BAK AZƏRBAYCANLA BAĞLI SİLSİLƏ TƏDBİRLƏR HAZIRLAMIŞDIR
Hollandiyada ölkəmizi tanıtmaq sahəsində səmərəli fəaliyyət göstərən Benilüks Azərbaycanlıları Konqresinin (BAK) mətbuat xidmətindən AZƏRTAC-ın xüsusi müxbirinə bildirmişlər ki, qurumun gənclərin koordinasiya şurası artıq bir neçə müddətdir ki, doğma Vətənimizə həsr olunmuş “The Day of the Azerbaijan” (“Azərbaycan günü”) adlı layihə üzərində çalışır. Yaxın vaxtlarda həyata keçirilməsi nəzərdə tutulan layihə ölkəmizin qədim tarixini, mədəniyyət və adət-ənənələrini, ədəbiyyatını, zəngin musiqisini, idmanını və müasir həyatını əhatə edəcəkdir. Maraqlı tədbir əsasən Avropa xalqları üçün nəzərdə tutulmuşdur.
Benilüks ölkələrinin müxtəlif şəhərlərində keçiriləcək tədbirə siyasi partiyaların təmsilçilərinın, diplomatik korpusun əməkdaşlarının, yerli icma rəhbərlərinin və mətbuat nümayəndələrinin dəvət olunması planlaşdırılmışdır. Silsilə tədbirlərdə Niderlandın, Belçikanın və Lüksemburqun gənclər təşkilatlarının nümayəndələri də iştirak edəcəklər.
Tədbir zamanı doğma yurdumuza həsr olunmuş video filmlər nümayiş etdiriləcək, Azərbaycan həqiqətlərini əks etdirən sərgilər təşkil ediləcək, Benilüks ölkələrində yaşayıb yaradan musiqiçilərimizin ifasında xalqımıza məxsus mahnılar səslənəcəkdir.
Azərbaycanlı gənclər tərəfindən mükəmməl şəkildə hissə-hissə hazırlanan tədbir yaxın vaxtlarda qeyri-adiliyi və professionallığı ilə seçiləcəkdir.
Bölmənin digər xəbərləri
