AZƏRBAYCAN PREZİDENTİ İLHAM ƏLİYEV RUSİYAYA RƏSMİ SƏFƏRƏ YOLA DÜŞMÜŞDÜR
Dövlətimizin başçısı İlham Əliyev yola düşməzdən əvvəl Binə beynəlxalq hava limanında jurnalistlərə müsahibə vermişdir.
SUAL: Cənab Prezident, səfəriniz zamanı əsas müzakirələrdən biri Qarabağ məsələsi olsa da, indiki məqamda hansısa bir irəliləyişi gözləmək doğru deyil. Bunu Yuri Merzlyakov demişdir. Siz necə hesab edirsiniz? CAVAB: Biz buna çalışırıq, istəyirik ki, problem həll olunsun. Minsk qrupu həmsədrlərinin də vəzifəsi bundan ibarətdir. Amma bunu danışıqlar göstərəcəkdir. Hələlik bir şey deyə bilmərəm. Yəqin ki, qayıdandan sonra bu barədə məndə daha da geniş məlumat olacaqdır.
SUAL: Cənab Prezident, Trubnikov təklif edir ki, danışıqların formatı dəyişdirilməlidir. Yəni bu danışıqlarda qondarma “Dağlıq Qarabağ Respublikası”nın rəhbərliyi də iştirak etməlidir. Buna Sizin münasibətiniz necədir?
CAVAB: O, kimə təklif edib?! Bizə belə bir təklif daxil olmayıbdır.
JURNALİST: Müsahibəsində deyib ki, biz bu təklifi vermək istəyirik.
İLHAM ƏLİYEV: Mən bu müsahibə ilə tanış deyiləm. Amma biz buna razı ola bilmərik. Danışıqların formatı müəyyən edilibdir. Bu münaqişə Ermənistan-Azərbaycan, Dağlıq Qarabağ münaqişəsidir. Ona görə bunu iki tərəf - Ermənistan və Azərbaycan həll etməlidir. Hesab edirəm ki, üçüncü tərəfin iştirakı düzgün deyildir.
SUAL: Cənab Prezident, əgər Sizin səfər proqramınız imkan versə, Moskvadakı Azərbaycan məktəbinə baş çəkməyi və ümumiyyətlə, azərbaycanlılarla görüşməyi nəzərdə tutursunuzmu? Onlar səfərə çox maraq göstərirlər.
CAVAB: Əlbəttə, diasporun nümayəndələri ilə görüş olacaqdır. Məktəbə də baş çəkmək istəyərdim. Çünki o məktəblə mənim keçmişdə əlaqələrim olubdur. Mənim üçün maraqlı olardı ki, bilim, bu məktəb hansı səviyyədə fəaliyyət göstərir. Amma əlbəttə ki, bu, səfər proqramının qrafikindən asılı olacaqdır. Çalışacağam ki, buna vaxt tapım.
SUAL: Cənab Prezident, Ermənistanın xarici ölkələrdə təxminən 80 səfirliyi vardır. Amma Azərbaycan səfirliklərinin sayı azdır. Əgər biz Qarabağla bağlı diplomatik müharibə aparırıqsa, onda səfirliklərin sayının artırılması planlaşdırılırmı?
CAVAB: Planlaşdırıram. Artıq bu məsələ ilə əlaqədar mən xarici işlər naziri Vilayət Quliyevə tapşırıq vermişəm. Bizim səfirliklərin sayı çox böyük həcmdə artırılmalıdır. Hazırda 20-dən yuxarı səfirliyimiz var. Hesab edirəm ki, yaxın zamanlarda bunun sayını ən azı 2 dəfə artırmalıyıq. Əlbəttə, bunu etmək üçün maliyyə imkanları da olmalıdır. Artıq Nazirlər Kabinetinə də tapşırıq vermişəm. Rasizadənin rəhbərliyi ilə bu məsələyə baxılıb, təkliflər hazırlanıbdır. Biz bunu tezliklə etməliyik. Mən sizinlə tam razıyam ki, bəzi ölkələrdə bizim səfirliyimizin olmaması, həm Qarabağ məsələsi haqqında, həm də ümumiyyətlə, Azərbaycan haqqında yanlış təsəvvürlər yaradır. Ona görə də bu məsələ ilə bağlı tapşırıqlar verilibdir.
Sağ olun.
X X X
Azərbaycan Prezidenti İlham Əliyevi Binə hava limanında Milli Məclisin sədri Murtuz Ələsgərov, Baş nazir Artur Rasizadə, Prezidentin İcra Aparatının rəhbəri Ramiz Mehdiyev və digər rəsmi şəxslər yola salmışlar.
Bölmənin digər xəbərləri
