Azərbaycanın bütün sahələrdə qazandığı uğurlar Heydər Əliyevin adı ilə bağlıdır VİDEO
Madrid, 13 dekabr, AZƏRTAC
Dekabrın 12-də Azərbaycan Respublikasının İspaniya Krallığındakı səfirliyinin təşkilatçılığı ilə Madrid şəhərində ümummilli lider Heydər Əliyevin xatirəsinə həsr olunmuş anım tədbiri keçirilib.
AZƏRTAC xəbər verir ki, tədbirdə İspaniyada akkreditə olunmuş diplomatik nümayəndəliklərin rəhbərləri və nümayəndələri, ictimaiyyət üzvləri, yerli kütləvi informasiya vasitələrinin təmsilçiləri və İspaniyada yaşayan soydaşlarımız iştirak ediblər.
Tədbirdə çıxış edən Azərbaycanın İspaniyadakı səfiri Anar Məhərrəmov qeyd edib ki, müasir Azərbaycanın bütün sahələrdə qazandığı uğurlar, əldə etdiyi tərəqqi və inkişaf bilavasitə həyatının böyük hissəsini öz xalqına həsr etmiş Heydər Əliyevin adı ilə bağlıdır.
Səfir diqqətə çatdırıb ki, Azərbaycan 1991-ci ildə öz müstəqilliyini bərpa etdikdən sonra çətin vəziyyətlə üzləşmiş, 1991-1993-cü illərdə hakimiyyətdə hökm sürən böhran ölkəni vətəndaş müharibəsi vəziyyətinə çıxarmış, yaranmış vəziyyətdən sui-istifadə edən Ermənistan Azərbaycanı parçalamaq, onun müstəqilliyinə təhdid yaratmağa cəhd etmişdir. Ermənistanın Azərbaycana qarşı hərbi təcavüzü və xalqımıza qarşı etnik təmizləmə siyasəti nəticəsində Azərbaycan ərazisinin 20 faizi işğal edilib, 1 milyondan çox soydaşımız qaçqın və məcburi köçkün vəziyyətinə düşüb.
Xüsusi olaraq vurğulanıb ki, 1993-cü il iyun ayının 15-də Azərbaycan xalqının təkidli tələbi ilə Heydər Əliyev yenidən hakimiyyətə qayıdıb, məhz Ulu Öndərin müdrikliyi, zəngin siyasi və dövlətçilik təcrübəsi, sarsılmaz qətiyyəti sayəsində gənc, müstəqil respublika qaçılmaz fəlakətdən qurtulub, ölkənin daxili və xarici siyasətində stabillik bərqərar olunub, Ermənistan-Azərbaycan Dağlıq Qarabağ münaqişəsi üzrə atəşkəs əldə edilib, ölkə yeni inkişaf dövrünə qədəm qoyub. Azərbaycan xalqı Heydər Əliyev tərəfindən görülmüş işləri layiqincə qiymətləndirərək, onu xalqın Ümummilli Lideri kimi əbədiləşdirib. Ümummilli lider Heydər Əliyevin siyasi kursunun bu gün Prezident İlham Əliyev tərəfindən müvəffəqiyyətlə davam etdirildiyi və onun yürütdüyü uğurlu daxili və xarici siyasət nəticəsində Azərbaycanın regionda lider ölkəyə çevrildiyi qeyd edilib.
Türkiyənin İspaniyadakı səfiri Cihad Erginay tədbirdə çıxış edərək ümummilli lider Heydər Əliyevin uzaqgörənliyi və qətiyyəti sahəsində Azərbaycanda bütün sahələrdə hərtərəfli inkişafa nail olunduğunu bildirib. Səfir Heydər Əliyevin yalnız Azərbaycanın deyil, bütün türk dünyasının lideri olduğunu diqqətə çatdıraraq, Ümummilli Liderin Azərbaycan və Türkiyə arasında strateji tərəfdaşlıq və qardaşlıq əlaqələrinin qurulmasında müstəsna rolundan bəhs edib. Ulu Öndərin “Biz bir millət, iki dövlət” kəlamının Türkiyə-Azərbaycan dostluğunun, qardaşlığının əbədi və daimi olduğunu təcəssüm etdirdiyini bildirən səfir C.Erginay beynəlxalq təşkilatlar çərçivəsində ölkələrimizin vahid mövqedən çıxış etməsinin, habelə iki ölkənin təşəbbüsü və iştirakı ilə həyata keçirilən irimiqyaslı birgə layihələrin bu qardaşlığı daha da möhkəmləndirdiyini qeyd edib.
Tədbirin davamında ispan dilində, ümummilli lider Heydər Əliyevin həyat və fəaliyyətinə həsr edilmiş “Sonsuzluğa gedən yol” sənədli filmi, habelə Ulu Öndərin fəaliyyətinin mühüm tarixi anlarını əks etdirən fotokompozisiya nümayiş etdirilib, yaradılmış xüsusi guşədə dahi şəxsiyyətə həsr olunmuş kitab və bukletlərin təqdimatı keçirilib.
Nigar Cəfərli
AZƏRTAC-ın xüsusi müxbiri
Madrid
Bölmənin digər xəbərləri
