Azərbaycanın zəngin təbiəti turizm üçün böyük üstünlükdür - ŞƏRH
Bakı, 24 iyun, AZƏRTAC
Azərbaycan zəngin təbii-rekreasiya resursları, müxtəlif turizm imkanları və işğaldan azad olunmuş ərazilərdə həyata keçirilən genişmiqyaslı bərpa layihələri sayəsində böyük turizm potensialına malikdir. Bununla yanaşı, ölkəyə turist axınının artırılması üçün əlçatanlıq amilinin gücləndirilməsi və yeni hədəf bazarlarına çıxışın genişləndirilməsi vacibdir.
Bu fikirləri AZƏRTAC-a açıqlaması zamanı Skal Baku Turizm Peşəkarları Təşkilatının sədri Ceyhun Aşurov bildirib.
Ekspert qeyd edib ki, ölkə rəhbərliyi tərəfindən dəfələrlə Azərbaycanın turizm imkanlarının geniş olduğu vurğulanıb və işğaldan azad olunmuş ərazilərdə aparılan bərpa və infrastruktur layihələri gələcəkdə turizm sektorunun inkişafına mühüm töhfə verəcək.
“Azərbaycan çox zəngin təbii-rekreasiya resurslarına malikdir. İşğaldan azad olunmuş ərazilərdə hazırda ciddi bərpa və infrastruktur işləri aparılır ki, bu da gələcəkdə ölkənin turizm bazarına öz töhfəsini verəcək. Təəssüf ki, hazırkı göstəricilər inkişaf dinamikasını tam nümayiş etdirmir. Əvvəlki illərlə müqayisədə ölkəyə gələn turistlərin sayında azalma müşahidə olunur. Bunun regionda baş verən hadisələrlə birbaşa əlaqəsi var. Regionda yaranan hər hansı gərginlik və ya münaqişələr hədəf bazarlarından gələn turistlərin sayına mənfi təsir göstərir. Son illərdə Azərbaycanda turizm infrastrukturu əhəmiyyətli dərəcədə inkişaf edib. Regionlarda yeni hotellər, qonaqlama obyektləri istifadəyə verilir, yeni turizm marşrutları yaradılır. Bu proses işğaldan azad olunmuş əraziləri də əhatə edir. COVID-19 pandemiyasından sonrakı dövrdə daxili turizmə tələbat yüksək olaraq qalır. Ölkədaxili turizm səfərləri və turizm hərəkətliliyi kifayət qədər aktivdir”, – deyə C.Aşurov bildirib.
Ekspert qeyd edib ki, turistlərin hər hansı istiqaməti seçərkən diqqət yetirdiyi əsas amillər təhlükəsizlik və əlçatanlıqdır: “Bir turist hər hansı istiqamətə səfər etməzdən əvvəl ilk növbədə təhlükəsizlik amilinə diqqət yetirir. Bu baxımdan Azərbaycan kifayət qədər əlverişli mövqedədir. İkinci vacib məsələ isə əlçatanlıqdır. Hesab edirəm ki, məhz bu istiqamətdə Azərbaycan regionun bəzi ölkələrindən müəyyən qədər geri qalır. Əgər bu sahədə dəyişikliklər edə bilsək, ölkəyə gələn turistlərin sayında ciddi artım müşahidə etmək mümkün olacaq. Azərbaycanda doqquz beynəlxalq hava limanı fəaliyyət göstərir və onların üçü işğaldan azad olunmuş ərazilərdə yerləşir. Quru sərhədlərin bağlı qalması turist sayının azalmasının əsas səbəbi deyil. Əsas səbəb ölkəyə səfərin baha başa gəlməsidir. Xarici turistlər üçün hava nəqliyyatı vasitəsilə Azərbaycana səfərin daha münasib qiymətlərlə təşkili vacibdir. Xüsusilə regional beynəlxalq hava limanlarının imkanlarından daha geniş istifadə olunarsa, bu, regionlarda da turist axınının artmasına şərait yaradar”.
O əlavə edib ki, regional hava limanlarının aşağıbüdcəli aviaşirkətlərlə əməkdaşlığının genişləndirilməsi turistlərin ölkə üzrə daha balanslı paylanmasına kömək edə bilər.
“Hazırda turistlərin böyük hissəsi vaxtının təxminən üçdə ikisini Bakı və Abşeron yarımadasında keçirir. Regionlara səfərlər isə nisbətən azdır. Bunun əsas səbəbi giriş və çıxış nöqtəsinin əsasən Bakı olmasıdır. Regional hava limanlarının loukosterlərlə əməkdaşlığı genişlənsə, həm qonşu ölkələrdən, həm də yeni hədəf bazarlardan turist cəlb etmək mümkün olar. Bu isə regionlarda turizm aktivliyinin və turizm gəlirlərinin artmasına müsbət təsir göstərəcək”, – deyə C.Aşurov qeyd edib.
Müxbir - Pərvanə Qafarova
Bölmənin digər xəbərləri
