AZƏRBAYCAN PREZİDENTİ İLHAM ƏLİYEVİN ÇIXIŞI
Əziz dostlar!
Hörmətli xanımlar və cənablar!
Bu gün çox əlamətdar və gözəl bir gündür - bütün dünyada və əlbəttə, Slavanın Vətənində, Azərbaycanda artıq neçə illərdir işləyən Vişnevskaya-Rostropoviç Fondu uşaqların xəstələnməməsi üçün çox mühüm, çox nəcib bir missiyanı - uşaqların peyvəndlənməsi missiyasını həyata keçirir. Uşaqların xəstələnməməsi üçün, sağlam böyüməsi üçün, özlərini yaxşı hiss etməsi üçün, bizim gələcəyimiz olan yeni nəslin həm fiziki, həm də mənəvi cəhətdən sağlam olması üçün dünyada bundan da nəcib missiya ola bilməz.
Bakıda belə tədbirlər artıq neçənci ildir keçirilir. Bu yardımı alan uşaqların sayı ildən-ilə artır. İndiki kampaniya Azərbaycanda, demək olar, hamını əhatə edir. Bu, ürəkdən, Slavanın öz Vətəninə bəslədiyi hisslərdən gələn çox böyük zəhmətdir.
Slava Rostropoviç dünya şöhrətli musiqiçidir. Ancaq o, həm də dünya şöhrətli şəxsiyyət, ictimai xadimdir. O, dərin səmimiliyi, açıqlığı, prinsipiallığı, cəsarəti ilə fərqlənən insandır. Bu gün, ölkələrdə söz azadlığının, plüralizmin, demokratiyanın olduğu dövrdə cəsarətli olmaq, hər hansı mövzuda danışmaq asandır. Ancaq sovet İttifaqında totalitarizmin ən ağır illərində - 1970-ci illərdə demokratiyanın, söz azadlığının müdafiəsi uğrunda, ədalətsizliyə qarşı, öz simasını, mənliyini saxlamaq, kiminsə buyuruğu ilə oturub-durmamaq və təhqir olunmamaq imkanı uğrunda öz səsini açıq şəkildə ucaltmış Slava kimi insanlar çox az idi. Bu, ona çox baha başa gəldi. Lakin o, bütün hücumlara, bütün təhqirlərə davam gətirdi. Ona qarşı çıxanlar bu gün tarix üçün yoxdurlar, onlar ancaq mənfi personajlar kimi mövcuddurlar. Slava isə bu gün xeyirxahlıq yaratmaqda davam edən insan kimi dünyada məşhurdur. Bu, keyfiyyətlərin - əsil mübariz insana xas çox böyük iradi qüvvə, prinsipiallıq, cəsurluq, eyni zamanda, mərhəmət, xeyirxahlıq, insanlıq kimi keyfiyyətlərin çox nadir tərzdə təcəssümüdür.
Slava gözəl dostdur. Bunu Slavanın dostu olmaq xoşbəxtliyi nəsib olmuş bütün adamlar deyər. Həqiqətən, bu, həm çox böyük məmnunluq, həm çox böyük məktəbdir. Uşaqlar belə insanların timsalında vicdanlı və həqiqətpərəst olmaq ruhunda tərbiyə edilməli və Vətəni, öz xalqını sevməyi, eyni zamanda, heç vaxt öz prinsiplərinin əleyhinə getməməyi, heç vaxt kiminsə buyuruğu ilə oturub-durmamağı, heç vaxt yaltaqlıq etməməyi öyrənməlidirlər. Bununla yanaşı, Slava həm də son dərəcə istedadlı musiqiçidir. Elə bir musiqiçi ki, onun sənəti on illər ərzində bütün dünyada heyranlıq doğurur.
Biz çox fəxr edirik ki, Slava həmyerlimizdir. Çox xoşbəxtik ki, son dərəcə məşğulluğuna, təqvimində asudə vaxtı olmamasına baxmayaraq, o, hər il Bakıya gəlir, konsertlər verir, uşaqlara ustad dərsləri keçir, bizə bu ünsiyyət xoşbəxtliyi günlərini və anlarını bəxş edir.
Bu yaxınlarda görkəmli bəstəkar Şostakoviçin doğumunun 100 illiyinə həsr edilmiş festivalın açılışı oldu. Yenə də Slavanın təşəbbüsü ilə Bakı Ümumdünya Şostakoviç Festivalının keçirilməsinin başlandığı ilk şəhər oldu. Bu, onun öz Vətəninə, öz həmyerlilərinə məhəbbətinin daha bir təzahürüdür.
Mən bu gün Sizinlə yenidən görüşməyimizə çox şadam. Azərbaycanda gördüyünüz bütün işlərə görə Sizə bir daha təşəkkür etmək, çox uzun ömür, dünyamız naminə işləməyi arzulamaq istəyirəm.
X X X
Azərbaycan Prezidenti İlham Əliyev və maestro Mstislav Rostropoviç üç uşağa peyvənd edilməsinə baxdılar. Həmin gün burada 88 uşağa və 5 müəllimə peyvənd edildi.
Prezident İlham Əliyev və Mstislav Rostropoviç uşaqlarla xatirə şəkli çəkdirdilər.
Mərasimdə səhiyyə naziri Oqtay Şirəliyev, ABŞ-ın Azərbaycandakı səfiri Rino Harniş iştirak edirdilər.
Bölmənin digər xəbərləri
