“Azərbaycan Milli Ordusu: dünən, bu gün, sabah”- MEK-də tədbir
Bakı, 25 iyun, AZƏRTAC
AMEA-nın Mərkəzi Elmi Kitabxanasında 26 İyun - Silahlı Qüvvələr Günü münasibətilə “Azərbaycan Milli Ordusu: dünən, bu gün, sabah” mövzusunda tədbir keçirilib. MEK, “Şərq” qəzeti və Azərbaycan Türk Ocaqlarının birgə təşkilatçılığı ilə keçirilən tədbirdə şəhidlərin xatirəsi bir dəqiqəlik sükutla yad edilib.
Bu barədə AZƏRTAC-a MEK-dən məlumat verilib. Tədbirdə çıxış edən MEK-in baş direktoru professor Məmməd Əliyev bildirib ki, Ümummilli Lider Heydər Əliyev tərəfindən əsası qoyulan müasir ordumuz Müzəffər Ali Baş Komandan İlham Əliyevin rəhbərliyi ilə daha da güclənərək 44 günlük müharibədə bütün dünyaya öz gücünü nümayiş etdirməyi bacardı. MEK hər zaman Azərbaycanın bütövlüyü uğrunda savaşmış insanların xatirəsini yaşatmağa diqqət edir. MEK-in Qarabağ müharibəsi qəhrəmanları fondu yarandığı gündən etibarən bu istiqamətdə çoxlu sayda nəşrlər, tədqiqatlar, dissertasiyalar toplayıb oxucularının istifadəsinə verir.
“Şərq” qəzetinin baş redaktoru Akif Aşırlı 1918-ci ildə ölkəmizdə fəaliyyət göstərən Azərbaycan Türk Ocağının tarixinə və fəaliyyətinə qısa nəzər salıb. Qeyd edib ki, 26 İyunun Silahlı Qüvvələr Günü kimi qeyd olunmasında Azərbaycan Türk Ocağının çox məxsusi yeri və rolu var. Milli kadrların hazırlanmasında, ideoloji əsaslarla işlərin aparılmasında bu cəmiyyətin çox böyük xidmətləri olub. Çox təəssüf ki, həmin dövrdə bu Ocaq da Azərbaycan Xalq Cümhuriyyətinin ömrü qədər fəaliyyət göstərə bilib. Türk Ocağının Azərbaycanda 101 il sonra bərpası böyük nailiyyətdir.
“Hazırda bu günü böyük şərəflə qeyd edirik. Müzəffər Ali Baş Komandan İlham Əliyevin siyasi iradəsi, güclü ordumuzun sayəsində torpaqlarımız işğaldan azad olundu, Azərbaycanın öz bütövlüyünə qovuşdu. Bu 44 günlük savaşda da biz Türkiyənin dəstəyini görən zaman o illəri xatırlayırıq ”,- deyə Akif Aşırlı qeyd edib.
Birinci Qarabağ müharibəsinin xronologiyasına nəzər salan Milli Məclisin deputatı Arzu Nağıyev 1990-cı illərin əvvəllərində bu sahədə yaranan boşluqlardan danışıb, ordumuzun formalaşmasında Ulu Öndər Heydər Əliyevin misilsiz xidmətlərini qeyd edib.
Tarixçi-alim, dosent Firdovsiyyə Əhmədova Azərbaycan Ordusunun AXC dövründən, yaradılma mərhələlərindən bəhs edib. Alim bu qəbildən olan tədbirlərin kitabxanada keçirilməsinin əhəmiyyətini xüsusi qeyd edərək Milli Ordunun 105 illiyinə həsr olunmuş tədbiri yüksək səviyyədə təşkil etdiyinə görə MEK rəhbərliyinə dərin minnətdarlığını bildirib.
Mətbuat Şurasının sədri Rəşad Məcid öz növbəsində kitabxananın təbliğat vasitəsi kimi əhəmiyyətini vurğulayıb və bu tarixin gənc nəslə, geniş ictimaiyyətə çatdırılmasında tədqiqatçıların rolundan danışıb.
Azərbaycan-Türkiyə İş Adamları Birliyi İdarə Heyətinin sədri Camal Yangın, II Qarabağ müharibəsi qazisi Rəşad Əmənov, şəhid Sübhan Əbdürrəhmanlının anası Mehriban xanım, tarix elmləri doktoru Faiq Ələkbərli, AMEA Tarix İnstitutunun şöbə müdiri tarix üzrə fəlsəfə doktoru Kamran İsmayılov mövzu ətrafında öz fikirlərini bölüşüblər.
Bölmənin digər xəbərləri
