Azərbaycan Prezidenti Zəngəzur dəhlizinin imkanları ilə bağlı dünyaya daha bir mesaj verdi
Bakı, 12 yanvar, AZƏRTAC
Ötən il olduğu kimi, bu ildə də Azərbaycanın beynəlxalq arenada önəmli aktor kimi fəaliyyətini izləyəcəyik. İlk baxışdan bu fikir adi qarşılansa da, mahiyyət etibarı ilə tarixi mərhələləri yaşayırıq. Belə ki, 28 ildən sonra Şuşanı qaytardıq, Kəlbəcəri, Ağdamı geri aldıq, Laçın şəhərinin mərkəzində Azərbaycan bayrağını dalğalandırdıq. Bütün bunlar çox mühüm tarixi hadisələrdir. İşğaldan azad olunan Zəngilanda keçən il hava limanının açılışı elə Zəngəzur dəhlizinin bir parçası anlamına işarə idi. Bu il isə artıq Zəngəzur dəhlizinin açılması istiqamətində daha ciddi irəliləyişlərin şahidi olacağıq.
Prezident İlham Əliyevin yanvarın 10-da yerli telekanallara müsahibəsində səsləndirdiyi fikirlər, verdiyi mesajlar bir daha təsdiqlədi ki, bölgədə davamlı sülhün və təhlükəsizliyin təmin olunması, regionun sabit inkişaf mərhələsinə qədəm qoyması, eyni zamanda, Zəngəzur dəhlizinin açılması artıq zərurətdir.
Bu fikirləri AZƏRTAC-a açıqlamasında siyasi ekspert Vüsalə Hüseynli söyləyib.
Azərbaycana kənardan xarici təsirlərə və təzyiqlərə cəhdlərin olmasına baxmayaraq, dövlətimizin doğru strateji xətt üzrə irəliləməkdə davam etdiyini və bu yoldan dönməyəcəyini bildirən siyasi ekspert deyib: “Əslində Zəngəzur dəhlizinin real siyasi və iqtisadi əhəmiyyəti həm region ölkələri, həm də dünya üçün deyilənlərdən dəfələrlə artıqdır. Məhz bu səbəbdən də Zəngilan Beynəlxalq Hava Limanının açılışında iştirak edən qardaş Türkiyə dövlətinin Prezidenti Rəcəb Tayyib Ərdoğan çıxışında qeyd etmişdi ki, Zəngəzur dəhlizinin reallaşmasından ciddi narahat olan dairələrin həyəcanı yersizdir və Azərbaycan əmin addımlarla yoluna davam edir. Azərbaycan Prezidenti İlham Əliyev müsahibəsində bir daha Ermənistan da daxil olmaqla dünyaya dəhlizin imkanlarını xatırladaraq mesaj verdi. Dövlətimizin başçısı vurğuladı ki, Azərbaycan regionda öz sözünü demiş bir ölkədir. Biz qonşularımızın üzərinə hərbi texnika ilə hücum etmirik, əksinə tunellər inşa edir, yollar açır, hava limanları tikirik. Dünyaya səslənirik ki, gəlin birgə çalışaq, quraq, yaradaq. Biz yenilənmiş milli ideya ətrafında birləşərək irəliləyirik”.
Siyasi ekspertin sözlərinə görə, Prezident İlham Əliyev açıqlamasında açıq şəkildə qeyd etdi ki, Zəngəzur dəhlizi tarixi zərurətdir və Ermənistan istəsə də, istəməsə də bu, reallaşacaq. Bu səbəbdən hər kəs öz daxili işi ilə məşğul olsa, daha yaxşı olar. Bizim sərhədlərimiz daxili işimizdir və bu qırmızı xəttə kimsə toxunmamalıdır. Əks halda layiqli cavabını alacaqdır. Çünki bu dəhliz ölkəmiz üçün bir neçə aspektdən izah oluna bilər ki, məhz bu elementlər siyasi, iqtisadi inkişaf və təhlükəsizlik baxımından əhəmiyyətlidir. Xüsusilə, qeyd etməliyik ki, 44 günlük müharibədən sonra bu dəhlizin reallaşması Azərbaycanın imtiyazı kimi qəbul edilə bilər. Hansı ki, 2020-ci il noyabrın 10-da imzalanmış üçtərəfli Bəyanatın doqquzuncu bəndində də bu kommunikasiyanın açılması Ermənistanın öhdəliyi kimi təsbit edilib.
Ekspertin fikrincə, dəhliz, eyni zamanda, Azərbaycanın öz eksklavı olan Naxçıvan Muxtar Respublikası və Türkiyə ilə əlaqələri də gücləndirəcək, ölkəmizin geoiqtisadi əhəmiyyətini daha da artıracaq. Ən əsası, türk dünyası uzun illərdən sonra yenidən Zəngəzur dəhlizi vasitəsi ilə birləşəcək.
Bölmənin digər xəbərləri
