AZƏRBAYCAN İDMANÇILARI PEKİN YAY OLİMPİYA OYUNLARINA LİSENZİYA XARAKTERLİ TURNİRDƏ QÜVVƏLƏRİNİ SINAYACAQLAR
Azərbaycan Milli Avarçəkmə Federasiyasının mətbuat xidmətindən AZƏRTAC-a bildirmişlər ki, iyunun 12-də ölkəmizin akademik avarçəkmə üzrə milli komandası Polşanın Poznan şəhərinə yola düşmüşdür.
Baş məşqçi Samir Məmmədovun rəhbərliyi ilə idmançılarımız ilk dəfə 2008-ci il Pekin Yay Olimpiya Oyunlarına lisenziya xarakterli turnirdə və Dünya Kubokunun III mərhələ yarışında qüvvələrini sınayacaqlar.
İyunun 15-dən 18-dək davam edəcək lisenziya xarakterli turnirdə Fikrət Məmmədov və Kamal Məmmədov dueti çıxış edəcəkdir. Onlar 2 nəfərlik qoşa avarlı qayıqda mübarizə aparacaqlar.
Pekin Olimpiadasına lisenziyanı hər kateqoriyada ilk “üçlüy”ə daxil olan idmançılar qazanacaqlar.
İyunun 20-də start götürəcək Dünya Kubokunun III mərhələ yarışında isə daha iki avarçəkənimiz - Cavid Əfəndiyev və Xəyal Zülfüqarov qüvvələrini sınayacaqlar. Onlar bir, iki və dörd nəfərlik qayıqlarda çıxış edəcəklər.
Yarışa iyunun 22-də yekun vurulacaqdır.
Bölmənin digər xəbərləri
