AZƏRBAYCAN GÜLƏŞÇİLƏRİ BEYNƏLXALQ TURNİRDƏ 12 MEDAL QAZANMIŞLAR
Bakı, 2 iyun (AZƏRTAC). Türkiyənin İzmir şəhərində yeniyetmələr arasında yunan-Roma güləşi və sərbəst güləş üzrə beynəlxalq turnir başa çatmışdır.
Yarışların sonuncu günü idmançılarımız daha 4 medal qazanmışlar. Bütün görüşlərini qələbə ilə başa vuran güləşçi Eldəniz Əzizli (50 kq) finalda Türkiyə idmançısı İbrahim Çelikeli məğlubiyyətə uğradaraq qızıl medala layiq görülmüşdür. Yunan-Roma üslubunda güləşən digər idmançımız Süleyman Babayev (82 kq) bürünc mükafata sahib olmuşdur.
Sərbəst güləşçilər Ruslan Şükürov (63 kq) və Elşən Yusifzadə (85 kq) gümüş medal qazanmışlar. R.Şükürov həlledici görüşdə türkiyəli Mustafa Qayaya, E.Yusifzadə isə rusiyalı Albert Tsiponova məğlub olmuşdur.
Pəhləvanlarımız bu turnirdə 3 qızıl, 3 gümüş və 6 bürünc medal qazanmışlar.
Komanda hesabında Azərbaycan yığması yunan-Roma güləşi üzrə 63 xalla 2-ci yeri, sərbəst güləş üzrə isə 67 xalla 3-cü yeri tutmuşdur.
Bölmənin digər xəbərləri
