AZƏRBAYCAN PREZİDENTİ İLHAM ƏLİYEV TÜRKİYƏNİN ÖLKƏMİZDƏ YENİ TƏYİN OLUNMUŞ SƏFİRİNİN ETİMADNAMƏSİNİ QƏBUL ETMİŞDİR
 |
Səfir Prezident sarayında fəxri qarovul dəstəsinin qarşısından keçdi.
Hüseyn Avni Qarslıoğlu etimadnaməsini, ölkəmizdə diplomatik fəaliyyətə başlaması barədə məktubu Prezident İlham Əliyevə təqdim etdi.
Sonra Prezident İLHAM ƏLİYEV səfir Hüseyn Avni Qarslıoğlu ilə söhbət edərək dedi:
-Mən sizi ürəkdən salamlayıram. Azərbaycana, doğma Vətəninizə xoş gəlmisiniz. Mən əminəm ki, sizin çalışdığınız dövrdə ölkələrimizin əlaqələri daha da möhkəmlənəcəkdir. Bu gün Türkiyə və Azərbaycan - dost, qardaş ölkələr əl-ələ verib, həm ikitərəfli münasibətlərin inkişafında böyük səy göstərirlər, eyni zamanda, bölgədə gedən proseslərə çox güclü şəkildə təsir edirlər. Bizi birləşdirən layihələr uğurla icra edilir. Tarixi əlaqələrimizi, etnik mənsubiyyətimizi nəzərə alaraq, mən həmişə deyirəm, həm tarixi baxımdan, həm mədəni baxımdan, eyni zamanda, siyasi əlaqələr baxımından dünyada ikinci belə ölkələr yoxdur ki, bir-birinə bu qədər bağlı olsun. Çalışmalıyıq ki, bundan sonra da ikitərəfli münasibətlərimizin inkişafı üçün əlimizdən gələni əsirgəməyək.
Bizi hələ gələcəkdə böyük layihələr gözləyir. Bakı-Tbilisi-Ceyhan və Bakı-Tbilisi-Ərzurum neft-qaz kəmərlərinin tikintisi bizim böyük qələbəmizdir. Növbəti layihə Bakı-Tbilisi-Qars layihəsidir. Biz onu da uğurla icra edəcəyik, hərtərəfli münasibətlərimizin inkişafına nail olacağıq və bunları möhkəmləndirəcəyik. Sizə də Azərbaycandakı fəaliyyətinizdə uğurlar arzulayıram. Əminəm ki, burada özünüzü doğma evinizdəki kimi hiss edəcəksiniz. Siz əvvəllər Azərbaycanda dəfələrlə olmusunuz və indi burada yaşayacaqsınız. Əminəm ki, burada keçirilən günlər sizin üçün əziz olacaq, yadda qalacaqdır.
Səfir Hüseyn AVNİ QARSLIOĞLU dövlətimizin başçısına minnətdarlıq edərək dedi:
-Hörmətli Prezident, gözəl, xoş sözlərinizə görə təşəkkür edirəm. Çox sağ olun. Doğrudan da, mən bir Vətənimdən o biri Vətənimə gəlmişəm. Bunu səmimi olaraq söyləyirəm. Çünki mənim atam Qarsdan Yozqata köçmüşdür. Amma babalarımız buradan getmişdir. Dolayısı ilə öz torpağımıza gəlmişəm. Sizin də buyurduğunuz kimi, dünyada bizim iki ölkənin qardaşlıq əlaqələrinin nümunəsi yoxdur. Bunun daha da inkişaf etməsi zəruridir. Bu çərçivədə Sizin dəstəyiniz, yardımınız, Allahın izni ilə əlimdən gələn köməyi edəcəyəm.
Mən buraya gəlməmişdən əvvəl bütün dövlət nümayəndələri, nazirlərlə görüşdüm. Hörmətli Cümhurbaşqanımızın və Baş nazirimizin salamlarını Sizə yetirirəm. Onlar mənə dedilər ki, əməkdaşlıq sahəsində görüləcək nə iş varsa, yerinə yetirəcəksən. Xüsusilə BTC və BTƏ-dən sonra Qars-Tbilisi-Bakı layihəsi uğurla icra ediləcəkdir.
Prezident İlham Əliyev özünün də salamlarını Türkiyə Prezidenti Əhməd Necdət Sezərə və Baş nazir Rəcəb Tayyib Ərdoğana çatdırmağı səfirdən xahiş etdi.
Bölmənin digər xəbərləri
