Azərbaycan ilə Mozambik arasında parlamentlərarası əlaqələrin inkişaf etdirilməsi məsələsi müzakirə olunub
Bakı, 15 may, AZƏRTAC
Azərbaycan Respublikasının iqamətgahı Cənubi Afrika Respublikasının Pretoriya şəhəri olmaqla, eyni zamanda Mozambikdəki səfiri Elxan Poluxov bu ölkəyə səfəri çərçivəsində parlamentin sədri xanım Veronika Makamo ilə görüşüb.
Səfirlikdən AZƏRTAC-a bildirilib ki, görüşdə E.Poluxov Azərbaycan Milli Məclisinin fəaliyyəti və strukturu haqqında məlumat verərək parlamentlərarası əlaqələrin genişləndirilməsinin vacibliyini qeyd edib. O, müasir beynəlxalq aləmdə parlament diplomatiyasının xüsusi rol oynadığını və bu səpkidə hər iki ölkənin qanunvericilik orqanları arasında əlaqələrin möhkəmləndirilməsinin önəmini xüsusi vurğulayıb. Səfir Azərbaycanın 2012-2013-cü illərdə BMT Təhlükəsizlik Şurasının qeyri-daimi üzvü olduğu müddətdə Afrika qitəsini narahat edən bir çox məsələlərdə, o cümlədən münaqişələr, insan hüquqları, beynəlxalq aləmdə mövcud olan ikili standartlara qarşı mübarizə və digər sahələrdə dəstək nümayiş etdirdiyini diqqətə çatdırıb.
E.Poluxov ölkəmizin son illər bir sıra beynəlxalq tədbirlərin mərkəzinə çevrildiyini, 2017-ci ildə IV İslam Həmrəyliyi Oyunlarına ev sahibliyi edəcəyini və Mozambikin İslam Əməkdaşlıq Təşkilatına üzv olduğunu nəzərə alaraq onun bu oyunlarda fəal iştirak edəcəyinə ümidvar olduğunu söyləyib.
V. Makamo Azərbaycanın beynəlxalq aləmdə baş verən proseslərdə fəal rol oynadığını yüksək qiymətləndirərək, hər iki ölkənin qanunvericilik orqanları arasında beynəlxalq təşkilatlar çərçivəsində əməkdaşlığın önəmini vurğulayıb və bu əməkdaşlığın inkişaf etdirilməsinin zəruri olduğunu deyib.
Səfir Mozambik parlamentinin sədrinə Ermənistan-Azərbaycan, Dağlıq Qarabağ münaqişəsi barədə də ətraflı məlumat verib. O, beynəlxalq ictimaiyyətin suveren ölkələrin ərazi bütövlüyü prinsipinin qorunmasında bir mövqedən çıxış etməsinin zəruriliyini vurğulayıb.
Tərəflər ölkələr arasında əlaqələrin genişləndirilməsi üçün qarşılıqlı səfərlərin təşkilinə dair razılıq əldə ediblər.
E.Poluxov, həmçinin Mozambikin dövlət televiziya kanalına müsahibə verib.
Bölmənin digər xəbərləri
