Hörmətli iclas iştirakçıları!

Azərbaycan iqtisadiyyatının bütün istiqamətlərdə yüksək sürətlə inkişaf etməsi bu günün danılmaz reallığıdır. O cümlədən, iqtisadi inkişafın hərəkətverici qüvvəsi olan elektrik enerjisi sahəsində də böyük uğurlar əldə etmək üçün möhkəm zəmin yaradılmışdır.

Əlbəttə, Azərbaycanda müstəqil energetika sisteminin formalaşması ümummilli liderimiz Heydər Əliyevin misilsiz xidmətləri sayəsində mümkün olmuşdur. Təsadüfi deyildir ki, mövcud generasiya güclərinin və elektrik şəbəkələrinin yarısından çoxu bilavasitə ulu öndərimizin adı ilə bağlıdır.

Cənab Prezident!

Son iki il ərzində elektrik energetikası sahəsinin inkişafı istiqamətində Sizin tərəfinizdən qətiyyətli və ardıcıl addımlar atılmışdır. 2015-ci ilə qədər uzunmüddətli və 2008-ci ilə qədər yaxınmüddətli proqramlar müəyyən olunmuş, qarşımızda duran vəzifələr müəyyənləşdirilmişdir.

Yaxınmüddətli proqram mövcud problem və çatışmazlıqların aradan qaldırılmasını, uzunmüddətli proqram isə sahənin qabaqlayıcı templə inkişaf etdirilməsini, respublikanın elektrik enerjisi idxal edən ölkədən, ixrac edən ölkəyə çevrilməsini nəzərdə tutur.

Möhtərəm Prezident!

Bu gün Azərbaycanın enerji sistemində ümumi gücü 5000 meqavata yaxın olan 4 istilik və 5 su elektrik stansiyası fəaliyyət göstərir. 2005-2006-cı illərin payız-qış mövsümünə hazırlıqla əlaqədar stansiyalarda aparılmış təmir-bərpa işləri nəticəsində onların maksimum real gücü 4100 meqavata yaxın olacaqdır.

Nəinki respublikada, həm də Cənubi Qafqazda ən böyük elektrik stansiyası olan “Azərbaycan” DRES-də görülmüş işlər və 5-ci blokda aparılan yenidənqurma işləri nəticəsində 230 meqavat güc bərpası gözlənilir. Qış mövsümündə stansiyanın real güc imkanı 2100 meqavat olacaqdır.

“Şimal” DRES-də 400 meqavatlıq buxar-qaz qurğusunda əsaslı təmir işləri dünən başa çatdırılmışdır.

Bu gün stansiya artıq şəbəkəyə qoşulmuşdur.

İstilik elektrik stansiyalarının anbarlarında 300 min tondan artıq mazut ehtiyatı toplanmışdır.

Cənab Prezident!

Bu il sentyabrın 8-də Sizin xeyir-duanızla təməli qoyulmuş Astara elektrik stansiyasında işlər yüksək sürətlə davam edir. Dünən birinci modul artıq Astaraya gətirilmişdir. Sizi bir daha əmin edirəm ki, Astara stansiyası bu qış mövsümündə enerjisistemə əlavə 90 meqavata yaxın yeni elektrik gücü verəcəkdir.

Naxçıvan Muxtar Respublikasının enerji təchizatını yaxşılaşdırmaq üçün “Babək” İstilik Elektrik Stansiyasında turbinlərin dizel yanacağından qaz yanacağına keçirilməsi məqsədi ilə modernləşdirmə işləri yüksək sürətlə həyata keçirilir. Stansiyanın modernləşdirilməsi ilə yanaşı, Babək yardımçı stansiyasında əsaslı yenidənqurma işləri aparılır. Stansiya bu qış mövsümündə işə salındıqdan sonra muxtar respublika əlavə 50 meqavat güc əldə edəcəkdir.

2005-ci ilin 9 ayı ərzində enerji sisteminin sistemtəşkiledici elektrik verilişi xətlərinin və yardımçı stansiya avadanlıqlarının əsaslı təmiri, payız-qış mövsümünə hazırlığı, istismar səviyyəsinin yüksəldilməsi sahəsində də əsaslı işlər görülmüşdür.

Bölgələrin enerji təchizatını yaxşılaşdırmaq məqsədi ilə 2005-ci ilin əvvəlindən başlayaraq enerjisistemin sistemtəşkiledici yardımçı stansiyalarında yenidənqurma işləri aparılır.

Görülmüş işlər nəticəsində bu stansiyalarda, ümumilikdə, 500 meqavoltamperə yaxın güc artımı əldə ediləcəkdir.

Artıq “Yevlax”, “Kürdəmir”, “Ucar”, “Bərdə”, ”Masallı”, “Sabirabad”, “Astara”, “Ələt”, “Sumqayıt-2” və 135 saylı yardımçı stansiyalarda işlər tamamilə başa çatdırılmışdır. Digər yardımçı stansiyalarda isə işlər davam etdirilir.

Cari ilin əvvəlindən Almaniyanın KfW bankı tərəfindən maliyyələşdirilən reabilitasiya proqramı çərçivəsində 500 kv-luq “Abşeron”, 330 kv-luq “İmişli”, “Yaşma”, “Binəqədi”, “Müşfiq”, “Nizami”, “8-ci km”, “Xırdalan”, “Puta”, “Maştağa” və bir sıra digər yardımçı stansiyalarda avadanlıqlar yeniləşdirilir. İlin sonuna qədər bu işlər başa çatdırılacaqdır.

2005-ci ilin 9 ayı ərzində respublikanın elektrik stansiyalarında istehsal edilmiş elektrik enerjisinin həcmi 2004-cü ilin müvafiq dövrü ilə müqayisədə 4,5 faiz artaraq 16,3 milyard kilovat-saat təşkil etmişdir.

İlin sonuna qədər elektrik enerjisi istehsalının 23 milyard kilovat-saatdan artıq olacağı gözlənilir. Bu isə son 14 ilin ən yüksək göstəricisidir.

Qeyd etmək lazımdır ki, bu artım yeni generasiya güclərinin istifadəyə verilməsi hesabına deyil, itirilmiş güclərin bərpası hesabına həyata keçirilmişdir. İstehsal olunmuş elektrik enerjisinin 87,1 faizi istilik elektrik stansiyalarında, 12,9 faizi isə su elektrik stansiyalarında istehsal olunmuşdur.

1 kilovat-saat elektrik enerjisinin istehsalına sərf olunan şərti yanacağın miqdarı enerji sisteminin ən əhəmiyyətli, ən aktual iqtisadi göstəricisi hesab olunur. Hesabat dövründə bu göstərici 380,5 qram, yəni keçən ilin 9 ayı ilə müqayisədə 5,7 qram az olmuşdur. Bu isə 77 min ton şərti yanacağa, başqa sözlə, 57 min ton soba mazutuna qənaət edilməsi deməkdir.

Cənab Prezident!

2005-ci ilin 9 ayı ərzində Səhmdar Cəmiyyətinin tabeçiliyində olan müəssisələrdə yeni layihələrin həyata keçirilməsi ilə bağlı 1000-dən artıq yeni iş yeri açılmışdır.

Yaxın iki il ərzində ötürücü şəbəkə sisteminin inkişafı ilə əlaqədar və yeni generasiya güclərinin istismara verilməsi nəticəsində Səhmdar Cəmiyyətdə əlavə 1500 yeni iş yeri açılacaqdır.

Möhtərəm Prezident!

Avqustun 12-də Sizin tərəfinizdən Sumqayıtda 506 meqavat gücündə buxar-qaz qurğusunun təməl daşı qoyulmuşdur. Məlumat vermək istəyirəm ki, layihə işləri qrafik üzrə aparılır və 2007-ci ilin dördüncü rübündə bu qurğu istismara verilərək, ölkənin ümumi enerji sisteminə qoşulacaqdır.

“Şimal” DRES-də inşa ediləcək 400 meqavat gücündə ikinci buxar-qaz qurğusu enerji sistemin gücünün artırılmasında əhəmiyyətli rol oynayacaqdır. Cari ilin noyabr ayında layihə üzrə texniki məsləhətçinin seçilməsi üzrə tender proseduru başlanacaqdır.

İran İslam Respublikası və Azərbaycan Respublikası arasında enerji mübadiləsi üçün texniki imkanların artırılması layihəsinin həyata keçirilməsinin hazırlıq mərhələsi tamamilə başa çatdırılmışdır. Bu ayın sonuna qədər layihə üzrə işlərə başlanacaqdır.

Enerji sistem üçün ən mühüm layihələrdən biri Dünya Bankının krediti hesabına maliyyələşdiriləcək sistemtəşkiledici yardımçı stansiyaların və müvafiq xətlərin yenidənqurulması, müasir kompüter idarəetmə sisteminin tətbiqi, skayder sisteminin və Milli Dispetçer Mərkəzinin yaradılması layihəsidir.

Sizin 2005-ci il 21 oktyabr tarixli Sərəncamınıza uyğun olaraq, bu layihənin həyata keçirilməsi üçün yaxın günlərdə Dünya Bankı və Azərbaycan Hökuməti arasında kredit sazişinin imzalanması nəzərdə tutulur.

Möhtərəm cənab Prezident!

Sizin Azərbaycan Respublikasının Milli Məclisinə seçkilərin hazırlanması və keçirilməsi ilə bağlı təxirəsalınmaz tədbirlər haqqında 25 oktyabr tarixli Sərəncamınıza uyğun olaraq “Azərenerji” Səhmdar Cəmiyyəti gücləndirilmiş iş rejiminə keçmişdir. Seçkilərin hazırlanması və keçirilməsi dövründə seçki məntəqələrini elektrik enerjisi ilə etibarlı təmin etmək məqsədi ilə tədbirlər görmək və ona nəzarət etmək məqsədi ilə qərargahlar yaradılmışdır.

Möhtərəm cənab Prezident!

Fürsətdən istifadə edərək, Sizi qarşıdan gələn Ramazan bayramı münasibətilə təbrik edirik.

Sizi bir daha əmin edirik ki, energetiklərin qarşısında qoyulmuş bütün vəzifələrin layiqincə, vaxtında və yüksək keyfiyyətlə həyata keçirilməsi üçün var qüvvəmizlə çalışacaq, əlimizdən gələni əsirgəməyəcəyik.

İLHAM ƏLİYEV: İndi görülən işlər haqqında məlumat verdin. Bu, çox gözəldir, böyük işlər görülür. Modul stansiyaların tikilməsi, sonra Sumqayıt buxar-qaz stansiyası, Şimal-2 stansiyası - bunlar hamısı olacaqdır. Amma sən, de görüm, qarşıdan gələn qış mövsümündə bizi nələr gözləyir? İlin əvvəlindən bu günə qədər nə Bakıda, nə də rayonlarda demək olar ki, işıqla bağlı problem olmamışdır. Qış aylarında vəziyyət necə olacaqdır?

ETİBAR PİRVERDİYEV: Cənab Prezident, biz stansiyalarda müəyyən təmir işləri aparmışıq. Stansiyaların hazırlığı keçən ilə nisbətən bu il daha yaxşıdır. Bildirdiyim kimi, ötürücü yardımçı stansiyalarda 500 meqavat amperdən artıq yükgötürmə qabiliyyətinə malikik. Amma bir fakt da var ki, 2004-2005-ci illərdə yeni stansiyaları sistemə qoşmamışıq. Buna baxmayaraq, biz DRES-dəki beşinci blokda 170 meqavata qədər yeni güc əldə edəcəyik. Qış mövsümündə, yanvar ayında Astara stansiyasında gücü 90 meqavata çatdıracağıq ki, bu da bütövlükdə, cənub bölgəsini tam təmin edəcəkdir.

İLHAM ƏLİYEV: Nə vaxt hazır olacaq, yanvarda?

ETİBAR PİRVERDİYEV: Cənab Prezident, biz tikinti işlərini dekabrın sonunda qurtarmağı nəzərdə tutmuşuq. Yanvarda isə stansiyanın sistemə qoşulması işi həyata keçiriləcəkdir.

İLHAM ƏLİYEV: Yaxşı. Çalışın ki, problem olmasın.

ETİBAR PİRVERDİYEV: Cənab Prezident, problem olmayacaq.

İLHAM ƏLİYEV: Sağ olun.

X X X

Çıxış üçün “Azəriqaz” Qapalı Səhmdar Cəmiyyətinin sədri Əlixan Məlikova söz verildi.