Azərbaycan-Türkiyə müttəfiqliyi: “Bir millət, iki dövlət” prinsipinin yeni mərhələsi - ŞƏRH VİDEO
Bakı, 8 noyabr, Səbinə Əlizadə, AZƏRTAC
İkinci Qarabağ müharibəsində əldə edilən Qələbə Azərbaycan-Türkiyə münasibətlərində strateji müttəfiqliyin yeni mərhələsinin əsasını qoydu. 2020-ci il Zəfəri yalnız hərbi-siyasi baxımdan deyil, həm də regional güc balansının formalaşması baxımından dönüş nöqtəsi oldu. Müharibə dövründə Türkiyənin Azərbaycana göstərdiyi siyasi və mənəvi dəstək “Bir millət, iki dövlət” prinsipini praktik müstəviyə keçirdi və bu münasibətlər sonradan Şuşa Bəyannaməsi ilə rəsmi müttəfiqlik səviyyəsinə yüksəldi.
Ekspertlərin fikrincə, bu gün regionda yaranan yeni təhlükəsizlik və iqtisadi reallıqlar fonunda Ankara-Bakı tandemi Cənubi Qafqazda sülhün, sabitliyin və inkişafın əsas dayaqlarından birinə çevrilib.
Mövzu ilə bağlı AZƏRTAC-a açıqlama verən Türkiyənin tanınmış hərbi eksperti Abdullah Ağar bildirib ki, Zəfər Gününün 5-ci ildönümü təkcə Azərbaycanın deyil, bütün Türk dünyasının qürur günüdür.
“O günləri yaşayan və yaxından izləyən hər kəs çox yaxşı bilir ki, bu müharibə təkcə bir hərbi əməliyyat deyildi, həm dövlətin, həm ordunun, həm də xalqın ən ağır sınaqdan keçdiyi bir dövr idi”, – deyə ekspert vurğulayıb.
Abdullah Ağarın sözlərinə görə, Azərbaycan Ordusunun peşəkarlığı, xalqın fədakarlığı və dövlət rəhbərliyinin strateji uzaqgörənliyi bu qələbənin əsas amilləridir. Türkiyə bu çətin zamanda bütün imkanları ilə Azərbaycanın yanında yer aldı və bu birliyə dayanan əməkdaşlıq sayəsində bölgənin siyasi və hərbi xəritəsi dəyişdi. İkinci Qarabağ müharibəsi, “qazanılması mümkün olmayan” deyilən bir mübarizənin qardaşlıqla qazanıldığını göstərən tarixi bir hadisədir.
Türkiyəli ekspert qeyd edib ki, bu müharibə Azərbaycan üçün təkcə torpaqların azadlığı deyil, həm də milli kimliyin, dövlətçiliyin və ordunun əsl mənada formalaşması demək idi: “Birinci Qarabağ müharibəsində Azərbaycan cəmiyyəti, ordusu ağır zərbələr alsa da, İkinci Qarabağ müharibəsində bu zədələri üzərindən qaldırdı və yenidən ayağa qalxmaq və dövlət kimi gücünü sübut etmək imkanı yaratdı”.
Abdullah Ağar həmçinin diqqətə çatdırıb ki, müharibədən sonra Azərbaycan-Türkiyə əməkdaşlığı yeni strateji mərhələyə qədəm qoyub: “Bu gün bölgənin gələcəyi, yeni təhlükəsizlik arxitekturası məhz Azərbaycan-Türkiyə ittifaqı üzərində formalaşır. Bu əməkdaşlıq Türk Dövlətləri Təşkilatının əsas dayağıdır və gələcəkdə Orta Asiya ilə Cənubi Qafqaz arasında strateji körpü rolunu oynayacaq. Yeni dünya düzənində geosiyasi mübarizənin mərkəzində Azərbaycan-Türkiyə ittifaqı dayanır. Bu ittifaq yalnız hərbi və siyasi baxımdan deyil, həm də mənəvi və mədəni dəyərlər baxımından regionun sabitliyinin təminatıdır”.
Ekspert sonda vurğulayıb ki, İkinci Qarabağ müharibəsi həm də bütün bəşəriyyət üçün ədalət, haqq və azadlıq uğrunda mübarizənin simvoludur: “Bu Zəfər bir daha göstərdi ki, heç kim sizə azadlıq və müstəqillik bəxş etmir, onu öz iradəniz, ağlınız və gücünüzlə qazanırsınız. Azərbaycan bunu etdi. Bu, tarixdə dövlətin, ordunun və xalqın birliyinin nələrə qadir olduğunun parlaq nümunəsidir”.
Bölmənin digər xəbərləri
