Azərbaycanın Ukraynadakı səfiri Azərbaycanın Milli Qəhrəmanı Viktor Seryoqinin ailəsinə baş çəkib
“İnnovasiyalar. İnvestisiyalar. Xarkov təşəbbüsləri” mövzusunda VI beynəlxalq iqtisadi forum işə başlayandan əvvəl azərbaycanlı diplomat Xarkov vilayətinin qubernatoru İ.Baluta ilə görüşüb.
Görüşdə regionlararası səviyyədə ikitərəfli iqtisadi münasibətlər müzakirə edilib. Xarkov vilayətinin rəhbəri onun ölkəsi üçün bu ağır vaxtda Ukraynanı dəstəklədiyinə görə rəsmi Bakıya təşəkkürünü bildirərək vilayətdə Azərbaycan ilə, o cümlədən Şəki ilə münasibətlərə yüksək qiymət verildiyini qeyd edib. İ.Baluta turizm sahəsində qarşılıqlı faydalı əməkdaşlığın inkişaf etdirilməsi üçün yaxşı perspektivlər mövcud olmasını da vurğulayıb.
Səfir Azərbaycan Respublikasının Xarkovda yaxın vaxtlarda təyin edilmiş fəxri konsulu Əfqan Salmanovu qubernatora təqdim edib.
“Dostluq” Azərbaycan-Ukrayna Dostluq Cəmiyyətinin rəhbəri, Xarkov Milli Radioelektronika Universitetinin xarici tələbələrlə iş üzrə dekanı, texnika elmləri doktoru, professor Murad Ömərov görüşdə iştirak edib.
Sonra ölkəmizin diplomatik nümayəndəsinin rəhbəri “İnnovasiyalar. İnvestisiyalar. Xarkov təşəbbüsləri” mövzusunda VI beynəlxalq iqtisadi forumun plenar iclasında “Azərbaycan-Ukrayna münasibətlərinin yeni mərhələsi” mövzusunda məruzə ilə çıxış edərək ölkələrimizin siyasi, iqtisadi və humanitar sahələrdə əməkdaşlığından söhbət açıb.
Səfir Prezident İlham Əliyev tərəfindən bütün sahələrdə aparılan dərin islahatlar, ölkəmizdə keçirilən qlobal miqyaslı forumlar, tədbirlər və idman yarışları, habelə Ermənistan-Azərbaycan, Dağlıq Qarabağ münaqişəsində indiki vəziyyət və başqa məsələlər üzərində ətraflı dayanıb.
Azərbaycanlı diplomat çıxışının sonunda yerli və mərkəzi KİV nümayəndələrinin suallarına cavab verib.
Forum işini başa çatdırandan sonra Azərbaycan səfiri vilayət qubernatoru tərəfindən əcnəbi qonaqların şərəfinə təşkil olunmuş təntənəli qəbulda iştirak edib.
Ölkəmizin diplomatik nümayəndəliyinin başçısı Xarkova səfəri çərçivəsində Əfqan Salmanov və Azərbaycan diasporunun digər nümayəndələri ilə birlikdə Azərbaycanın Milli Qəhrəmanı Viktor Seryoqinin ailəsinə baş çəkib.
Xatırladaq ki, 1992-ci il yanvarın 28-də V.Seryoqinin idarə etdiyi, içərisində 47 sərnişin olan Mi-8 mülki helikopteri ermənilərin atdığı “Stinger” istilik raketi ilə vurulub. Helikopter havada partlayıb, salonda yanğın baş verib. Bundan sonra Viktor Seryoqin artıq yerə enməkdə olan helikopteri Şuşa şəhərinin yaşayış məhəllələrindən uzaqlaşdıra bilib, lakin pilot özü, helikopterin heyət üzvləri və bütün sərnişinlər həlak olublar.
Azərbaycan Respublikası Prezidentinin 25 noyabr 1992-ci il tarixli 337 saylı Fərmanı ilə Viktor Vasilyeviç Seryoginə “Azərbaycanın Milli Qəhrəmanı” adı verilib (ölümündən sonra).
Viktor Seryoqin Bakıda Şəhidlər xiyabanında dəfn edilib.
Azərbaycanın Milli Qəhrəmanının anası Qalina Seryoqina və bacısı Oksana Azərbaycan dövləti tərəfindən onların ailəsinə göstərilən yüksək dəstəyə görə Prezident İlham Əliyevə səmimi təşəkkürlərini çatdırmağı xahiş ediblər.
Azərbaycanlı diplomat Xarkovda bizim diasporun fəal üzvləri ilə də görüşüb, bizim uşaqların ana dilində biliklərə yiyələndiyi Bazar Günü məktəblərinin işi ilə maraqlanıb, Xarkov ali məktəblərində təhsil alan iki mindən çox azərbaycanlı tələbənin təhsil və məişət şəraiti ilə tanış olub.
Zeynal Ağazadə
AZƏRTAC-ın xüsusi müxbiri
Kiyev
Bölmənin digər xəbərləri
