Azərbaycan-Türkiyə-Pakistan birliyi qlobal əməkdaşlığa və təhlükəsizliyə töhfələr verir ŞƏRH
Bakı, 31 may, AZƏRTAC
Dünya nizamı özünün çətin dövrünü yaşamaqda davam edir. Güclü ölkələr zəiflər üzərində hökmranlığını həyata keçirməyə çalışır. O cümlədən birlikdə böyük güc kimi çıxış edən bloklar arasında da fikir ayrılıqları dərinləşir. Məsələn, ABŞ Prezidenti Donald Trampın hakimiyyətə gəlməsindən sonra tətbiq olunmağa başlayan rüsum siyasəti, NATO-nun maliyyələşdirilməsi üçün iştirakçı ölkələrə ÜDM-in 5 faizini müdafiəyə ayrılmalı olduğu ilə bağlı səsləndirilən fikirlər dünya təhlükəsizlik sistemində də qırılmaların başlandığını göstərir. Belə çətin bir dünya nizamında Azərbaycan, Türkiyə, Pakistan qardaşlığı və birliyi vahid siyasi, iqtisadi və hərbi güc kimi yeni reallıq yaradır.
Bu sözləri AZƏRTAC-a açıqlamasında Milli Məclisin deputatı Azər Badamov söyləyib.
O bildirib ki, Azərbaycan uzun illərdir davam edən münaqişədə öz gücü ilə qalib gələrək ədaləti bərpa edib: "Məsələn, Azərbaycan 44 günlük Vətən müharibəsində ərazilərində 30 illik erməni işğalına son qoydu və 2023-cü il sentyabrın 19-20-də keçirilən antiterror tədbirləri ilə öz ərazilərinin suverenliyini tam şəkildə bərpa etdi. Həmçinin Türkiyə də uzun sürən terrorçuluğa qarşı mübarizədə qalib gəldi. Pakistan da may ayının əvvəlində məruz qaldığı Hindistanın hücumunda qalib çıxdığını bəyan etdi. Beləliklə, bu gün üç qalib ölkə bir yerdədir və qardaşlığını, əməkdaşlığını dərinləşdirir. Bu mübarizədə ölkələrimizin bir-birinin yanında olması qələbələrin əldə edilməsində böyük əhəmiyyət kəsb edir. Çünki birliyimiz bizi çoxlu beynəlxalq təzyiqlərdən qoruyur və pozulmuş hüquqlarımızı inamla bərpa etməyimizə yol açır.
Deputatın sözlərinə görə, Azərbaycan, Türkiyə, Pakistan çətin və sevincli günlərində hər zaman bir yerdədir: "28 May - Azərbaycanın Müstəqillik Gününü bizimlə bir yerdə qeyd etmək üçün Türkiyə və Pakistan liderlərinin Laçına gəlməsi və bir yerdə dünyaya mesajların verilməsi sarsılmaz birliyimizin təsdiqidir. Mayın 28-də Laçında keçirilən Azərbaycan, Türkiyə və Pakistan dövlət başçılarının ikinci Zirvə görüşü və Müstəqillik Gününə həsr olunmuş tədbirlərdə iştirakı tarixi və rəmzi xarakter daşımaqla strateji əhəmiyyətə malik hadisədir. Biz üç qardaş ölkə bir yerdə daha güclü oluruq. Ölkələrimiz 360 milyona yaxın əhali və 1,7 trilyon dollardan çox ÜDM ilə böyük qlobal gücdür. Türkiyənin müdafiə sənayesi yüksək inkişaf edib. Türkiyə ordusu dünya orduları sırasında 9-cu yerdədir. O cümlədən Pakistan ordusu da 12-ci yerdə qərarlaşmaqla dünyanın ən güclü ordularından biri və nüvə ölkəsidir. Bizim bir-birimizə verdiyimiz mənəvi və siyasi dəstəyimiz haqq işimizi inamla həyata keçirməyimizə yol açır. Vətən müharibəsi zamanı Türkiyə və Pakistan güclü dəstəklə yanımızda olduğunu bəyan etdi. Hindistan-Pakistan münaqişəsi zamanı da Azərbaycanla Türkiyə eyni mövqedən çıxış etdi. Bizim bir yerdə olmağımız gücümüzü artırır, ölkələrimizin hərtərəfli əməkdaşlığını genişləndirir. Laçında keçirilən bayram tədbirində hər üç ölkənin milli musiqilərinin səsləndirilməsi həm də mədəniyyət sahəsində bir olduğumuzun nümayişdir. Prezident Ərdoğanın "üç millət bir dövlət", Baş nazir Şahbaz Şərifin "bir qəlbin üç ruhu" fikirlərinin arxasında böyük mənalar dayanır. Türkiyə Prezidentinin Laçında Səməd Vurğunun şeirini oxuyaraq "El bilir ki, sən mənimsən" deməsi də dünyaya bir mesajdır", - deyə A.Badamov vurğulayıb.
O bildirib ki, ölkələrimiz arasında keçirilən Zirvə görüşləri qlobal nizamda yeni reallıqların formalaşmasına töhfə verir. Azərbaycan, Türkiyə və Pakistan arasında formalaşan bu üçtərəfli modelin perspektivləri olduqca genişdir. Strateji əməkdaşlığımız bütün sahələri əhatə edir və davamlı inkişaf üçün möhkəm təməl yaradır. Bu dostluq və birliyin möhkəmlənməsində ölkə liderlərinin rolu xüsusi vurğulanmalıdır. Hər üç dövlətin başçıları həm öz ölkələrində, həm də beynəlxalq aləmdə söz sahibi olan nüfuzlu liderlərdir. Bizim birliyimiz təkcə ölkələrimiz arasında əməkdaşlığın dərinləşməsinə deyil, eyni zamanda, regional və qlobal təhlükəsizliyin təmininə, eləcə də iqtisadi əlaqələrin möhkəmlənməsinə ciddi töhfə verir. Liderlərimiz beynəlxalq münaqişələrin diplomatik yolla həllinə və dialoqun təşviqinə daim səy göstərirlər. Məsələn, Rusiya-Ukrayna müharibəsinin nizamlanması üçün danışıqların aparılması məqsədilə İstanbulun seçilməsi bu yanaşmanın bariz nümunəsidir. Bu fakt bir daha sülh və əməkdaşlıq niyyətimizin göstəricisidir.
Azərbaycan və Türkiyənin təşəbbüsü ilə yaradılan beynəlxalq nəqliyyat dəhlizləri Asiya ilə Avropa arasında yükdaşımalarda mühüm rol oynamaqda davam edir. Pakistan da öz növbəsində, qonşu dövlətlərin açıq dənizlərə çıxışını və daşımaların həyata keçirilməsini fəal şəkildə dəstəkləyir.
Azərbaycan-Türkiyə-Pakistan qardaşlığı və birliyi qlobal əməkdaşlığa və təhlükəsizliyə töhfələr verir.
Bölmənin digər xəbərləri
