AZƏRBAYCAN PREZİDENTİNİN BASMAN BAZARINDA ZƏRƏRÇƏKƏNLƏRƏ DAHA BİR QAYĞISI
Səhiyyə Nazirliyinin mətbuat xidmətindən AZƏRTAC-ın müxbirinə bildirmişlər ki, Azərbaycan Prezidentinin tapşırığına əsasən, nazir Oqtay Şirəliyev Basman bazarında baş vermiş faciə nəticəsində zərər çəkmiş həmvətənlərimizin problemlərinin həlli ilə bağlı Moskvada olarkən, ona hadisə zamanı həyat yoldaşı həlak olmuş və özü isə iki ayağını itirmiş qadın müraciət etmişdir. O, Bakı Dövlət Universitetində ödənişli təhsil alan oğlu İsmayıl Süleymanovun təhsilini davam etdirməsi üçün maddi imkanının olmadığını bildirmişdir.
Faciə ilə üzləşmiş soydaşımızın xahişinə diqqətlə yanaşılmışdır. Azərbaycan Prezidenti İlham Əliyev BDU-nun rektoru Abel Məhərrəmova tələbəni həmin ali məktəbin beynəlxalq münasibətlər fakültəsində ödənişsiz təhsil almasına şərait yaradılması barədə göstəriş vermişdir.
