Azərbaycanın dinlərarası münasibətlərlə bağlı siyasəti bütün dünya liderləri tərəfindən təqdirlə qarşılanır
Bakı, 30 mart, AZƏRTAC
Xalqı keçmişindən və gələcəyindən məhrum etmək üçün onun tarixi yaddaşını məhv etmək kifayətdir. Yüz illərdir erməni millətçiləri də buna çalışır, Azərbaycan xalqının tarixi yaddaşını silmək üçün maddi və mənəvi abidələrimizi məhv etməyə can atıblar. Onlar yaxşı başa düşürlər ki, yaddaş mədəniyyətin və dünyagörüşün davamlı dəyəridir və zamanın məhvedici qüvvəsinə qarşı çıxır. Buna görə də ermənilər qədim Azərbaycan torpaqlarında türk-müsəlman mədəniyyətinin izlərini silməklə, xalqımızın tarixi yaddaşını da məhv etmək istəyiblər.
Erməni vandalları xalqımızın tarixi yaddaşını yox etmək, qədim Azərbaycan torpaqlarında türk-müsəlman mədəniyyətinin izlərini silmək üçün hər cür namərdliyə əl ataraq çirkin əməllərini illər boyu davam etdiriblər. Azərbaycanın tarixi torpağı olan Qarabağda yer adlarımızı, toponimlərimizi dəyişdirib, uydurma adlar qoyub, tariximizə iddia edə bilmədikləri məqamlarda isə barbarlığa əl ataraq maddi-mədəni, dini abidələrimizi vəhşicəsinə dağıdıblar.
AZƏRTAC xəbər verir ki, bunu Milli Məclisin deputatı Anar Məmmədov bildirib.
A.Məmmədovun sözlərinə görə, vaxtilə Ermənistanın işğalı altında qalmış torpaqlarımızda mövcud olan mədəniyyət abidələri, muzeylər və muzey kolleksiyaları ilə bağlı obyektiv məlumatları, bu tarixi-mədəni abidələrimizə qarşı münasibətdə erməni vandalizmi ilə bağlı məlumatları dünyaya daha geniş şəkildə çatdırmaq üçün üzərimizə böyük məsuliyyət düşür. “Biz beynəlxalq təşkilatlara müraciət edərək uzun illər Azərbaycan əhalisinə qarşı etnik təmizləmə siyasəti aparan Ermənistan tərəfindən təkcə torpaqlarımızın deyil, həm də mədəni irsimizin, memarlıq abidələrimizin mənimsənildiyi və qəsdən məhv edildiyi barədə məlumatlar veririk. Biz həm də ermənilərin tarixi faktları saxtalaşdırdığını, yalan məlumatlar yaydıqlarını, muzey eksponatlarının qanunsuz ixracı ilə məşğul olduqlarını beynəlxalq təşkilatların diqqətinə çatdırırıq. Belə olan halda isə ermənilər Cəbrayıl rayonunda erməni kilsəsinin sökülməsinə dair dezinformasiya yayaraq beynəlxalq ictimai rəydə çaşqınlıq yaratmağa çalışırlar. Məqsəd cəbhədəki məğlubiyyəti həzm edə bilməyən düşmənin saxta faktlar irəli sürərək dünyanı bu yalanlarına inandırmağa çalışmasıdır”, - deyə deputat vurğulayıb.
Deputat qeyd edib ki, adıçəkilən “ibadətgah” beynəlxalq səviyyədə Azərbaycanın əraziləri kimi tanınan torpaqlarında Ermənistanın 30 illik işğalı dövründə, daha dəqiq desək, 2017-ci ildə qeyri-qanuni inşa edilib. 1993-cü ildə qanunsuz işğala qədər həmin ərazilər yalnız etnik azərbaycanlılar tərəfindən məskunlaşmışdı. İbadətgah Ermənistanın Cəbrayılda və Azərbaycanın digər işğal olunmuş bölgələrində nəsillər boyu yaşamış azərbaycanlıların evlərini və mədəni irsini dağıtdığı bir dövrdə tikilib. İndi belə bir dezinformasiyanın yayılması siyasəti də ermənilər tərəfindən məqsədli şəkildə həyata keçirilir. Bu yolla onlar özlərini həmin ərazilərin əzəli sakinləri kimi qələmə verməyə çalışırlar. Lakin unudurlar ki, işğala qədər Cəbrayıl rayonunda bir nəfər də olsun erməni yaşamayıb. Prezident İlham Əliyev də dediyi kimi, Azərbaycanın multikulturalizmlə, dinlərarası münasibətlərlə bağlı apardığı siyasət bütün dünya ölkələri və liderləri tərəfindən təqdirlə qarşılanır. Ölkəmizdə bütün dinlərə məxsus tarixi abidələr qorunur. Ona görə də işğal dövründə erməni hərbçilər tərəfindən tikilən hansısa bir tikilinin tarixi abidə adlandırılması və belə iddiaların irəli sürülməsi yolverilməzdir.
“Bu gün Qarabağla bağlı haqq da, həqiqət də, tarix də bizim tərəfimizdədir”, - deyən Anar Məmmədov vurğulayıb ki, şanlı Azərbaycan Ordusunun 44 günlük Zəfər yürüşü erməni haqsızlığına, talançılığına, vəhşiliyinə son qoydu. Xalqımızın min illərin o tayından adlayıb gələn tarixi kökləri qorunacaq və məkrli ermənilərin tarix səhifələrindən silməyə çalışdığı həqiqətlər olduğu kimi yenidən bərpa edilərək Azərbaycan xalqının zəngin xəzinəsi kimi gələcəyə ötürüləcək.
Bölmənin digər xəbərləri
