AZƏRBAYCANIN AKADEMİK AVARÇƏKƏNLƏRİ OLİMPİYA TƏSNİFAT TURNİRİNDƏ VƏ DÜNYA KUBOKU YARIŞINDA İŞTİRAK EDƏCƏKLƏR
Azərbaycanın akademik avarçəkmə üzrə yığma komandası iyunun 12-də Polşanın Poznan şəhərinə yola düşəcəkdir.
Azərbaycan Milli Avarçəkmə Federasiyasından AZƏRTAC-a bildirmişlər ki, yığmamız tarixində ilk dəfə olaraq Olimpiya Oyunlarına lisenziya xarakterli təsnifat turnirində və dünya kubokunun üçüncü mərhələ yarışında çıxış edəcəkdir.
Azərbaycanı yarışlarda baş məşqçi Samir Məmmədovun rəhbərliyi ilə Cavid Əfəndiyev, Fikrət Məmmədov, Kamal Məmmədov və Xəyal Zülfüqarovdan ibarət heyət təmsil edəcəkdir. İyunun 15-də start götürəcək Olimpiya təsnifat turnirində yalnız F.Məmmədov - K.Məmmədov dueti mübarizə aparacaqdır. Bu cütlük 2 nəfərlik qoşaavarlı qayıqlarda qüvvəsini sınayacaqdır. Pekin Olimpiadasına hər kateqoriyada ilk üçlüyə düşən avarçəkənlər lisenziya qazanacaqlar.
Bundan sonra Azərbaycan idmançıları Poznanda təşkil olunacaq dünya kubokunun üçüncü mərhələsinə qatılacaqlar. İyunun 20-də başlanacaq həmin yarışda isə bütün avarçəkənlərimizin iştirakı nəzərdə tutulmuşdur. Turnir üç gün davam edəcəkdir.
Bölmənin digər xəbərləri
