Azərbaycan voleybol klubunun məşqçisi: Rumıniyaya tarix yazmağa gəlmişik
Bakı, 12 noyabr, AZƏRTAC
Ümid edirik ki, səfərdən qələbə xəbəri ilə dönəcəyik.
Bu sözləri AZƏRTAC-a açıqlamasında bu gün Çelenc Kubokunda mübarizəyə başlayacaq kişi voleybolçulardan ibarət “Xilasedici” klubunun məşqçisi Vadim Kutukov deyib.
O, Bakı təmsilçisinin turnirin 1/32 final mərhələsində Rumıniyanın tanınmış “Styaua” komandası ilə oyunda şanslarını dəyərləndirib: “Bu, bizim ilk beynəlxalq səfərimizdir. Bu gün qarşılaşacağımız “Styaua” Rumıniya voleybolunun ən köklü və güclü klublarından biridir. Onlar bu mövsüm çox ciddi transferlər həyata keçiriblər və heyətlərini xeyli gücləndiriblər. Buna baxmayaraq, biz hər bir sınağa hazırıq. Əsas məqsədimiz maksimum nəticə göstərmək və səfərdən Bakıya qələbə ilə qayıtmaqdır”.
Mütəxəssis Rumıniyada tarix yazmaq istədiklərini deyib: “Biz buraya sadəcə oyuna çıxmaq üçün yox, tarix yazmaq üçün gəlmişik. Komanda üzvlərimiz və məşqçi heyətimiz uzun müddətdir bu oyun üçün planlı şəkildə çalışır. Fiziki və psixoloji baxımdan yaxşı hazırlaşmışıq. “Styaua” kimi təcrübəli rəqiblə qarşılaşmaq bizim üçün həm böyük məsuliyyət, həm də təcrübədir. İnanıram ki, komanda ruhu və inam sayəsində meydanda bacarığımızı göstərəcəyik”.
Bölmənin digər xəbərləri
