AZƏRBAYCAN PREZİDENTİ İLHAM ƏLİYEVİN YEKUN NİTQİ
Azərbaycanda sosial-iqtisadi problemlər çoxdur. Regionların inkişafı proqramının əsas məqsədi də budur ki, bütün problemlər aradan qaldırılsın. İşlər gedir, yeni iş yerləri açılır, yoxsulluq səviyyəsində yaşayanların sayı aşağı düşür, əməkhaqqı artır. İndi, məsələn, bilirsiniz ki, tikinti sektorunda da çox böyük irəliləyiş var. Əvvəllər çoxlu sayda işsiz adamlar var idi. İndi mən rayonlarda oluram, müxtəlif binaları tikən insanlardan soruşuram, deyirlər ki, kim işləmək istəyirsə, o da özünə iş tapır. Bəzi hallarda ayrı-ayrı firmalar işçi qüvvəsi axtarır, tapa bilmirlər. Biz gərək bütün məsələlərə kompleks şəkildə baxaq. Harada işlər görülür, biz gərək bunu əlaqələndirək. Müəyyən rayonlarda daha çox tikinti aparılır. Deməli, gərək biz insanları səfərbər edib o rayonlara yönəldək. Bu, təbii bir prosesdir. Yenə deyirəm, əgər hər bir rayonun, hər bir kəndin problemi öz həllini taparsa, deməli, ölkədə problem qalmayacaqdır.
Yollar, kənd yolları bərbad vəziyyətdədir. Uzun illərdir ki, vəsait qoyulmur. İndi vəsaitimiz var və bu sahəyə ayrılır. Siz rayonlarda yaşayırsınız, burada rəhbərlik edirsiniz və hər şeyi də bilirsiniz. Nə etmək lazımdır, onu da bilirsiniz. Bəzi işlərə sizin gücünüz çatmır. Təbii ki, siz bizə müraciət etməlisiniz. Əlavə vəsait ayrılacaqdır. Vəsait olan halda hər şeyi etmək mümkündür.
Bilirsiniz ki, bu yaxınlarda yol tikintisinə lazım olan təxminən 15 milyon dollar dəyərində yeni texnika alınıbdır. Ona görə ki, biz bunu rayonlarda yolların tikintisinə yönəldək və bundan istifadə edək. Texnika olan halda, vəsait olan halda bütün işləri görməliyik. Ona görə mən sizə göstəriş verirəm, rayonun problemlərini həll etmək üçün maksimum nə lazımdırsa bütün təkliflərinizi Zeynal Nağdəliyevə təqdim etməlisiniz ki, biz konkret, dəqiq proqram tərtib edək. O, birillik ola bilər, ikiillik ola bilər. Ondan sonra siz bunu icra etməlisiniz ki, bu problemlər aradan qaldırılsın. Biz bu yolla ölkəmizi, vətəndaşlarımızı narahat edən problemləri həll edərik.
Bizdə enerjiyə olan tələbat ildən-ilə artır. Düzdür, indi yeni elektrik stansiyaları tikilir və bu tələbat ödənilir. Məni bəzi hallarda inandırmağa çalışırlar ki, rayonlarda hər şey yaxşıdır. Amma mən bilirəm ki, belə deyildir. Bilirəm ki, işıq fasilələrlə verilir, qaz verilmir, demək olar ki, rayonun əhalisinin yarısı onu alır, yarısı almır. Bunun, əlbəttə, təbii səbəbləri var. Çünki kifayət qədər qazımız yoxdur. Biz gərək onu xaricdən alaq və istədiyimiz həcmdə də ala bilmirik. Çünki Rusiyadan gələn magistral qaz kəmərlərinin müəyyən gücü var. Lap istəsək də, 4 milyard 500 milyon kubmetrdən çox qaz ala bilmirik. Yəni bu, təbii məhdudiyyətdir. Amma bilirəm ki, bizim öz “Şahdəniz” qaz yatağımız işə düşəndən sonra bu məsələ həll olunacaqdır.
Elektrik enerjisinə gəldikdə isə, burada heç bir məhdudiyyət yoxdur. Çünki biz qazı elektirk stansiyalarına veririk, ondan başqa, mazut da var. Elektrik stansiyaları da tikilir. Nə üçün biz əhalini işıqla istədiyimiz səviyyədə təmin edə bilmirik? Gərək biz bunu araşdıraq. Elektrik stansiyalarında ildə 2 milyon ton mazut yandırılır, ondan əlavə, 5 milyard kubmetr qaz da yandırılır. Yenə də kifayət etmir. Ona görə bu məsələ ciddi araşdırılmalıdır və mənə real məlumat verilməlidir.
Mən həmişə, hər yerdən soruşuram ki, işıq necə verilir. Bəzi yerlərdə yerli icra nümayəndələri deyirlər ki, hər şey yaxşıdır. Məni aldatmaq lazım deyil, hər şeyi dəqiqliyi ilə bilməliyəm. Bu sualı ona görə vermirəm deyəsiniz ki, yaxşıdır, mən də deyəm ki, sağ olun. Sualı ona görə verirəm ki, vəziyyəti bilim. Çünki mən Bakıda oturub bunun hamısını bilə bilmərəm. Aidiyyəti orqanlara sual verirəm, deyirlər ki, yaxşıdır, yaxşılaşır. Yaxşı, bu, nə qədər yaxşılaşacaq? Mənə lazımdır ki, hər bir kənddə, istənilən vaxtda işıq olsun. Qışda insanlar üşüməsinlər. Bu, insanlarımızın təbii tələbatıdır. Biz də bunu təmin etməliyik. Əsas məsələlər bunlardır – elektrik enerjisi, qaz, su təchizatı və təbii ki, meliorasiya məsələləri və iş yerləri.
O ki qaldı, məktəblərin, xəstəxanaların təmirinə, tikintisinə, bilirsiniz ki, bu, işlər artıq Azərbaycanda geniş vüsət alıbdır. Demək olar ki, bu bir yenilik oldu. Uzun illər idi ki, xəstəxanalar tikilmirdi. İndi ən müasir xəstəxanalar tikilir. Bu il və keçən ilin sonunda onların, deyəsən, 5-i və ya 6-nın təməl daşı qoyulubdur. Birinci Lənkəranda, ondan sonra Gəncə, Qazax, Quba, Bərdə, Zaqatala və başqa yerlərdə. Yəni bu sosial infrastruktur yeniləşəcəkdir. Əlbəttə ki, gərək siz yerlərdə bu işləri aparasınız. Mərkəzi icra orqanları ilə daim əlaqədə olasınız. Biz Prezidentin İcra Aparatında da regional məsələlərlə məşğul olan şöbəni möhkəmləndirdik. Çünki orada da islahatlar aparılır. Yeni yanaşmalar mövcuddur və iş təkmilləşibdir. Mən əminəm ki, biz bu işdə ciddi irəliləyişə nail olacağıq.
Hər halda, regional inkişaf proqamının uğurla icra olunması deməyə əsas verir ki, istiqamət düzgün seçilib, işlər də düzgün şəkildə aparılır. Ancaq gərək biz həmişə öz işimizdən narazı olaq. Baxmayaraq ki, uğurlar da var, nəticələr də var, amma problemlər də var və çətinliklər də var. Nə qədər ki, bunlar var, biz öz işimizdən razı ola bilmərik. Ona görə mən sizi çox ciddi işləməyə dəvət edirəm ki, proqram tərtib etdiyimiz kimi icra olunsun və qarşıya yeni çıxan məsələlər öz həllini tapsın.
Siz burada bir neçə ciddi məsələyə toxundunuz. Onların, bu məsələlərin proqramda əksi yoxdur. Çünki iki il bundan əvvəl unudulmuşdu, yaxud da bu məsələlər sonra meydana çıxıbdır, həm də, ümumiyətlə, bütün məsələləri bir proqramda əhatə etmək mümkün deyildir. Amma indi qaldırdığınız məsələlərə konkret şəkildə baxılacaq, qərarlar qəbul ediləcək və siz də onları icra etməlisiniz. Bu işdə sizə uğurlar arzulayıram.
Bütövlükdə yenə də deyirəm, mən Qarabağ bölgəsində olmağımdan çox məmnunam. Çox istəyirəm ki, Qarabağ bölgəsi daha da inkişaf etsin. O, bizim tarixi diyarımızdır, doğma torpağımızdır. Bura döyüş bölgəsidir, müharibə bölgəsidir, xüsusi diqqət olmalıdır. Bura çox xüsusi münasibət olmalıdır. Burada sosial problemlər olmamalıdır. İşıq həmişə yanmalıdır, qaz olmalıdır, yaxşı sosial infrastruktur olmalıdır.
Qarabağ həmişə möhkəm olsun, Azərbaycanın dayağı olan Qarabağ çiçəklənsin! Uğurlar arzulayıram.
Sağ olun.
Bölmənin digər xəbərləri
