Azərbaycanın vasitəçilik təşəbbüsləri ölkəmizə beynəlxalq aləmdəki etibarı nümayiş etdirir ŞƏRH
Bakı, 28 avqust, AZƏRTAC
Prezident İlham Əliyev “Əl-Ərəbiyyə” telekanalına müsahibəsində bir çox vacib siyasi mövzularla bağlı sualları cavablandırdı. Dövlətimizin başçısı bir daha bəyan etdi ki, Vaşinqton razılaşması münaqişə və müharibənin sonudur. Təbii ki, Ermənistan öhdəliklərini yerinə yetirməli, Azərbaycanın ərazi bütövlüyünə qarşı iddiaları öz Konstitusiyasından çıxarmalıdır. Bundan sonra isə sülh müqaviləsi imzalanacaq. Bu, yenidən Ermənistana xatırlatma idi. Azərbaycanın yanaşması bundan ibarətdir ki, müharibənin başa çatmasının həm Cənubi Qafqaz regionu, həm də daha geniş mənada Mərkəzi Asiya və Yaxın Şərq üçün açdığı yeni imkanlar düzgün dəyərləndirilməlidir. Vaşinqton razılaşmasının Ermənistan tərəfindən pozulma riskinə gəlincə, Prezident bir daha bəyan etdi ki, İrəvanın bu razılaşmanı pozmaq şansı yoxdur. Əgər razılaşma pozulsa, bu, Ermənistan üçün daha ağır nəticələrə səbəb olacaq. Ermənistanda hətta hakimiyyət dəyişikliyi olsa belə, iqtidara gələcək şəxslər dərk etməlidir ki, bu, Azərbaycan-Ermənistan razılaşmasıdır. Yəni, həmin sənəddə kimin imzasının olmasından asılı olmayaraq, bu, dövlətlərarası razılaşmadır və dövlətlərin məsuliyyətidir.
Bu sözləri AZƏRTAC-a açıqlamasında Milli Məclisin deputatı Nigar Məmmədova deyib.
Deputat qeyd edib ki, müsahibədə ən vacib mesajlardan biri Ermənistanın yenidən Azərbaycana qarşı mümkün ərazi iddiaları ilə bağlı idi. Prezident bəyan etdi ki, bu, baş verərsə, cavab adekvat olacaq. Vaşinqton görüşündə əldə olunan əsas razılaşmalardan biri də Zəngəzur dəhlizi (TRİPP marşrutu) idi ki, dünya mediası bu dəhlizin son 5 ildə reallaşmamasının səbəbləri ilə maraqlanır. Prezident reallığın nədən ibarət olduğunu, prosesin bu həddə gəlməsinin əsas səbəblərini açıqladı. Bildirdi ki, Vətən müharibəsindən sonra Azərbaycanın bu ərazini zorla ələ keçirmək imkanı olsa da, bunu etməyib, çünki Azərbaycan işğalçı dövlət deyil. Ermənistanın süni şəkildə prosesi uzatdığı, 5 ilə yaxın sırf kommunikasiya xətləri ilə danışıqların aparılması bir daha dünya ictimaiyyətinin diqqətinə çatdırıldı. Bugünkü reallıq bundan ibarətdir ki, 5 il Azərbaycanın tələbləri və qanuni istəyi qarşısında qeyri-konstruktiv mövqe nümayiş etdirən Ermənistan nəhayət, Prezident Tramp və onun komandasının prosesə cəlb olunmasından sonra razılaşmaya getdi. Azərbaycan Zəngəzur dəhlizinin qlobal əhəmiyyətinə önəm verir və Ermənistanın da prosesə bu reallıqdan yanaşmasının tərəfdarıdır. Zəngəzur dəhlizi Şərq-Qərb dəhlizi üzrə daşımalarla yanaşı, Şimal-Cənub dəhlizi üzrə daşımalarda da istifadə olunacaq.
“Dövlətimizin başçısı Bakı ilə Moskva arasında davam edən gərginliyə də münasibət bildirdi. Azərbaycan bütün qonşularla bərabərhüquqlu əməkdaşlığın tərəfdarıdır və Rusiyanın davranışlarının timsalında bizə qarşı hörmətsizlik yolverilməzdir, biz buna dözməyəcəyik. Ötən ilin dekabrında Azərbaycanın mülki təyyarəsinin Rusiya tərəfindən vurulması və həmin ölkənin rəsmilərinin buna reaksiyası haqlı olaraq məyusluq doğurur. Rəsmi Bakının Moskvadan gözləntisi var – 44 günlük müharibə zamanı Rusiya vertolyotu vurularkən Azərbaycanın davranışı buna ən yaxşı nümunədir. Prezident xatırlatdı ki, bu zaman Azərbaycan dərhal üzr istədi və təzminat ödədi. Bu gün də bizim Rusiyadan gözləntilərimiz eynidir. Amma Rusiya nəinki üzərinə düşən öhdəliyi yerinə yetirmədi, əksinə, bu ölkədə məskunlaşan azərbaycanlılara qarşı təqiblər başladı. İki nəfər soydaşımızın öldürülməsi ilə nəticələnən Yekaterinburq hadisələri baş verdi. Azərbaycan Prezidenti bir daha bildirdi ki, münasibətlərdə problemlərin yaranmasına görə məsuliyyət bizim üzərimizə düşmür”, - deyə N.Məmmədova vurğulayıb.
Onun sözlərinə görə, “Əl-Ərəbiyyə” telekanalına müsahibə zamanı Azərbaycanın artan vasitəçilik təşəbbüslərinə də diqqət çəkildi. Əminliklə söyləyə bilərik ki, İsrail-Suriya, Türkiyə-İsrail arasında vasitəçilik təşəbbüsləri Azərbaycana beynəlxalq aləmdəki etibarı nümayiş etdirir. Dövlətimizin başçısı verdiyi əsas mesajlardan biri də Azərbaycanın bütün ölkələrin ərazi bütövlüyünü dəstəkləməsi ilə bağlı idi. “Azərbaycan ərazi bütövlüyünün pozulmasından əziyyət çəkən bir ölkə olaraq bütün ölkələrin ərazi bütövlüyünü dəstəkləyir. Bizim bununla bağlı mövqeyimiz birmənalıdır”, - deyən dövlətimizin başçısı beynəlxalq vasitəçilik missiyası zamanı da bu məsələnin rəsmi Bakı üçün prioritet təşkil etdiyini diqqətə çatdırdı.
Bölmənin digər xəbərləri
