Azərbaycan Türk Dövlətləri Təşkilatında olduqca mühüm və strateji rola malikdir - ŞƏRH
Bakı, 17 aprel, AZƏRTAC
Bu günlərdə Prezident İlham Əliyev Bakıda - ADA Universitetində keçirilən “Yeni dünya nizamına doğru” adlı beynəlxalq forumda iştirak edib. Dövlət başçısı artıq 7-ci dəfədir ki, bu forumlarda çıxış edir və hər dəfə aktual mövzular, beynəlxalq gündəmin məsələləri baxımından son dərəcə ciddi əhəmiyyət daşıyan səmimi və açıq fikirlər səsləndirir. Bu fikirlər Azərbaycanın mövqeyinin həm regionda, həm də beynəlxalq aləmdə aydın şəkildə anlaşılmasına töhfə verir. Prezidentin çıxışları hər zaman dünya mediasında və analitik ictimaiyyətdə böyük rezonans doğurur. Forumun təşkilindəki mühüm məqamlardan biri o idi ki, beynəlxalq ekspertlər azad edilmiş əraziləri ziyarət edib və bu dəfə Xankəndinə səfər edərkən dağıntıların real miqyasını öz gözləri ilə gördülər, dövlətimiz tərəfindən aparılan bərpa prosesini birbaşa yerində müşahidə etdilər. Bir daha gördülər ki, Azərbaycan təkcə hərbi-siyasi qələbə ilə kifayətlənmir, eyni zamanda regionda sülhə, sabitliyə və inkişaf perspektivlərinə töhfə verən əsil quruculuq nümunəsi ortaya qoyur.
Bu fikirləri AZƏRTAC-a açıqlamasında Milli Məclisin deputatı, parlamentin Mədəniyyət komitəsinin sədr müavini Günay Əfəndiyeva söyləyib.
Deputat dövlət başçısının forumdakı çıxışının postmünaqişə dövründə Azərbaycanın strateji baxışını və prinsipial mövqeyini bir daha dolğun şəkildə əks etdirdiyini vurğulayaraq deyib: “Prezident İlham Əliyev beynəlxalq ictimaiyyətə açıq mesaj verdi ki, Bakı sülhə sadiqdir, lakin bu sülh yalnız beynəlxalq hüquq və reallıq əsasında mümkündür. Ermənistanla münasibətlərin normallaşmasının əsas şərti bu ölkənin konstitusiyasında hələ də qüvvədə olan Azərbaycana qarşı ərazi iddialarından tam və birmənalı şəkildə imtina olunmasıdır.
Yalnız bu əsaslı dəyişiklikdən, eləcə də əhəmiyyətini tam şəkildə itirmiş mənasız Minsk qrupunun ləğvindən sonra Ermənistanın regional əməkdaşlıq təşəbbüslərinə qoşulması mümkün olar. Bu yanaşma bir daha göstərir ki, Azərbaycan ədalətli, beynəlxalq hüquqa və qarşılıqlı anlayışa söykənən sülh və əməkdaşlıq formatının tərəfdarıdır və bunu tələb edir.
Son illər Azərbaycanın xarici siyasətində və diplomatik diskursunda Türk Dövlətləri Təşkilatı (TDT) ilə əlaqələrə mühüm önəm verilməsini qeyd edən Günay Əfəndiyeva vurğulayıb: “Bu, Türk xalqları arasındakı tarixi və etnik bağlara söykənir, eyni zamanda regional və qlobal güc balansında yeni bir mərkəzin formalaşdırılması strategiyasıdır. Dövlət başçısının dediyi kimi, bu mərkəzin unikallığı onun ümumi köklərə, ənənələrə əsaslanması, ortaq dəyərləri bölüşməsidir.
Azərbaycan Türk Dövlətləri Təşkilatında olduqca mühüm və strateji rola malikdir. Ölkəmiz coğrafi baxımdan qardaş Türkiyə və Mərkəzi Asiya dövlətləri arasında körpü olmaqla yanaşı, siyasi təşəbbüskarlıq baxımından da inteqrasiya prosesinin aparıcı qüvvələrindəndir.
Düşünürəm ki, bu mənzərədə Azərbaycanın Şimali Kipr Türk Respublikasına verdiyi dəstək də xüsusi qeyd edilməlidir. Prezident İlham Əliyevin vurğuladığı kimi, Azərbaycan Şimali Kirp Respublikasına TDT-də müşahidəçi statusunun verilməsində fəal rol oynayıb.
Bu isə o deməkdir ki, Azərbaycan hazırda mövcud olan və ya artıq ənənəvi missiyasının çöküş ərəfəsini yaşayan hansısa bir güc mərkəzinə yox, yeni yaradılmış güclü siyasi mərkəzini meydana çıxarmağı hədəfləyir.
Məlumdur ki, Azərbaycan daha geniş və mürəkkəb coğrafiyada da birləşdirici, ədalətli və nəticəyönümlü fəaliyyətini Cənubi Qafqazın lider dövləti kimi həyata keçirib. Baxın, ölkəmizin fərqli etnik, dini, mədəni köklərə, ictimai quruluşlara malik ölkələrin üzv olduğu Qoşulmama Hərəkatına siyasi dinamika verdiyi sədrliyini xatırlayaq.
Aprelin 7-də Daşkənddə keçirilmiş Qoşulmama Hərəkatının Parlament Şəbəkəsinin IV Konfransının Bəyannaməsində Qərbi Azərbaycan icmasının öz doğma torpaqlarına, doğma yurdlarına, ev-eşiklərinə sülh yolu ilə, təhlükəsiz şəraitdə və ləyaqətlə qayıdışı hüququna dəstək ifadə olunub.
Ölkəmizin ədalətli mövqeyinə Qoşulmama Hərəkatının ölkələrinin verdiyi dəstək onların beynəlxalq hüquq normalarına əsaslanmaları ilə yanaşı, eyni zamanda, etibarlı tərəfdaş və beynəlxalq aləmin məsuliyyətli, fəal və nüfuzlu üzvü olan Azərbaycana hörmət və etimadın təzahürüdür”.
Deputat hesab edir ki, Prezident İlham Əliyev çıxışında Türk Dövlətləri Təşkilatının qlobal səviyyədə beynəlxalq fəaliyyətin mərkəzinə çevrilə biləcəyinə inamını ifadə edib.
Bildirib ki, hər birimiz, hansı sferada mövqe tutmağımızdan asılı olmayaraq, Türk ölkələri arasında inteqrasiyanın dərinləşdirilməsi və mövcud əməkdaşlıq mexanizmlərinin təkmilləşdirilməsi üçün birgə səylərimizi daha da gücləndirməliyik.
“Parlament diplomatiyası çərçivəsində Türk dövlətləri ilə qarşılıqlı əlaqələrin genişləndirilməsi, qanunverici orqanlar arasında təcrübə mübadiləsinin təşviq edilməsi və ortaq qanunvericilik təşəbbüslərinin dəstəklənməsi də bu istiqamətdə xüsusi önəm daşıyır. İnkişaf edən türk əməkdaşlığı yalnız regionun deyil, bütün dünyanın sülh, təhlükəsizlik və rifahına töhfə verə bilər.
Türk Dövlətləri Təşkilatının gələcəkdə ağır siyasi çəkili qlobal faktor kimi çıxış etməsi siyasi və iqtisadi reallıq baxımından böyük əhəmiyyətə malikdir”, - deyə G.Əfəndiyeva vurğulayıb.
Bölmənin digər xəbərləri
