Azərbaycan Ordusu düşmən üzərində qələbəni təmin etməyə hazırdır
Bakı, 5 aprel, AZƏRTAC
Ulu öndər Heydər Əliyevin əsasını qoyduğu yeni və güclü inkişaf strategiyası Prezident İlham Əliyevin əzmkarlığı, qətiyyəti, yüksək siyasi və liderlik keyfiyyətləri sayəsində uğurla davam etdirilir. Silahlı Qüvvələrimizin sürətli inkişafı və dünyanın ən güclü orduları sırasında yer alması məhz bu uğurların daha bir bariz göstəricisidir.
Bunu ehtiyatda olan zabit Yunis Eldaroğu AZƏRTAC-a açıqlamasında deyib.
Zabit bildirib ki, Azərbaycan Respublikası Silahlı Qüvvələrinin müasir tələblərə uyğun inkişafına yol açan, keyfiyyət baxımından Ordumuza yeni sima bəxş edən əsaslı tədbirlər həyata keçirilir. Qısa zamanda dinamik və kompleks inkişafa nail olan Azərbaycan, regionun lider dövlətinə, beynəlxalq birlikdə söz sahibinə çevrilməsi bütün dünyada etiraf edilir. Şübhəsiz ki, bu uğurun əsası vaxtilə ulu öndər Heydər Əliyev tərəfindən müəyyənləşdirilib.
Yunis Eldaroğu vurğulayıb ki, Azərbaycan Prezidenti, Silahlı Qüvvələrin Ali Baş Komandanı İlham Əliyev Müdafiə Nazirliyinin Xüsusi Təyinatlı Qüvvələrinin N saylı hərbi hissəsində şəxsi heyətlə görüşdə bu gün ordu quruculuğu baxımından Azərbaycanın dünyanın güclü ölkələrindən olduğunu bildirdi. Dövlətimizin başçısı dedi ki, sonuncu reytinqə əsasən, Azərbaycan Ordusu dünya miqyasında öz potensialına görə 52-ci yerdədir. Ötən il keçirilmiş iki hərbi parad bizim hərbi qüdrətimizi göstərdi. Ordumuz üçün ən müasir silahlar, texnikalar alınır, Ordumuzun döyüş qabiliyyəti artır. Aprel döyüşləri bunun bariz nümunəsidir. Prezident yüksək inam hissi ilə açıqladı ki, Ordumuz üçün nə lazımdırsa, biz onu edirik və edəcəyik. Ötən il uğurlu Naxçıvan əməliyyatı keçirilib. Bu əməliyyat nəticəsində biz strateji yüksəkliklərə sahib olmuşuq. Bu yüksəkliklər imkan verir ki, biz çox böyük əraziyə nəzarət edək. Uğurlu Naxçıvan əməliyyatı bir daha göstərdi ki, Ordumuz peşəkardır və döyüş qabiliyyəti yüksəkdir.
Həqiqətən Ali Baş Komandanımız tərəfindən səsləndirilən bu nikbin fikirlər bizi çox qürurlandırır. Söz yox ki, xain qonşularımızla müharibə şəraitində yaşayan dövlətimizi lazımi səviyyədə idarə etmək, onu geosiyasi təlatümlərdən, iqtisadi böhranlardan qoruyaraq dünyada söz sahibi olan ölkəyə çevirmək üçün böyük səriştə və güclü siyasi iradəyə malik sərkərdənin rəhbərliyi ilə biz daha yüksək zəfərlərə nail olacağıq. Əminəm ki, erməni işğalçıları üzərində tezliklə qəti qələbə çalacağıq. Şübhə yoxdur ki, ordumuz yalnız öz qüdrətinə arxalanır. Düşmən üzərində üstünlüyümüzün obyektiv əsasları mövcuddur. Əvvəla, bizim ordumuz çox ağır və keşməkeşli səngər həyatında zəngin təcrübə qazanıb. İkincisi, dövlətimizin iqtisadi potensialı yüksələn xətlə davam edir və başlıca səylər Silahlı Qüvvələrimizin məğlubedilməzliyinin təminatına yönəldilib. Bu, danılmaz gerçəklikdir.
“Həmin görüşdə müdafiə naziri, general-polkovnik Zakir Həsənov hərbi quruculuğuna göstərdiyi diqqətə görə Ali Baş Komandana şəxsi heyət adından minnətdarlığını bildirdi. O, yüksək məmnunluq hissi ilə qeyd etdi ki, Ali Baş Komandanımız tərəfindən həyata keçirilmiş islahatlar ordumuzun döyüş qabiliyyətinin artırılmasına, nizam-intizamın gücləndirilməsinə və şəxsi heyətin sosial bazasının yüksək səviyyədə təşkil olunmasına istiqamətləndirilib. Bu gün Azərbaycan Ordusunun bütün uğurları yalnız bu islahatlar nəticəsində mümkün olub. Müdafiə naziri qəti şəkildə bəyan etdi ki, bu gün şəxsi heyət Prezidentimizin diqqət və qayğısını gündəlik həyatında hiss edir və onun etimadını doğrultmaq üçün hər an hər bir əmrini yerinə yetirməyə hazırdır və qadirdir.
Təbii ki, müdafiə nazirinin bu əsaslı və çox ümidverici fikirləri bizim ürəyimizdən xəbər verir. Yüksək döyüş qabiliyyəti, mənəvi-psixoloji hazırlığı və vətənpərvərliyi ilə seçilən Azərbaycan Ordusu tezliklə döyüş meydanında qəti və son sözünü deyəcək. Ümidvaram, irəliyə doğru gedən zəfər yürüşümüzün qarşısında erməni millətçiləri şanlı Aprel döyüşlərində olduğu kimi, bu dəfə də duruş gətirə bilməyəcəklər”, - deyə Yunis Eldaroğu bildirib.
Bölmənin digər xəbərləri
