AZƏRBAYCAN YIĞMASI DOSTLUQ MATÇINDA MƏĞLUB OLMUŞDUR
Ankara, 2 iyun (AZƏRTAC). Kayseri şəhərindəki Kadir Has stadionunda 30 min tamaşaçının izlədiyi Türkiyə-Azərbaycan dostluq matçı 2:0 hesabı ilə meydan sahiblərinin xeyrinə başa çatmışdır. Bundan əvvəl milli komandaların arasında keçirilmiş dörd oyunun üçündə türklər qalib gəlmiş, bir matç heç-heçə nəticələnmişdi. Tribunalarda minlərlə tamaşaçının əllərində Türkiyənin və Azərbaycanın bayraqları vardı.
Oyunun hakimi, slovakiyalı Mario Vlkın fitindən sonra yığmamız matça başladı. Milli komandamızın müdafiədə inamlı oyun nümayiş etdirdiyi birinci hissədə ilk təhlükəli vəziyyət 14-cü dəqiqədə komandamızın qapısının önündə baş verdi. Tuncay Şanlının zərbəsindən sonra top qapı dirəyinə dəyərək meydandan çıxdı. 28-ci dəqiqədə isə qapıçımız Fərhad Vəliyev türklərin yarımmüdafiəçisi İbrahim Üzülməzin zərbəsini qaytara bildi. Birinci hissənin son dəqiqəsində müdafiəçimiz Rəşad Sadıxovun cərimə zərbəsindən vurduğu topu digər oyunçumuz Mahir Şükürov rəqibin qapısına yönəldə bilmədi.
İkinci hissə meydan sahiblərinin üstünlüyü ilə keçdi. Oyunun 51-ci dəqiqəsində Rəşad Sadıqov cərimə meydançasında rəqib komandanın hücumçusu Semihə qarşı kobudluq etdi və qırmızı kart alaraq oyundan çıxarıldı. Qapıçı Fərhad Vəliyev hakimin təyin etdiyi 11 metrlik cərimə zərbəsini dəf etsə də, komandamız oyunu 10 nəfərlə davam etdirməli oldu. Bundan sonra, 69-cu dəqiqədə Xəlil Altıntopun və 75-ci dəqiqədə İbrahim Üzülməzin qapımıza vurduğu qollarla Türkiyə milli komandası oyunu qalibiyyətlə başa vurdu.
Oqtay Bayramov
AZƏRTAC-ın xüsusi müxbiri
Ankara
Bölmənin digər xəbərləri
