AZƏRBAYCAN RESPUBLİKASININ MƏDƏNİYYƏT SİYASƏTİ BARƏDƏ MİLLİ MƏRUZƏNİN TƏQDİMATI
Azərbaycan Respublikasının Avropa Şurası yanında nümayəndəliyindən AZƏRTAC-ın müxbirinə bildirmişlər ki, oktyabrın 10-da mədəniyyət naziri Polad Bülbüloğlu və AŞ baş katibinin müavini xanım Mod de Bur-Bukikkio Avropa Şurası iqamətgahında təşkil edilmiş “Qobustsan” fotosərgisini açmışlar. P.Bülbüloğlu Qobustanın tarixindən danışaraq, 40 min il əvvəl qayalar üzərində çəkilmiş rəsmlərdə ibtidai insanların həyatının təsvir edildiyini, məşhur Norveç səyyahı və alimi Tur Heyerdalın və italiyalı alim Emmanuel Anatinin apardığı tədqiqatların əhəmiyyətini vurğulamış və bu abidənin bəşər mədəniyyəti tarixində özünəməxsus yeri olduğunu bildirmişdir.
Xanım Mod de Bur-Bukikkio sərginin Avropa arxeoloji irsinin qorunması baxımından əhəmiyyətini qeyd edərək, Qobustan qayaüstü təsvirlərini bütün bəşəriyyət, xüsusilə Avropa üçün mühüm tarixi abidə kimi dəyərləndirmişdir.
Həmin gün Avropa Şurası Mədəniyyət komitəsinin geniş iclasında Azərbaycan Respublikasının mədəniyyət siyasəti barədə milli məruzənin təqdimatı olmuşdur. Nazir P.Bülbüloğlu çıxışında mədəniyyət siyasətin əsası istiqamətləri, bunları gerçəkləşdirmə mexanizmləri və gələcək perspektivlər barədə ətraflı məlumat vermiş, Azərbaycan Prezidentinin mədəniyyətin inkişafına xüsusi diqqət və qayğı göstərdiyini vurğulamışdır. O, mədəniyyət sahəsində islahatlarının vacibliyindən danışaraq bildirmişdir ki, hökumət qarşıya çıxan çətinliklərin aradan qaldırılmasında səylərini davam etdirəcəkdir. Beynəlxalq mədəni əməkdaşlıq proseslərində Azərbaycanın fəal iştirak etdiyini bildirən nazir qloballaşma proseslərinin milli mədəniyyətin qorunub saxlanmasına göstərdiyi təsirə öz münasibətini bildirmiş, xalqımızın xalçaçılıq və muğam sənətlərinin inkişaf etdirilməsinin əhəmiyyətindən söhbət açmışdır. P.Bülbüloğlu təcavüzkar Ermənistanın işğal etdiyi Azərbaycan ərazilərində xalqımızın tarix və mədəniyyət abidələrini dağıtması məsələsinə də toxunmuşdur.
Məruzəni müsbət qiymətləndirən ekspertlər Azərbaycanın mədəniyyət siyasətinin perspektivlərinə münasibətlərini bildirmiş, özlərini maraqlandıran məsələlər ətrafında konstruktiv fikir mübadiləsi aparmışlar.
Azərbaycan Respublikasının AŞ yanında daimi nümayəndəliyinin rəhbəri səfir Aqşin Mehdiyev sərginin açılışında və təqdimat mərasimində iştirak etmişdir.
Əsgər Əliyev
AZƏRTAC-ın xüsusi müxbiri
Paris
Bölmənin digər xəbərləri
