SİYASƏT
AZƏRBAYCANDA POÇT XİDMƏTİ YENİ QANUNLA TƏNZİMLƏNƏCƏKDİR
AZƏRTAC xəbər verir ki, Milli Məclisin İqtisadi siyasət daimi komissiyasının mayın 5-də keçirilmiş iclasında “Poçt rabitəsi haqqında” qanununun layihəsi müzakirə edilmişdir. Komissiyanın sədri Səttar Səfərov bildirmişdir ki, qanun Azərbaycan Respublikasında poçt rabitəsi sahəsində fəaliyyətin hüquqi, iqtisadi, təşkilati əsaslarını müəyyənləşdirir, poçt rabitəsi xidmətləri göstərənlərlə istifadəçilər arasında münasibətləri tənzimləyir.
Müzakirələrdə Milli Məclis sədrinin birinci müavini Arif Rəhimzadə, deputatlar, mütəxəssislər, ekspertlər çıxış edərək yeni qanunun qəbul edilməsinin zəruri olduğunu əsaslandırdılar. Həmin qanunda təsbit olunmuş nəzarət mexanizminin bu növ rabitə xidmətinin səviyyəsini yüksəltməyə zəmin yaratdığını bildirdilər.
Müzakirə zamanı qanun layihəsinin bəzi müddəaları ilə bağlı təklif və iradlar söylənildi. İşçi qrupu yaratmaq, konstruktiv təklifləri nəzərə almaqla, qanun layihəsini birinci oxunuşda Milli Məclisin müzakirəsinə çıxarmaq qərara alındı.