AZƏRBAYCANIN DÖVLƏT SƏRHƏDİ ETİBARLI SURƏTDƏ QORUNUR

02.11.2005 [22:46]
Çap et
A⁺ A^-

Dövlət Sərhəd Xidmətinin mətbuat mərkəzindən AZƏRTAC-a daxil olmuş məlumatda bildirilir ki, sərhədçilər qeyri-leqal miqrasiya, narkotik vasitələr, qaçaqmalçılıq və digər mənfi hallara qarşı mübarizə sahəsində tədbirləri davam etdirərək oktyabr ayında cinayətkarlığa qarşı mübarizəni gücləndirərək axtarışda olan 39 nəfər şəxsi və 2,9 kiloqram tiryəkə oxşar maddəni müəyyənləşdirərək saxlamışlar.

Dövlət sərhədinin mühafizəsi zamanı 2 nəfər Rusiya, 1 nəfər Gürcüstan və 1 nəfər Pakistan vətəndaşı saxta sənədlərlə, 2 nəfər Azərbaycan, 2 nəfər Rusiya, 1 nəfər Qırğızıstan və 1 nəfər Özbəkistan vətəndaşı başqasına məxsus sənədlə, 37 nəfər müxtəlif ölkə vətəndaşı isə müvafiq sənədləri olmadığına görə saxlanılmışdır. Həmçinin 4 nəfər İsvec, 4 nəfər Mərakeş, 3 nəfər İran, 3 nəfər Nigeriya, 2 nəfər Sudan, 2 nəfər Almaniya, 2 nəfər Pakistan, 1 nəfər İraq, 1 nəfər Hindistan, 1 nəfər Uqanda, 1 nəfər Böyük Britaniya, 1 nəfər Misir və 1 nəfər Fransa vətəndaşı vizalarının olmamasına görə, 8 nəfər Azərbaycan, 1 nəfər Gürcüstan və 1 nəfər Ermənistan vətəndaşı isə şübhəli şəxs qismində saxlanılaraq barələrində müvafiq tədbirlər görülmüşdür.

Bununla yanaşı, 8 halda dövlət sərhədinin pozulmasının qarşısı alınmış, nəticədə 4 nəfər Gürcüstan, 2 nəfər Azərbaycan və 2 nəfər İran vətəndaşı sərhəd pozucusu qismində tutulmuş, sərhəd rejimi qaydalarını pozduqlarına görə 19 nəfər Azərbaycan vətəndaşı saxlanılmışdır.

Ay ərzində 1470 litr dizel yanacağının, 8100 flakon “Oksitetrasiklin–hidroxlorid” baytarlıq dərman preparatının, 4 ton ərik qurusunun, 84 kiloqram kağız yapışqanının, 247 top parcanın, 17 baş qaramalın, 89 litr spirtli içkilərin və 388 ədəd müxtəlif geyim əşyalarının dövlət sərhədindən qeyri-qanuni keçirilməsinin qarşısı alınmışdır.

Dövlət sərhədinin etibarlı mühafizəsinin təşkili istiqamətində tədbirlər davam etdirilir.