AZƏRBAYCAN GİMNASTLARI OLİMPİADAYA HAZIRLAŞIRLAR
Azərbaycan gimnastları Aliyə Qarayeva, Dinara Gimatova, Anna Qurbanova və Zeynəb Cavadlı Olimpiya Oyunlarına hazırlıq məqsədi ilə Xorvatiyanın Dubrovnik şəhərində təlim-məşq toplanışlarında iştirak edirlər. Xatırladaq ki, Qarayeva və Gimatova Pekin Olimpiadasına vəsiqə qazanmışlar, Qurbanova və Cavadlı isə ehtiyat gimnastlar kimi nəzərdə tutulmuşlar.
Azərbaycan Gimnastika Federasiyasının mətbuat xidmətindən AZƏRTAC-ın müxbirinə bildirmişlər ki, təlim-məşq toplanışlarında əsasən Olimpiya proqramlarının cilalanmasına diqqət yetiriləcəkdir. Anna Qurbanova isə yeniyetmə gimnast Səidə Abdullayeva ilə birlikdə iyunun 20-22-də İtaliyanın Prato şəhərində keçiriləcək “Trofeo Kariprato” ənənəvi beynəlxalq turnirində iştirak etmək üçün kiçik taym-aut götürəcəkdir.
Son dörd ilin əsas oyunları ərəfəsində keçirilən təlim-məşq toplanışlarında Azərbaycanın qrup hərəkətləri komandası da iştirak edəcəkdir. Vəfa Hüseynova, Anna Bitiyeva, Valeriya Yeqay, Alina Tryopina və Anastasiya Prasolovadan ibarət qrup komandası, habelə iki ehtiyat gimnast - Dina Qorina və Leyla Şamilova iyunun axırınadək Bolqarıstanda məşq edəcəklər.
Bahar Əsgərova (1997-ci il təvəllüdlü), Aynur Mustafayeva (1998), Naidə Əhmədli (1999) və Ləman Göyüşovadan (2000) ibarət gənc gimnastlar kvarteti də Bolqarıstana yola düşəcəkdir. Onlar iyunun 21-22-də Tırqovişte şəhərində keçiriləcək Aleqro Cup turnirində iştitrak edəcəklər.
Bölmənin digər xəbərləri
