Azərbaycan məktəbliləri V Beynəlxalq Meqapolislər Olimpiadasında 7 medal qazanıblar
Bakı, 23 dekabr, AZƏRTAC
Moskvada virtual formada V Beynəlxalq Meqapolislər Olimpiadası keçirilib.
Təhsil Nazirliyindən AZƏRTAC-a bildirilib ki, dünyanın 31 meqapolisinin iştirak etdiyi və fizika, kimya, riyaziyyat, informatika fənləri üzrə təşkil edilən beynəlxalq olimpiadada məktəblilərimiz uğurla çıxış edərək ümumilikdə 7 medal qazanıblar.
Riyaziyyat fənni üzrə Təhsil Nazirliyinin tabeliyindəki Fizika, riyaziyyat və informatika təmayüllü respublika liseyinin X sinif şagirdləri Amin Cəfərzadə və Toğrul Abbasov gümüş medal əldə ediblər. Fizika fənni üzrə Sumqayıt şəhəri Təbiət elmləri təmayüllü gimnaziyanın XI sinif şagirdləri Sirac Yəhyazadə və Murad Bəşirov, kimya fənni üzrə BDU-nun nəzdində “Gənc İstedadlar” liseyinin X sinif şagirdi Nəriman Şirinli və Türkiyə Dəyanət Vəqfi Bakı türk liseyinin XI sinif şagirdi Xanım Yaqublu, informatika fənni üzrə Bakı şəhəri 269 nömrəli tam orta məktəbin XI sinif şagirdi Amin Cəlilov bürünc medala layiq görülüblər.
Qeyd edək ki, informatika fənni üzrə beynəlxalq olimpiadalara hazırlıq dərsləri “Azercell Telekom” şirkətinin dəstəyi ilə həyata keçirilir.
Bölmənin digər xəbərləri
