ildə öz işinə başlayıb və Azərbaycan ilə BMT-nin Ərzaq və Kənd Təsərrüfatı Təşkilatı (FAO) arasındakı əməkdaşlığın yeni mərhələsi hesab olunur.
Bölmənin digər xəbərləri
