Bakı ilə Aşqabad arasında siyasi dialoq ən yüksək səviyyədədir ŞƏRH
Bakı, 24 iyun, AZƏRTAC
Müasir beynəlxalq münasibətlər sisteminin yenidən formalaşdığı, qlobal logistik və enerji marşrutlarının transformasiyaya uğradığı bir dövrdə Türkmənistan Prezidentinin Azərbaycana reallaşan səfəri regional və qlobal siyasətin diqqət mərkəzindədir. Bu səfər çoxəsrlik tarixi, mədəni və etnik köklərə əsaslanan Azərbaycan-Türkmənistan münasibətlərinin keyfiyyətcə yeni, strateji müttəfiqlik mərhələsinə qədəm qoymasının bariz göstəricisidir.
Bu sözləri AZƏRTAC-a açıqlamasında politoloq Tural İsmayılov söyləyib.
O bildirib ki, səfər çərçivəsində keçirilən ali səviyyəli görüşlər və aparılan danışıqlar Bakı ilə Aşqabad arasında siyasi dialoqun ən yüksək səviyyədə olduğunu təsdiqləyir. İki ölkə rəhbərinin nümayiş etdirdiyi güclü siyasi iradə dövlətlərimiz arasındakı qarşılıqlı etimadı daha da möhkəmləndirir. Azərbaycan və Türkmənistan beynəlxalq platformalarda bir-birinin suverenliyini, ərazi bütövlüyünü dəstəkləyirlər. Türk dünyasının inteqrasiyası prosesinin sürətləndiyi hazırkı dövrdə bu iki mühüm güc mərkəzinin birgə fəaliyyəti bütövlükdə regionun təhlükəsizliyinə və inkişafına misilsiz töhfələr verir.
"İqtisadi müstəvidə Azərbaycan və Türkmənistanın tərəfdaşlığı qlobal miqyasda mühüm çəkiyə malikdir. Səfərin iqtisadi analizi göstərir ki, tərəflər ticarət dövriyyəsinin şaxələndirilməsi və həcminin qat-qat artırılması üçün böyük potensiala malikdirlər. Xüsusilə enerji sektoru iki ölkə arasındakı əməkdaşlığın strateji əsasını təşkil edir. Xəzər dənizindəki "Dostluq" yatağının karbohidrogen resurslarının birgə kəşfiyyatı və işlənilməsinə dair əldə olunmuş tarixi razılaşma bu əlaqələrin zirvə nöqtəsidir. Türkmənistanın nəhəng qaz potensialı ilə Azərbaycanın formalaşdırdığı və uğurla idarə etdiyi çoxşaxəli enerji infrastrukturu birləşdikdə, Avropanın və dünyanın enerji təhlükəsizliyinin təmin olunmasında tamamilə yeni bir mənbə və marşrut formalaşır. Bu layihələr təkcə iki ölkəyə iqtisadi mənfəət gətirmir, həm də onları qlobal enerji xəritəsinin əvəzolunmaz aktorlarına çevirir", - deyə T.İsmayılov vurğulayıb.
Politoloqun sözlərinə görə, nəqliyyat və logistika sahəsi bu səfərin təhlilində xüsusi yer tutur. Müasir dövrdə Şərq-Qərb və Şimal-Cənub nəqliyyat dəhlizlərinin, xüsusilə Orta Dəhlizin aktuallığı sürətlə artmaqdadır. Türkmənistan Prezidentinin səfəri Mərkəzi Asiya yüklərinin Azərbaycan vasitəsilə Avropaya və əks istiqamətə daşınması mexanizmlərinin optimallaşdırılması üçün yeni imkanlar açır.
"Münasibətlərin humanitar və mədəni ölçüsü isə bu strateji tərəfdaşlığın mənəvi təməlini təşkil edir. Ortaq oğuz köklərinə, dil, din və adət-ənənələrə sahib olan xalqlarımız arasındakı bağlılıq dövlətlərarası əlaqələrin sarsılmazlığını təmin edir. Bu mənəvi yaxınlıq siyasi və iqtisadi sahədə əldə olunan uğurların uzunmüddətli və dayanıqlı olmasının ən böyük zəmanətidir", - deyə o əlavə edib.
Bölmənin digər xəbərləri
