Azərbaycanlı alimlərin monoqrafiyası nəşr olunub
Bakı, 2 oktyabr, AZƏRTAC
Elm və Təhsil Nazirliyinin Polimer Materialları İnstitutunun baş direktoru AMEA-nın müxbir üzvü, kimya elmləri doktoru, professor Bəxtiyar Məmmədov, Poliefir və polikarbonat materiallar laboratoriyasının müdiri kimya elmləri doktoru, professor Ağa Mustafayev və laboratoriyanın aparıcı elmi işçisi kimya üzrə fəlsəfə doktoru Raisə İsmayılovanın həmmüəllifi olduqları “Epoksiakrilat tərkibli oliqoefirlərin sintezi və tədqiqi” adlı kitab nəşr olunub.
İnstitutdan AZƏRTAC-a bildirilib ki, monoqrafiyanın elmi redaktoru kimya elmləri doktoru, professor Nəcəf Qəhrəmanov, rəyçi kimya elmləri doktoru Kazım Quliyevdir.
Təqdim olunan monoqrafiya epoksidian qatranlarının və müxtəlif nümayəndələrinin sintezinə, modifikasiyasına, bu qatranlar və onların modifikasiya məhsulları əsasında yeni polimer materialların alınmasına, bu tip makromolekulyar birləşmələrin, həmçinin onların əsasında əldə olunan kompozisiya materialarının xassələrinin və tətbiq imkanlarının müəyyən edilməsinə aid olan elmi ədəbiyyat məlumatlarının sistemli şəkildə araşdırılmasına və ümmumiləşdirilməsinə həsr olunub.
Kitabdan kimya sahəsi üzrə təhsil alan tələbələr, magistrantlar, doktorantlar, dissertantlar, ali təhsil müəssisələrinin müəllimləri, polimer materiallarının alınması, tətbiq və tədqiq sahələrinin öyrənilməsi istiqamətində çalışan elmi işçilər, kimyaçı mühəndislər yararlana bilərlər.
Bölmənin digər xəbərləri
