Azərbaycan-Türkiyə-Pakistan birliyi dünya üçün sülh və sabitlik vəd edir - ŞƏRH
Bakı, 12 noyabr, AZƏRTAC
XXI əsrin beynəlxalq münasibətlər sistemində xalqlar arasında səmimi dostluq, qarşılıqlı hörmət və ortaq dəyərlərə əsaslanan əməkdaşlıq xüsusi əhəmiyyət kəsb edir. Bu baxımdan Azərbaycan, Türkiyə və Pakistan arasındakı münasibətlər nümunəvi xarakter daşıyır. Bu üç dövlət təkcə siyasi maraqlarla deyil, həm də ortaq tarix, mədəniyyət, din və mənəvi dəyərlərlə birləşir. Onların dostluğu və qardaşlığı regional sabitliyin və inkişafın mühüm dayaqlarından biridir. Bu yeni birlik formatı dünya üçün də sülh və sabitlik vəd edir.
Bunu AZƏRTAC-a açıqlamasında siyasi şərhçi Mübariz Göyüşlü bildirib.
O deyib ki, 1991-ci ildə Azərbaycanın dövlət müstəqilliyi bərpa edildikdən dərhal sonra Pakistan Azərbaycanın müstəqilliyini tanıyan ilk ölkələrdən biri olub. Türkiyə isə Azərbaycanın müstəqilliyini tanıyan birinci dövlət kimi tarixə düşüb. “Azərbaycan, Türkiyə və Pakistan arasında siyasi əlaqələr qarşılıqlı etimad və dəstək üzərində qurulub. Hər üç ölkə beynəlxalq təşkilatlarda – BMT, İslam Əməkdaşlıq Təşkilatı, İqtisadi Əməkdaşlıq Təşkilatı və digər platformalarda bir-birini daim dəstəkləyir. Terrordan, işğaldan, münaqişə və müharibədən əziyyət çəkən qardaş ölkələrin beynəlxalq tribunalarda bir-birinə qarşılıqlı dəstək verməsi çox mühüm amildir. Türkiyənin PKK terroru ilə mübarizə, Azərbaycanın işğal altındakı torpaqların azad edilməsi, Pakistanın isə Kəşmir probleminin həlli istiqamətində çalışmalarında üç qardaş ölkənin bir-birinə dəstəyi əvəzedilməzdir”, - deyə siyasi şərhçi vurğulayıb.
Mübariz Göyüşlü xatırladıb ki, Ermənistan-Azərbaycan münaqişəsi zamanı, xüsusilə 2020-ci il Vətən müharibəsində Türkiyə və Pakistan Azərbaycanın ədalətli mövqeyini birmənalı şəkildə dəstəkləyib: “Türkiyə Azərbaycan torpaqlarının işğalına görə Ermənistanla sərhədi bağlayıb, onunla diplomatik münasibətlər qurmayıb. Türkiyə hərbi, siyasi və diplomatik sahədə Azərbaycana qardaşlıq dəstəyi göstərib. Pakistan isə Ermənistanı bugünə qədər tanımayan müsəlman dövlətdir. Bu üç ölkə arasında yaranan birlik formulu xalqların qəlbində dərin mənəvi anlam daşıyır”.
Siyasi şərhçi qeyd edib ki, Azərbaycan, Türkiyə və Pakistan arasında iqtisadi əlaqələr də getdikcə genişlənir. Enerji, nəqliyyat, texnologiya və kənd təsərrüfatı sahələrində əməkdaşlıq üçün geniş imkanlar mövcuddur. Eyni zamanda, “Üçtərəfli əməkdaşlıq formatı” çərçivəsində müdafiə sənayesi, hərbi təlimlər və təhlükəsizlik sahəsində də ortaq layihələr həyata keçirilir: “2021-ci ildə Bakı şəhərində keçirilən Azərbaycan–Türkiyə–Pakistan üçtərəfli parlament görüşü bu dostluğun siyasi baxımdan rəsmi və davamlı xarakter aldığını göstərdi. Hərbi sahədə “Üç Qardaş 2021” adlı birgə təlimlər regionda sülhün və birliyin rəmzinə çevrildi”.
Üç qardaş ölkə arasında mədəni əməkdaşlığın da diqqətəlayiq olduğunu bildirən Mübariz Göyüşlü vurğulayıb ki, gənclər, təhsil, incəsənət və turizm sahələrində birgə layihələr xalqlar arasında qarşılıqlı anlaşmanı möhkəmləndirir. Universitetlər arasında tələbə mübadiləsi, birgə konfranslar və mədəni festivallar bu münasibətlərin sosial əsasını formalaşdırır.
Mübariz Göyüşlü hesab edir ki, Azərbaycan, Türkiyə və Pakistan dostluğu zamanın sınaqlarından çıxmış, sarsılmaz qardaşlıq bağlarına əsaslanan bir ittifaqdır. Bu əlaqələr yalnız regional sabitliyin deyil, həm də müsəlman dünyasında birliyin və həmrəyliyin rəmzidir. Gələcəkdə bu əməkdaşlığın daha da genişlənməsi - iqtisadi, elmi, humanitar və müdafiə sahələrində yeni bir mərhələyə qədəm qoyması gözlənilir. “Bakı şəhərində keçirilən Hərbi paradda Türkiyə və Pakistan hərbiçilərinin iştirakı qürurverici idi. Azərbaycanla Türkiyə arasında hərbi əməkdaşlıq artıq illərdir gerçəkləşdirilir. Pakistanın da bu platformada aktivliyi bu birliyi, hərbi formatı daha da gücləndirəcək. Pakistan hərbiçiləri ilk dəfə idi ki, Bakıda keçirilən Hərbi paradda qardaş Azərbaycan və Türkiyə hərbçiləri ilə çiyin-çiyinə iştirak edirdilər. Azərbaycanın Türkiyə və Pakistan kimi güclü dövlətlərlə əməkdaşlığı, müttəfiqliyi, qardaşlıq əlaqələri Cənubi Qafqaza sülh, dünyaya sabitlik və əmin-amanlıq gətirəcək. Paradda Prezident İlham Əliyevin, Prezident Rəcəb Tayyib Ərdoğanın, Baş nazir Məhəmməd Şahbaz Şərifin çıxışları, toxunduqları məsələlər dünyanın diqqət mərkəzindədir. Hər üç liderin qətiyyətli və uzaqgörən siyasəti gələcəkdə bu əlaqələrin daha da genişlənməsi, güclənməsi ilə nəticələnəcək. Bu qardaşlıq üçlüyü göstərir ki, birlikdə güclüyük, birlikdə qalibik”, - deyə o diqqətə çatdırıb.
Bölmənin digər xəbərləri
