AZƏRBAYCAN YIĞMASI QILINCOYNATMA ÜZRƏ BEYNƏLXALQ TURNİRDƏ DAHA BİR MEDAL QAZANMIŞDIR
Bakı, 25 may (AZƏRTAC). Bakı İdman Sarayında qılıncoynatma üzrə “Baku Fencing Open” turniri başa çatmışdır.
Turnirin sonuncu günü şpaqa üzrə yarışlar keçirilmişdir. Azərbaycan idmançıları arasında bu növdə fəxri kürsüyə Afiz Quliyev yüksəlmişdir. A.Quliyev yarımfinalda Qazaxıstan təmsilçisi Sergey Şabalinə uduzaraq bürünc medal əldə etmişdir.
Digər yarımfinal görüşündə isə Azərbaycan əsilli Estoniya idmançısı Kənan Yusifov Qırğızıstan təmsilçisi Sergey Kaçurinə uduzaraq üçüncü yeri tutmuşdur.
Final qarşılaşmasında Sergey Kaçurin Qazaxıstan idmançısı S.Şabalini məğlub edərək turnirin qalibi olmuşdur.
Qızların yarışında estoniyalı Erika Kimpu qızıl medal qazanmışdır. Oksana Xisamutdinova (Qazaxıstan) ikinci, Maya Quçmazova (Rusiya) və Cəmilə Yunusbayeva (Qazaxıstan) isə üçüncü yeri tutmuşlar.
Azərbaycan yığması “Baku Fencing Open” beynəlxalq turnirində ümumilikdə 7 medal qazanmışdır.
Yarışın birinci günü sablya üzrə qızların mübarizəsində Sabina Mikina qızıl, Aidə Ələsgərova gümüş, Sevil Bünyadova isə bürünc medala sahib olmuşdular.
Sablyaçı oğlanların mübarizəsində isə Ramin Əmirov hamıdan güclü olduğunu sübut edərək fəxri kürsünün ən yüksək pilləsinə qalxmışdır.
İdmançılarımız Azər Tağıyev gümüş, Cəlil Ələsgərov isə bürünc medal qazanmışdır.
######
 |
 |
 |
Bölmənin digər xəbərləri
