AZƏRBAYCAN RESPUBLİKASI XARİCİ İŞLƏR NAZİRLİYİNİN MƏTBUAT MƏRKƏZİ XƏBƏR VERİR
Fevralın 1-də Azərbaycan Respublikasının xarici işlər naziri Vilayət Quliyev Azərbaycan Beynəlxalq Əməliyyat Şirkətinin prezidenti Deyvid Vudvordu qəbul etmişdir.
Görüş zamanı Deyvid Vudvord ABƏŞ-in Azərbaycanın neft sektorunda apardığı işlər haqqında ətraflı məlumat vermiş və şirkətin daha səmərəli fəaliyyəti üçün regionda sabitlik və təhlükəsizliyin təmin və bərqərar olunmasının vacibliyini xüsusi vurğulamışdır. O həmçinin Xəzəryanı dövlətlər tərəfindən Xəzərin hüquqi statusunun tezliklə müəyyən olunacağına ümid etdiyini bildirmişdir.
Nazir Vilayət Quliyev ABƏŞ-in fəaliyyətini yüksək qiymətləndirərək, bu şirkətin Azərbaycan iqtisadiyyatının inkişafına, ölkəmizin Avropaya və beynəlxalq aləmə inteqrasiyasına xidmət etdiyini vurğulamışdır.
Nazir Xəzər dənizinin hüquqi statusunun müəyyənləşdirilməsinin aktuallığını qeyd edərək, bu məsələnin Xəzəryanı dövlətlərin başçılarının Aşqabadda keçiriləcəyi nəzərdə tutulan zirvə görüşündə müzakirə ediləcəyini bildirmişdir.
Xarici siyasət idarəsinin başçısı Vilayət Quliyev Ermənistan-Azərbaycan, Dağlıq Qarabağ münaqişəsinə toxunaraq, münaqişənin həlli istiqamətində aparılan işlər, ATƏT -in Minsk qrupunun fəaliyyəti haqqında Deyvid Vudvorda məlumat vermişdir.
Görüşdə qarşılıqlı maraq doğuran bir sıra məsələlər də müzakirə olunmuşdur.
Bölmənin digər xəbərləri
