AZƏRBAYCANIN ALMANİYADAKI SƏFİRİ RAYNLAND PFALTS FEDERAL ƏYALƏTİNDƏ OLMUŞDUR
Raynland Pfalts federal əyaləti Baş naziri aparatının rəhbəri və dövlət katibi Martin Ştadelmayer ilə görüşdə bildirilmişdir ki, Bakı və Maynts, Sumqayıt və Ludviqshafen şəhərləri arasında uzun illərdən bəri tərəfdaşlıq münasibətlərinin olması Azərbaycan və Raynland Pfalts arasında əməkdaşlığın inkişafı üçün əsaslı zəmin yaradır. Danışıqlar zamanı Azərbaycan və Raynland Pfalts arasında hərtərəfli əməkdaşlığı intensivləşdirmək məqsədi ilə iqtisadiyyat, mədəniyyət, təhsil və elm sahələrində əməkdaşlığa dair saziş hazırlanması imkanları barədə fikir mübadiləsi aparıldı.
İqtisadiyyat, nəqliyyat, aqrar sənaye və üzümçülük təsərrüfatı nazirinin müavini Q.Eymauel və beynəlxalq iqtisadi əlaqələr, Mərkəzi və Şərqi Avropa dövlətləri ilə əməkdaşlıq idarəsinin rəhbəri Yohan Vaylerlə görüşdə Azərbaycan və Raynland Pfalts arasında iqtisadi əlaqələrin inkişaf etdirilməsi üçün geniş imkanlar və potensial olduğu bildirildi.
Görüşdə 2007-ci ildə Mayntsda keçiriləcək ənənəvi “Raynland Pfalts sərgisi”ndə Azərbaycanın da iştirak etməsi imkanları, eləcə də Raynland Pfaltsda aqrar sənaye, tikinti və turizm sahələrində fəaliyyət göstərən firmaların rəhbərlərinin azərbaycanlı həmkarları ilə konkret əməkdaşlıq məsələlərini müzakirə etmək məqsədi ilə Bakıya səfərinin təşkili məsələsi müzakirə olundu.
Maynts Qutenberq Universitetinin rektoru J.Proys ilə söhbətdə bu elm ocağında Azərbaycanşünaslıq ixtisasının təşkili və tədrisi imkanları barədə fikir mübadiləsi aparıldı. Görüşdə iştirak edən universitetin türkologiya bölməsinin rəhbəri professor H.Boeşoten, dilçilik fakültəsinin professoru Valter Bisang və beynəlxalq əməkdaşlıq şöbəsinin rəhbəri R.Henkel fon Klaus da məsələ ilə bağlı fikirlərini bölüşdülər.
Azərbaycan səfiri bildirdi ki, Bakı Dövlət Universiteti ilə Maynts Universiteti arasında əlaqələrin yaradılması, Raynland Pfalts ali məktəblərindən olan tələbələrin Bakıda şərqşünaslıq, Azərbaycan filologiyası və tarixi, Qafqazşünaslıq ixtisasları üzrə təhsil almaları üçün geniş imkanlar var.
Elm, ixtisasartırma, tədqiqat və mədəniyyət nazirinin müavini R.Hertel ilə söhbətdə Maynts Universitetində Azərbaycanşünaslıq ixtisasının tədrisi istiqamətində ilkin addım olaraq “Azərbaycanşünaslıq kafedrası” yaradılmasının vacibliyi vurğulandı, mədəniyyət və elm sahəsində əməkdaşlıq imkanları müzakirə edildi. Bakıda Raynland Pfalts elm və mədəniyyət günlərinin, Mayntsda isə Azərbaycan mədəniyyəti günlərinin keçirilməsi təklifi irəli sürüldü.
ZDF televiziya studiyasında görüşdə səfir Almaniya KİV-lərində Azərbaycanla bağlı yer alan materiallara tənqidi münasibət bildirdi. Televiziya kanalının beynəlxalq əlaqələr şöbəsinin müdiri Faylinq cari ilin payızında ZDF-nin təxminən 15 nəfərdən ibarət jurnalist və çəkiliş heyətinin regiona, o cümlədən Azərbaycana səfərə hazırlaşdıqlarını söylədi.
Maynts şəhər bələdiyyəsinin başçısı Y.Boytellə görüşdə təəssüflə qeyd edildi ki, Maynts və Bakı 1984-cü ildən tərəfdaş şəhərlər olsa da, bu tərəfdaşlığı təsdiqləyən sənəd indiyədək imzalanmayıbdır.
Lüdviqshafen şəhər bələdiyyəsinin rəhbəri xanım Lohse ilə görüşdə Sumqayıt Şəhər İcra Hakimiyyəti ilə birgə həyata keçirilən layihələrdən söhbət açıldı. 2007-ci ildə iki şəhər arasında tərəfdaşlığın 30 illik yubileyi münasibətilə qarşılıqlı səfərlərin təşkili və yubiley tədbirlərinin keçirilməsi məsələsi ətrafında fikir mübadiləsi aparıldı. Təklif olundu ki, yubiley münasibətilə hər iki şəhərdə alman və Azərbaycan xalqlarının tarixinə xüsusi xidmətləri ilə daxil olmuş görkəmli şəxsiyyətlərə abidə ucaldılsın.
Səfir Pərviz Şahbazov səfər proqramı çərçivəsində Raynland Pfaltsda yaşayan Azərbaycan və türk icmalarının üzvləri və burada təhsil alan soydaşlarımızla görüşmüşdür. Mayntsda fəaliyyət göstərən Azərbaycan mədəniyyət cəmiyyətinin sədri Başar Kömürün təşkil etdiyi görüşdə səfir ölkəmizin qüdrətli dövlətlər sırasına çıxması üçün əsası ulu öndərimiz Heydər Əliyev tərəfindən qoyulan uzaqgörən siyasəti Prezident İlham Əliyevin uğurla davam etdirdiyindən, dövlətçiliyimizin möhkəmlənməsi, respublikamızın beynəlxalq nüfuzunun yüksəlməsi işində diasporumuzun üzərinə düşən vəzifələrdən danışdı.
Bölmənin digər xəbərləri
