Azərbaycan Texnologiya Universiteti - zirvələri hədəfləyən universitet
Bakı, 28 avqust, AZƏRTAC
Hər bir ölkənin sosial-iqtisadi inkişafı həmin ölkədə insan kapitalının inkişaf səviyyəsindən asılıdır. Son dövrdə dünya iqtisadiyyatında müşahidə olunan texnoloji dəyişikliklər şəraitində rəqəmsal bacarıqlara malik, yeni texnologiyaları aktiv tətbiq edə bilən, gələcək illərdə dünyada artan rəqabətə hazır olan yüksəkixtisaslı insan kapitalının formalaşdırılması xüsusi aktuallıq kəsb edir. Müasir dövrdə kompetensiya, sosial vərdişlər və bacarıqların harmoniyada inkişafına əsaslanan ali təhsilə xüsusi önəm verilir. Ölkəmizin sosial-iqtisadi inkişaf potensialını nəzərə alan və iqtisadiyyatın prioritet istiqamətləri üzrə bilik, bacarıq və səriştələrə malik peşəkar kadrlara olan tələbatının təmin edilməsini hədəfləyən ali təhsil müəssisələrindən biri də Gəncə şəhərində yerləşən Azərbaycan Texnologiya Universitetidir (ATU).
Universitetdən AZƏRTAC-a bildirilib ki, hazırda ATU-nun 4 fakültəsi və 14 kafedrasında 21 ixtisas üzrə Azərbaycan və rus dillərində kadr hazırlığı aparılır. Bura əsasən texniki və texnoloji ixtisaslar aiddir, lakin bunlarla yanaşı, iqtisadiyyat və idarəetmə, turizm və ekologiya sahəsinə aid olan ixtisaslar üzrə də kadr hazırlığı həyata keçirilir. Belə ki, ATU-da I ixtisas qrupu üzrə “İnformasiya texnologiyaları”, “Logistika və nəqliyyat texnologiyaları mühəndisliyi”, “Metallurgiya mühəndisliyi”, “Mühəndis fizikası”, “Proseslərin avtomatlaşdırılması mühəndisliyi”, “Qida mühəndisliyi”, “Radiotexnika və telekommunikasiya mühəndisliyi”, “Ekologiya mühəndisliyi”, “Kompüter mühəndisliyi”, “Nəqliyyat mühəndisliyi”, “Şərabçılıq”, “Elektrik və elektronika mühəndisliyi”, II ixtisas qrupu üzrə “Dövlət və bələdiyyə idarəetməsi”, “Mühasibat”, “Turizm bələdçiliyi”, “Biznesin idarə edilməsi”, “İqtisadiyyat”, “Marketinq”, “Turizm işinin təşkili”, IV ixtisas qrupu üzrə “Ekologiya” və V ixtisas qrupu üzrə “Dizayn” kimi müasir dövrün tələblərinə cavab verən ixtisaslar mövcuddur. Göründüyü kimi, qeyd olunan ixtisaslar nəinki bu günün, həm də gələcəyin ixtisaslarıdır. Əmək bazarında sözügedən sahələr üzrə mütəxəssislərə bu gün tələbat çoxdur və gələcəkdə də bu tələbat daha da artacaq. Son bir il ərzində ali məktəbin bütün fəaliyyət istiqamətləri və sahələrində canlanma müşahidə olunur.
ATU-da aparılan islahatlar, ilk növbədə, şəffaflığın və tədris prosesində keyfiyyətin yüksəldilməsinin təmin olunmasına, tədris prosesi üçün şəraitin yaxşılaşdırılmasına, tədris-metodiki işin təkmilləşdirilməsinə, elmi potensialın gücləndirilməsinə, professor-müəllim heyətinin peşəkarlığının və sosial durumunun yüksəldilməsinə hədəflənib.
Son dövrdə görülən tədbirlər nəticəsində dinamik inkişaf edən Azərbaycan Texnologiya Universitetinə abituriyentlərin və tələbələrin marağı artmaqdadır. 2022-2023-cü tədris ilində ən yüksək qəbul nəticəsi (99 faiz) ilə ATU-nun region universitetləri arasında ilk yerlərdən birini tutmağı bunun bariz nümunəsidir. Magistraturaya qəbul imtahanlarının nəticələrinə əsasən, həm ötən il, həm də bu il 97,2 faiz qəbul göstəricisi ilə universitet tarixində rekorda imza atılıb. Bu göstəricilər abituriyent və tələbələrin universitetə, eləcə də texniki və texnoloji ixtisaslara marağının artmasına dəlalət edir. Rəqabətqabiliyyətli yüksəkixtisaslı mütəxəssis hazırlanmasını hədəfləyən universitetin son bir il ərzində Avropa ölkələrinin aparıcı universitetləri ilə imzaladığı əməkdaşlıq müqavilələri hesabına tələbələr mübadilə proqramları çərçivəsində həm də təhsillərinin bir hissəsini xarici ölkə universitetlərində davam etdirmək imkanı əldə edirlər. Eyni zamanda, universitetin ölkədə fəaliyyət göstərən iri sənaye müəssisələri ilə bağladığı müqavilələrin tələbələr üçün səmərəli istehsalat təcrübəsinin təşkilində və tələbələr tərəfindən praktiki bacarıq və vərdişlərin qazanılmasında, eləcə də uğurlu karyera qurulmasında çox böyük əhəmiyyəti vardır.
Əminik ki, yüksək zirvələri hədəfləyən universitet yaxın zamanlarda ölkəmizdə və onun hüdudlarından kənarda bilik, bacarıq və səriştələrə malik peşəkar və rəqabətqabiliyyətli mütəxəssislərə olan tələbatın təmin olunmasında öz töhfəsini verəcək.
Bölmənin digər xəbərləri
