Azərbaycan və Türkiyənin qardaşlıq münasibətləri təhsil sahəsində də öz bəhrəsini verəcək
Bakı, 20 aprel, AZƏRTAC
Prezident İlham Əliyev və Türkiyə Prezidenti Rəcəb Tayyib Ərdoğanın timsalında dövlətlərimiz arasında olan münasibətlər bütün parametrlər üzrə ən yüksək səviyyədə qurulub. İki dost, qardaş ölkə arasındakı bu münasibətlər qədər yaxın, doğma və etibarlı münasibətlər sistemi quran dünyada ikinci dövlət yoxdur. Bu, həm xalqlarımızın milli köklərinə əsaslanmaqla yanaşı, həm də iki dost-qardaş xalqın bir-birinə olan etimadından və etibarından qaynaqlanır. Dövlətlərarası münasibətlərdə, təbii ki, elm, təhsil sahəsində qarşılıqlı əməkdaşlıq münasibətləri qırmızı xətlə keçir.
Bu fikirləri AZƏRTAC-a açıqlamasında Qeyri-Hökumət Təşkilatlarına Dövlət Dəstəyi Agentliyinin Müşahidə Şurasının üzvü, Azərbaycan Gənc Alim, Doktorant və Magistrlər Cəmiyyətinin sədri İlqar Orucov söyləyib. İki ölkə arasında əlaqələr xüsusilə Rəcəb Tayyib Ərdoğanın Türkiyədə siyasi rəhbərliyə gəlişindən sonra yeni müstəvidə inkişaf etməyə başlayıb. O deyib ki, bu münasibətlər nümunəvi və alternativi olmayan səviyyədə inkişaf edib.
Burada ali təhsil, peşə təhsili, eyni zamanda, orta ümumtəhsil istiqamətindəki münasibətlər qeyd edilməlidir. Azərbaycan universitetləri ilə Türkiyə universitetləri arasında çox sıx, isti və eyni zamanda, qarşılıqlı inkişafa söykənən münasibətlər mövcuddur. Bu münasibətlər birgə təhsilin keyfiyyətinin yüksəldilməsinə yönəlib. Bu, ikili diplom proqramlarının işlənməsini, universitetlərarası qarşılıqlı tədqiqat mühitinin formalaşmasını özündə hədəfləyir.
Azərbaycan-Türkiyə birgə universitetinin yaradılması ali təhsil sahəsindəki əməkdaşlığın həm də əməli nəticəsi kimi dəyərləndirilə bilər. Türkiyənin qabaqcıl universitetləri olan və Azərbaycanda ehtiyac duyulan ixtisaslar üzrə tədrisin aparılması məhz Azərbaycan-Türkiyə birgə universitetində həyata keçiriləcək.
Azərbaycan ali təhsil müəssisələri ilə Türkiyənin müxtəlif ali təhsil müəssisələri arasında memorandumlar imzalanıb, qarşılıqlı mübadilə proqramları, birgə tədris proqramları həyata keçirilir. Kadrların peşəkarlığının, ali təhsil müəssisələrində çalışan müəllim pedaqoji heyətin peşəkar inkişafına hədəflənmiş müxtəlif tədbirlər, mübadilə proqramları həyata keçirilir. Azərbaycan ali təhsil müəssisələrinin alimləri Türkiyədə təcrübə mübadiləsində iştirak edirlər. Birgə tədqiqatlar həyata keçirilir.
“Bu münasibətlər təkcə ali təhsil müəssisələri arasındakı əməkdaşlıqla yekunlaşmır. Eyni zamanda, Türkiyənin ali təhsil müəssisələrindən, elmi-tədqiqat mərkəzlərindən, həm də Azərbaycan Milli Elmlər Akademiyasının və onun elmi-tədqiqat institutları arasındakı münasibətləri əhatə edir.
Azərbaycandan bu gün həm dövlət proqramı ilə, həm Türkiyə Milli Təhsil Nazirliyinin proqramı çərçivəsində Türkiyə bursu ilə təhsil alan, eyni zamanda, Türkiyədə təhsil almaq istəyində olan və öz hesabına təhsil alan, ayrı-ayrı dövlətlərarası mübadilə proqramı çərçivəsində təhsil alan kifayət qədər tələbələrimiz var. Bu tələbə mübadiləsi təkcə Azərbaycandan Türkiyəyə tələbələrin gedib təhsil alması ilə yekunlaşmır. Türkiyədən xeyli sayda tələbə məhz Azərbaycan universitetlərində təhsil alır.
Türkiyə Milli Təhsil Nazirliyinin dəstəyi ilə Azərbaycanda iki yeni peşə təhsili müəssisəsinin təsis edilməsi ilə bağlı razılıq əldə olunub. Bu, Türkiyə dövlətinin peşə təhsili istiqamətində təcrübəsinin Azərbaycanda tətbiqidir. Bu işlər Türkiyə təcrübəsinin Azərbaycanda peşə təhsili sahəsində həyata keçirilməsini şərtləndirəcək. Peşə təhsili proqramının təminatı baxımından da peşə təhsili müəssisələri Türkiyə təcrübəsini mənimsəyərək Azərbaycanda tətbiq etməklə peşə təhsilli kadrların hazırlığında mühüm rol oynayacaq.
Türkiyənin Azərbaycanda orta təhsil müəssisələri uğurla fəaliyyət göstərir. Onlar Türkiyənin qabaqcıl təhsil ənənələrinin Azərbaycanın orta ümumtəhsil müəssisələrində öyrənilməsi baxımından olduqca faydalıdır.
Hər iki ölkənin təhsil münasibətlərinin inkişafında perspektivləri kifayət qədər genişdir. Bu münasibətlərin təməli sıx qardaşlıq, dostluq əsasında qoyulub və olduqca güclü təməldir.
Texnoloji innovasiyalar sahəsində əməkdaşlıq çox sürətlə inkişaf etməkdədir. Yeni texnologiyaların istehsalı, bu istiqamətdə müxtəlif birgə proqramların işlənməsi həm də elm və təhsil sahəsindəki əməkdaşlığa dayanır. Dünyada analoqu olmayan Azərbaycan və Türkiyə dövlətlərinin qardaşlıq, birlik münasibətləri, təhsil sahəsində mütləq şəkildə öz bəhrəsini verəcək”, - deyə İlqar Orucov fikrini yekunlaşdırıb.
Bölmənin digər xəbərləri
