Azərbaycanlı və türkiyəli jurnalistlər saxta “erməni soyqırımı”nın ifşası istiqamətində müzakirələr aparıblar
Bakı, 23 aprel, AZƏRTAC
Aprelin 22-də türkiyəli və azərbaycanlı jurnalistlərin “Saxta erməni soyqırımının əsl üzü” mövzusunda onlayn formatda birgə konfransı keçirilib.
AZƏRTAC xəbər verir ki, “Global Journalism Council” tərəfindən təşkil edilən konfransın moderatoru təşkilatın beynəlxalq məsələlər üzrə sədr müavini Elşad Eyvazlı olub. Tədbirdə “Global Journalism Council”in sədri Mehmet Ali Dim, Azərbaycan və Türkiyədən 30-a yaxın jurnalist, ekspertlər iştirak ediblər.
Konfransda Milli Məclisin deputatı, fəlsəfə doktoru Cavanşir Feyziyev və Anadolu Universitetinin professoru Levent Eraslan çıxış edərək, erməni yalanlarının, saxta “erməni soyqırımı”nın tarixi kökləri haqqında tədbir iştirakçılarını məlumatlandırıblar.
Deputat Cavanşir Feyziyev ermənilərin iddialarının əsassız olduğunu tarixi faktlarla əsaslandırıb.
Levent Eraslan gənclərin qondarma “erməni soyqırımı”nın ifşası istiqamətində görə biləcəyi işlər, sosial mediada bununla bağlı atılmalı addımlar haqqında fikirlərini bölüşüb.
Toplantıda hər il 24 aprel ərəfəsində Türkiyənin, Azərbaycanın və ümumilikdə türk dünyasının diqqətinin ABŞ-ın rəhbər strukturlarında aparılan müzakirələrə cəlb olunduğu diqqətə çatdırılıb.
Cavanşir Feyziyev ABŞ-ın qərarlarının, əslində, məsələnin gedişatına heç bir təsiri olmayacağını qeyd edib. Bununla əlaqədar hər il bu tarixdə qabaqlayıcı tədbirlərin görülməli olduğu bildirilib.
Bu istiqamətdə sistemli işə başlanması qərara alınıb. “Erməni soyqırımı doğrudan da baş veribsə, bu gün Türkiyədə niyə ermənilər yaşayır” sualı ortaya qoyulub.
Deputat Cavanşir Feyziyev sosial şəbəkələrdə bununla bağlı görülməli işlərə xüsusi diqqət ayrılmalı olduğunu qeyd edib.
Tədbirdə azərbaycanlı və türkiyəli jurnalistlərin bu məsələ ilə əlaqədar daha böyük heyətlə müzakirələr aparması, davamlı görüşlərin keçirilməsi, xarici jurnalistlərin cəlb olunması qərara alınıb. Eyni zamanda, hər il 24 aprel ərəfəsində Xocalı soyqırımının təbliğinin vacibliyi diqqətə çatdırılıb.
C.Feyziyevin sözlərinə görə, 100 il əvvəl heç bir əsası və sübutu olmayan, törədilməmiş “soyqırımı”nı qondarma şəkildə təbliğ edən ermənilərə qarşı 30 il öncəki, şahidləri həyatda olan, tarixi sübutları nümayiş etdirilmiş Xocalı qurbanlarının diqqət mərkəzində saxlanması zəruridir. O, həmçinin Xocalı soyqırımı ilə bağlı filmlərin çəkilməsi, soyqırımının ən yüksək səviyyədə dünyaya tanıdılması üçün silsilə addımların tərəfdarı olduğunu deyib.
Deputat bu təbliğata dövlət dəstəyi ilə yanaşı, qeyri-hökumət təşkilatlarının və jurnalistlərin qoşulmasının, hər bir türk və azərbaycanlının aktiv fəaliyyətinin daha səmərəli olacağına toxunub. Bildirib ki, sistemli şəkildə addımlar atılarsa, yaxın zamanda qondarma “erməni soyqırımı” məsələsi dünya gündəmindən çıxarılacaq.
Konfrans Türkiyənin “DİM” Televiziyasının və “MediaTürk TV”nin efirində canlı yayımlanıb.
Bölmənin digər xəbərləri
