Azərbaycanın Xarici İşlər Naziri Birləşmiş Ərəb Əmirliklərindən olan həmkarı ilə telefonla danışıb
Bakı, 24 iyun, AZƏRTAC
Azərbaycanın Xarici İşlər naziri Elmar Məmmədyarov ilə Birləşmiş Ərəb Əmirliklərinin Xarici İşlər və Beynəlxalq Əməkdaşlıq naziri Şeyx Abdullah Bin Zayed Əl Nəhyan arasında telefon danışığı olub.
XİN-dən AZƏRTAC-a bildiriblər ki, nazirlər ikitərəfli dostluq və əməkdaşlıq əlaqələri, həmçinin ölkələrimiz arasında müxtəlif sahələrdə münasibətlərin inkişaf perspektivləri barədə fikir mübadiləsi aparıblar.
Nazirlər qlobal pandemiya ilə bağlı son vəziyyət və iki ölkə tərəfindən COVID-19 epidemiyasının təsirini yumşaltmaq üçün görülən tədbirlərə dair məlumat mübadiləsi aparıblar. Tərəflər yeni növ koronavirus ilə mübarizə üçün qarşılıqlı dəstəyin və beynəlxalq həmrəyliyin vacibliyini bir daha qeyd ediblər.
Nazir Elmar Məmmədyarov BƏƏ-nin COVID-19 ilə mübarizə üzrə Azərbaycana verdiyi yardımı yüksək qiymətləndirib.
Hər iki nazir müxtəlif beynəlxalq təşkilatlar çərçivəsində qarşılıqlı dəstəyin davam etdirilməsi barədə razılığa gəliblər.
Bölmənin digər xəbərləri
