Azərbaycanlı diplomat BMT Təhlükəsizlik Şurasının iclasında erməni tərəfinin davamlı dezinformasiyasından danışıb
Bakı, 16 sentyabr, AZƏRTAC
Azərbaycan Respublikasının BMT-dəki daimi nümayəndəsi Yaşar Əliyev Təhlükəsizlik Şurasının iclasındakı çıxışında erməni tərəfinin davamlı dezinformasiyasından danışıb.
AZƏRTAC xəbər verir ki, Y.Əliyev erməni sosial şəbəkələrinin guya Ermənistan ərazisində məhv edilmiş mülki obyektlərin fotoşəkilləri ilə dolu olduğunu bildirib. Deyib ki, əslində, bunlar 2020-ci ilin payızında müharibə dövründə Ermənistan silahlı qüvvələrinin raket zərbələri ilə dağıdılmış Azərbaycan mülki obyektlərinin, xüsusən həmin il oktyabrın 28-də şiddətli raket atəşinə məruz qalmış Bərdə şəhərinin fotoşəkilləridir, həmin zərbələr nəticəsində 21 nəfər dinc sakin həlak olub, 70-dən çox sakin yaralanıb.
Daimi nümayəndə qeyd edib: “Bizim beynəlxalq tərəfdaşlarımızın müraciətləri nəzərə alınmaqla sentyabrın 13-də Bakı vaxtı ilə səhər saat 9-dan başlayaraq atəşkəs haqqında razılıq əldə edilib. Lakin Ermənistan silahlı qüvvələri beynəlxalq birliyin diqqətindən siyasi manipulyasiya məqsədilə istifadə edərək böhranı daha da genişləndirmək kimi ağılsız cəhd göstərərək artilleriyadan və digər ağır silahlardan atəş açıb, sərhədyanı rayonlarda hücumları və təxribatları davam etdirib. Atəşkəs rejiminin Ermənistan tərəfindən pozulması nəticəsində Azərbaycan hərbi qulluqçuları arasında əlavə itkilər olub. Bundan əlavə, iki dinc sakin ağır yaralanıb”.
Bölmənin digər xəbərləri
