Azərbaycan vəkilləri İngiltərədə “Hüquq İli”nin rəsmi açılışında iştirak ediblər
Bakı, 3 oktyabr, AZƏRTAC
Azərbaycan Respublikasının Vəkillər Kollegiyasının (ARVK) sədri Anar Bağırovun rəhbərlik etdiyi nümayəndə heyəti İngiltərə və Uels Hüquq Cəmiyyəti (İUHC) ilə İngiltərə və Uels Vəkillər Kollegiyasının (İUVK) birgə dəvəti ilə “Hüquq İli”nin açılış mərasimində iştirak etmək üçün London şəhərində səfərdə olub.
Vəkillər Kollegiyasından AZƏRTAC-a verilən məlumata görə, səfərdə ARVK-nın sədri Anar Bağırovla yanaşı, Kollegiyanın Rəyasət Heyətinin üzvü Elçin Usub da iştirak edib.
Tədbirin gündəliyinə uyğun olaraq Vəkillər Kollegiyaları rəhbərləri müzakirələr aparıb. Məqsəd müasir və daim inkişaf edən hüquq sahəsində vəkillik peşəsinin müstəqilliyini təmin etmək və qorumaq, beynəlxalq və yerli hüquqda hüquq peşəsinin müstəqilliyini daha da gücləndirməkdir.
Tədbir çərçivəsində Vestminster abbatlığına səfər olub, habelə Lord-kansler tərəfindən Parlament Evində rəsmi qəbul təşkil edilib.
Qeyd edək ki, “Hüquq İli”nin açılış mərasimində İUVK-nın prezidenti Nick Vineall, İUHC-nin prezidenti Lubna Shuja, Avropa Vəkillər Kollegiyası və Hüquq Cəmiyyətləri Şurasının (CCBE) prezidenti Panagiotis Perakis, dünyanın müxtəlif ölkələrindən vəkillər kollegiyaları, hüquq cəmiyyətlərinin rəhbərləri, habelə dövlət rəsmiləri və vətəndaş cəmiyyətinin nümayəndələri iştirak ediblər.
Gələcək əməkdaşlığın gücləndirilməsi məqsədilə ARVK-nın sədri Anar Bağırovla beynəlxalq təşkilatların və bir sıra ölkələrin vəkillər kollegiyalarının rəhbərləri arasında ikitərəfli görüşlər keçirilib, təcrübə mübadiləsi, habelə İUHC və İUVK çərçivəsində gələcək əməkdaşlığın perspektivləri barədə müzakirələr aparılıb.
Daha sonra tədbir iştirakçıları üçün rəsmi ziyafət təşkil edilib.
Qeyd edək ki, 2019-cu ildə ARVK ilə İUHC arasında əldə olunmuş razılığa əsasən, artıq ARVK üzvləri - vəkillər Böyük Britaniyada vəkilliyə qəbul üzrə müvafiq imtahanı verməklə orada vəkilliyə qəbul oluna və İngiltərə və Uels ərazisində vəkillik fəaliyyəti ilə məşğul ola bilər.
Bölmənin digər xəbərləri
