SİYASƏT
AZƏRBAYCAN RESPUBLİKASININ NAZİRLƏR KABİNETİNDƏ
“Diplomatik xidmət haqqında” Azərbaycan Respublikası Qanununun tətbiq edilməsi barədə” Azərbaycan Respublikası prezidentinin 2001-ci il 3 sentyabr tarixli Fərmanının icrasını təmin etmək məqsədi ilə Nazirlər Kabineti qərara almışdır ki, “Diplomatik rütbəyə görə vəzifə maaşına əlavələrin verilməsi qaydaları” təsdiq edilsin.
“Diplomatik dərəcələr və xarici dilləri bilməsinə görə tariflərin müəyyən edilməsi haqqında” Azərbaycan Respublikası Nazirlər Kabinetinin 1992-ci il 4 iyul tarixli 379 nömrəli qərarının 1-ci bəndi qüvvədən düşmüş hesab olunmuşdur.
Bu qərar imzalandığı gündən qüvvəyə minmişdir.
X X X
“Azərbaycan Respublikasının 2002-ci il dövlət büdcəsi haqqında” Azərbaycan Respublikası Qanununun tətbiq edilməsi barədə” Azərbaycan Respublikası prezidentinin 2001-ci il 26 dekabr tarixli Fərmanının icrası ilə əlaqədar Nazirlər Kabineti qərara almışdır ki, Azərbaycan Respublikasının İqtisadi İnkişaf Nazirliyi və Yanacaq və Energetika Nazirliyi, Dövlət Neft Şirkəti, “Azərenerji” və “Azəriqaz” səhmdar cəmiyyətləri ilə birlikdə hazırlanmış “Azərbaycan Respublikasının 2002-ci il üzrə yanacaq-enerji balansı” təsdiq edilsin.
Dövlət Neft Şirkəti, “Azərenerji” və “Azəriqaz” səhmdar cəmiyyətləri “Azərbaycan Respublikasının 2002-ci il üzrə yanacaq-enerji balansı”nda nəzərdə tutulan neft və təbii qazın hasilatı, elektrik və istilik enerjisinin istehsalı, təbii qazın idxalı və elektrik stansiyalarının yanacaq ilə təchizatı göstəricilərinin yerinə yetirilməsini təmin etməlidirlər.
X X X
“Azərbaycan Respublikasının Ekologiya və Təbii Sərvətlər Nazirliyinin yaradılması haqqında” Azərbaycan Respublikası prezidentinin 2001-ci il 23 may tarixli Fərmanının icrası ilə əlaqədar Nazirlər Kabineti qərara almışdır ki, Azərbaycan Respublikası Nazirlər Kabinetinin bəzi qərarlarına dəyişikliklər edilərək, adları dəyişdirilmiş bir sıra nazirliklərin və komitələrin əvvəlki adları yeni adları ilə əvəz edilsin.
Nazirlər Kabinetinin bir sıra digər qərarlarında isə redaktə xarakterli düzəlişlər olunmuşdur.
“Azərbaycan Respublikası Nazirlər Kabinetinin qüvvədən düşmüş hesab edilən bəzi qərarlarının siyahısı” təsdiq edilmişdir.
Bu qərar imzalandığı gündən qüvvəyə minmişdir.
Bu barədə AZƏRTAC-a Nazirlər Kabinetinin mətbuat mərkəzindən məlumat vermişlər.