Azərbaycan xalqının gücünü özündə cəmləşdirən “Dəmir yumruq” bundan sonra əmrə hazır vəziyyətdə olacaq
Bakı, 28 sentyabr, AZƏRTAC
Düz bir il əvvəl Müzəffər Ali Baş Komandan İlham Əliyev erməni təcavüzü nəticəsində otuz ilə yaxın işğal altında olan torpaqlarımızı mənfur düşməndən azad etmək üçün haqq və ədalət naminə Azərbaycanın şanlı Milli Ordusuna “İrəli” əmri verdi. Bununla da bütün Azərbaycan xalqını səfərbər edən Vətən müharibəsi başladı. XXI əsrin ən modern hərbi texnikası ilə təchiz edilmiş, yüksək əhval-ruhiyyəli Milli Ordumuz 44 gün ərzində düşmənə nəfəs belə almağa imkan vermədi. Əslində, qəhrəman Ordumuz və əziz xalqımız bu müharibəni çoxdan gözləyirmiş kimi qarşıladı. Çünki xalqda münaqişənin sülh danışıqları ilə həll olunacağı ümidi itmiş və səbrin son sərhədləri idi. Ölkəmizdə əli silah tutan hər kəs ərazi-bütövlüyümüz uğrunda mübarizə və müharibəyə hazır idi və Ali Baş Komandanın əmrini gözləyirdi. Çünki xalqımıza bəlli idi ki, Ali Baş Komandan nəyin necə və nə zaman edəcəyini çox gözəl bilir. Ötən dövr ərzində Prezident İlham Əliyevin fəaliyyətinə nəzər salsaq bunun bir daha şahidi olarıq. Sözsüz ki, XXI əsrin üçüncü onilliyində dünyada misli görünməmiş bir savaş nümayiş etdirmiş Azərbaycan xalqının 44 günlük Vətən müharibəsi nəinki buğun hətta gələcəkdə də ciddi təhlil olunacaq, öyrəniləcək və hərb elmində tətbiq ediləcək. Tariximizdə heç vaxt itirilmiş torpaqlarımızın nə vaxtsa geri qaytarılması olmayıb. Bu mənada tarixin ötən səhifələrinə nəzər salsaq Vətən müharibəsində qazanılan Qələbənin nə qədər misilsiz olduğunu bir daha təsdiq edərik.
Bu fikirləri AZƏRTAC-a açıqlamasında Milli Məclisin deputatı Məlahət İbrahimqızı deyib.
O qeyd edib ki, XIX əsrin əvvəllərindən bu günə qədər müxtəlif səbəblərə görə Azərbaycan torpaqları sürətlə bölgədə gedən geosiyasi proseslərin qurbanı olub. Tarixi Kürəkçay, Gülüstan və Türkmənçay müqaviləsindən sonra ərazilərimizin etnik tərkibinin ədalətsiz və haqsız olaraq sürətlə dəyişdirilməsi və əzəli və əbədi dədə-baba yurdlarından azərbaycanlıların müxtəlif bəhanələrlə deportasiya edilməsi siyasəti həyata keçirilib. Təbii ki, tarixin bu haqsızlıqları gələcəkdə də dərindən araşdırılaraq tədqiq ediləcək və tərəqqipərvər ictimaiyyətə çatdırılacaq.
“Məhz dünən dünya azərbaycanlılarının böyük qürurla qeyd etdiyi 27 Sentyabr - Anım Günündə Müzəffər Ali Baş Komandan, Prezident İlham Əliyev xalqa müraciətində bir daha şəhidlərimizin ruhuna sonsuz minnətdarlıq və ehtiramını bildirdi. Onların göstərmiş olduğu rəşadəti və şücaəti xalqımızın əbədi olaraq ürəyində yaşayacağını söylədi. Bu müraciət, həm də 44 günlük Vətən müharibəsinin siyasi, tarixi, hərbi, hüquqi, haqq-ədalət, humanizm aspektlərindən dərindən təhlili idi. Bununla bərabər bu müraciətdə həm xalqımız, həm də bölgə və dünya üçün çox ciddi mesajlar səsləndirildi. Bu çağırışların əksəriyyəti təcavüzkar və qondarma Ermənistan dövlətinə, onu idarə edənlərə, erməni faşizmini təbliğ edən və əsrlərdir ki, öz xalqının beynini zəhərləyən erməni “liderlər”inə və erməni diaspora təşkilatlarına ünvanlanırdı. Bu çağırışlar həm də revanşist qüvvələrə və onların havadarlarına çox ciddi xəbərdarlıq idi. Əslində, Prezident İlham Əliyev işğal altındakı torpaqlarımızın azad olunmasında apardığı sülh danışıqlarında da hər dəfə bu mesajları çatdırıb. Görünür, onlar və dəstəkçiləri Azərbaycan xalqının, onun dövlətinin, Milli Ordusunun və əzmkar, qətiyyətli, uzaqgörən, müdrik Liderinin gücünü və Vətən sevgisini yetərincə dəyərləndirə bilməyiblər. Müharibəni izləyən hər kəs də şahid oldu ki, müharibənin ilk günlərindən təcavüzkar qonşumuz və onun cinayətkar ordusu iflic vəziyyətə düşdü. Onlar nəinki erməni ordusunu, hətta dövlətlərini, xalqı idarə bilmirdilər. Bu isə müharibənin ilk günündən mənfur düşmənimiz olan Ermənistanda geridönməz bir xaos yaratdı. Əksinə ölkəmizdə xalqımızın Milli Ordusu və öz Lideri ilə həmrəylik və birlik göstərməsi, Müzəffər Ali Baş Komandanın davamlı olaraq xalqa müraciətləri nəinki savaş meydanındakı əsgər və zabitə ruh yüksəkliyi verirdi, onun qələbəyə inamını daha da artırırdı. Düşmənlərimizi lərzəyə salan bu müraciətlər Azərbaycan xalqını günün 24 saatı ərzində müsəlləh əsgər kimi, əmrə hazır vəziyyətdə olmağa çağırırdı. Bu gün dünyanın ayrı-ayrı ölkələrində bu müharibə təhlil edilir və hərb elmində ən yüksək təcrübə kimi tədris edilməsi nəzərdə tutulur. Lakin bu müharibədə əldə edilən qələbənin ən əsas, həlledici şərtlərindən biri Ali Baş Komandan başda olmaqla sıravi əsgərə və vətəndaşa qədər hamının Vətən torpağının hər qarışı uğrunda şəhid olmağı şərəf bilməsi idi. Mənfur düşmənimiz, işğalçı Ermənistan və onu dəstəkləyən qüvvə və təşkilatlar, şüurları zəhərlənmiş erməni xalqı anlamalı və bu müharibədən tarixi dərs çıxarmalıdır. Onlar dərk etməlidirlər ki, Azərbaycan xalqının gücünü özündə cəmləşdirən “Dəmir yumruq” bundan sonra hər zaman əmrə hazır vəziyyətdə olacaq”, - deyə Milli Məclisin deputatı vurğulayıb.
Onun sözlərinə görə, ölkəmizin bu Qələbəsi bir mənalı olaraq bölgədə yeni reallıqlar yaratdı və bu gün Azərbaycan və onun məğlubedilməz Lideri əsas söz sahiblərindəndir. Hesab edirəm ki, bölgəmizdə hər hansı bir marağı olan dövlətlər, təşkilatlar və qüvvələr ən yaxın vaxtda yaranmış bu gerçəkliyi düzgün dəyərləndirməli və istəsə də, istəməsə də bununla barışmalı və konstruktiv təşəbbüs və təklifləri dəstəkləməlidir. Eyni zamanda, onlar xüsusən erməni xalqının faşist ideologiyalı “liderləri”, “ziyalıları”, “öndə gedənləri” nə qədər gec deyil Prezident İlham Əliyevin istər dünənki, istərsə də müharibə dövründəki müraciətlərini, münaqişə ilə bağlı BMT-dəki və beynəlxalq təşkilatlardakı çıxışlarını, bu günlərdə Rusiyanın milli müdafiə jurnalına, eləcə də qardaş Türkiyənin Anadolu Agentliyinə verdiyi müsahibələri diqqətlə oxumalı, dərindən təhlil etməli və düzgün nəticə çıxarmalıdır.
Bölmənin digər xəbərləri
