AZƏRBAYCAN-TÜRKİYƏ HƏRBİ ƏMƏKDAŞLIĞININ PERSPEKTİVLƏRİ MÜZAKİRƏ OLUNMUŞDUR
Ordu generalı Şəhidlər xiyabanında, Azərbaycanın müstəqilliyi və ərazi bütövlüyü uğrunda canlarından keçmiş Vətən övladlarının xatirəsini ehtiramla anmış, “Əbədi məşəl” və şəhid türk əsgərlərinin şərəfinə ucaldılmış abidələrin önünə əklil qoymuş, xatirə kitabına ürək sözlərini yazmışdır.
Sonra qonaq Müdafiə Nazirliyinə gəlmişdir. Burada onu müdafiə naziri general-polkovnik Səfər Əbiyev qarşılamışdır.
Hər iki ölkənin dövlət himni səslənmişdir.
Türkiyə Silahlı Qüvvələri Baş Qərargahının rəisi fəxri qarovul dəstəsinin önündən keçmişdir.
Rəsmi qarşılanma mərasimindən sonra müdafiə naziri Səfər Əbiyev Hilmi Özköklə təkbətək, sonra isə nümayəndə heyəti ilə geniş tərkibdə görüşmüşdür.
Səfər Əbiyev qonaqları salamlayaraq qeyd etmişdir ki, Silahlı Qüvvələrimiz arasında mövcud olan işgüzar əməkdaşlıq gündən-günə genişlənən Azərbaycan-Türkiyə qardaşlıq münasibətlərinin göstəricilərindən biridir. Qardaş xalqlarımızın arzu və istəklərindən irəli gələn və strateji maraqlara cavab verən əməkdaşlığın bu səviyyəyə çatmasında sizin böyük əməyiniz vardır. Siz Azərbaycan xalqı və Silahlı Qüvvələri qarşısında əvəzsiz xidmət göstərmisiniz. Elə buna görə də, Azərbaycan Prezidenti İlham Əliyev bu xidmətinizi qiymətləndirmiş və sizi yüksək dövlət mükafatı olan “Şöhrət” ordeni ilə təltif etmişdir. Sizi bu əlamətdar hadisə münasibətilə ürəkdən təbrik edirəm.
Nazir daha sonra demişdir ki, müstəqilliyini qazandığı gündən Azərbaycan xalqı ciddi çətinliklərlə qarşılaşmışdır. Bu çətinliklərin aradan qaldırılması və müstəqilliyimizin möhkəmləndirilməsi istiqamətində, xüsusilə də Milli Ordu quruculuğunda biz həmişə Türkiyə Respublikasının, türk xalqının köməyini, qardaşlıq yardımını yaxından hiss etmişik. Ölkəmizə qarşı təcavüzkarlıq siyasəti yürüdən Ermənistanın qeyd-şərtsiz Azərbaycan torpaqlarından çıxarılması və dövlətimizin ərazi bütövlüyünün bərpa edilməsi ilə bağlı Türkiyənin beynəlxalq aləmdə nümayiş etdirdiyi qəti mövqeyə görə, Azərbaycanın haqq işini daim müdafiə etdiyinə görə sizə və qardaş türk xalqına minnətdarlığımızı bildiririk.
Bu mövqe öz müstəqilliyini möhkəmləndirməsi və regionda lider dövlətə çevrilməsi istiqamətində Azərbaycana böyük dəstəkdir.
S.Əbiyev qeyd etmişdir ki, Azərbaycan Respublikası NATO ilə əməkdaşlığını durmadan genişləndirir, Avratlantik məkanına uğurla inteqrasiya edir, qloballaşan dünyada öz layiqli yerini tutmağa çalışır. Silahlı Qüvvələrimizin NATO standartlarına uyğunlaşdırılmasında Türkiyənin dəstəyi əvəzsizdir. Xüsusilə Azərbaycanın NATO ilə Fərdi Tərəfdaşlıq üzrə Əməliyyat Planı çərçivəsində götürdüyü öhdəliklərin yerinə yetirilməsində Türkiyə Silahlı Qüvvələrinin təcrübəsi bizim üçün çox faydalıdır.
Ordu generalı Hilmi Özkök “Şöhrət” ordeni ilə mükafatlandırıldığına görə Prezident İlham Əliyevə minnətdarlığını bildirmiş və qeyd etmişdir ki, bu mükafat bütün Türkiyə Silahlı Qüvvələrinə aiddir.
Ordu generalı vurğulamışdır ki, Türkiyə Silahlı Qüvvələri bundan sonra da Azərbaycan Silahlı Qüvvələrinin inkişafı üçün əlindən gələni edəcəkdir. O demişdir: “Biz inanırıq ki, Azərbaycan Respublikası daha da inkişaf edəcək, öz müstəqilliyini möhkəmləndirəcəkdir. Sizin uğurlarınız bizim uğurlarımızdır. Bizim işbirliyimiz bundan sonra da davam edəcək, ikitərəfli münasibətlərimiz daha da güclənəcəkdir. Türkiyə Silahlı Qüvvələri Azərbaycan Silahlı Qüvvələrinə öz yardımını davam etdirəcəkdir”.
Türkiyə Respublikası türk dünyasının lider dövlətidir, - deyən Səfər Əbiyev türk xalqının Azərbaycan xalqına göstərdiyi daimi yardıma görə Türkiyə dövlətinin rəhbərliyinə təşəkkür etmiş və bildirmişdir ki, Azərbaycan həmişə Türkiyə ilə bir olacaqdır. Biz həmişə birlikdə olmuşuq, bu gün də birlikdəyik və bundan sonra da bir olacağıq. Bizim yolumuz, tariximiz, dilimiz və dinimiz birdir.
Sonra ikitərəfli hərbi əməkdaşlığın inkişaf perspektivləri ətrafında geniş fikir mübadiləsi aparılmışdır.
Bölmənin digər xəbərləri
