Azərbaycan ilə Tacikistan arasında məhkəmə-hüquq sahəsində əlaqələr inkişaf edir
Bakı, 22 avqust, AZƏRTAC
Avqustun 22-də Azərbaycan Respublikasının Konstitusiya Məhkəməsində ölkəmizdə səfərdə olan Tacikistan Respublikasının Prezident Aparatı, Ədliyyə Nazirliyi, Konstitusiya Məhkəməsi, Ali Məhkəməsi, Yuxarı İqtisadiyyat Məhkəməsi və Dünya Bankının məsul əməkdaşlarından ibarət olan nümayəndə heyəti ilə görüş təşkil edilib.
Konstitusiya Məhkəməsinin mətbuat xidmətindən AZƏRTAC-a bildiriblər ki, görüşdə Ulu Öndər Heydər Əliyevin təşəbbüsü və müəllifliyi ilə 1995-ci ildə müstəqil Azərbaycan Respublikasının ilk Konstitusiyası qəbul ediləndən sonra, 1998-ci ildə Konstitusiya Məhkəməsinin formalaşdırılması və fəaliyyəti haqqında məlumat verilib.
Bildirilib ki, Azərbaycan ilə Tacikistan arasında əlaqələr bütün sahələrdə daim uğurla inkişaf edir. Həmin əlaqələrin inkişafı, həmçinin məhkəmə-hüquq sahəsində də müşahidə edilir.
Qeyd edilib ki, Azərbaycan və Tacikistan Konstitusiya məhkəmələri arasında həm ikitərəfli formatda, eləcə də Konstitusiya Ədalət Mühakiməsi üzrə Dünya Konfransı, Asiya Konstitusiya Məhkəmələri və Ekvivalent İnstitutlar Assosiasiyası, həm də Avrasiya Konstitusiya Nəzarəti Orqanları Assosiasiyası çərçivəsində məhkəmə-hüquq əməkdaşlığını həyata keçirirlər.
Qonaqlar Konstitusiya Məhkəməsinin kollektivinə minnətdarlığını bildirərək, Tacikistan Respublikasında həyata keçirilən məhkəmə-hüquq islahatlarına toxunaraq, Azərbaycan Respublikası ilə məhkəmə-hüquq əməkdaşlığını yüksək qiymətləndiriblər.
Söhbət zamanı ətraflı fikir mübadiləsi aparılıb, hüquqi məsələlər müzakirə olunub.
Sonda qonaqlar Konstitusiya Məhkəməsinin binası ilə tanış olublar.
Bölmənin digər xəbərləri
