“Bakı Metropoliteni” QSC: Sərnişinlərin yeni metro hərəkət sxeminə uyğunlaşmasında müsbət dinamika var
Bakı, 1 sentyabr, AZƏRTAC
“Bakı Metropoliteni” QSC tərəfindən Qırmızı və Yaşıl xətlərin ayrılması layihəsinin əsas tikinti mərhələsinə başlanılması ilə əlaqədar avqustun 15-dən “28 May” və “Nizami” stansiyaları arasında qatarların hərəkəti müvəqqəti məhdudlaşdırılıb. Sərnişinlərin daşınmasının təmin edilməsi məqsədilə alternativ avtobus marşrutları təşkil olunub, stansiyalarda məlumatlandırma və istiqamətləndirmə işləri gücləndirilib. Layihənin sərnişinlərin gündəlik gediş-gəlişinə təsiri, yeni hərəkət sxeminə uyğunlaşma prosesi, alternativ nəqliyyat imkanları, həmçinin tikinti işləri başa çatdıqdan sonra avtobus marşrutlarının taleyi ilə bağlı suallar yaranır.
AZƏRTAC “Bakı Metropoliteni” QSC-nin bu məsələlərlə bağlı statistik məlumatlarını təqdim edir.
Sərnişinlərin yeni sxemə uyğunlaşmasında müsbət dinamika var
Xətlərin ayrılması layihəsi ilə əlaqədar yaranmış məhdudiyyətlərin sərnişinlərin gündəlik gediş-gəlişinə müəyyən təsiri müşahidə olunub. 2025-ci və 2026-cı illərin avqust ayları üzrə müqayisəli statistik təhlillərə əsasən, sərnişin gedişlərində azalma qeydə alınıb. Bu göstərici layihənin təsiri də nəzərə alınmaqla hazırkı dövrdə müşahidə olunan maksimal azalma kimi qiymətləndirilir.
İlk günlərdə yeni hərəkət sxemi ilə bağlı müəyyən çaşqınlıq müşahidə edilsə də, hazırda sərnişinlərin yeni sxemə uyğunlaşmasında müsbət dinamika qeydə alınır. Stansiyalarda aparılan məlumatlandırma və istiqamətləndirmə işləri, əməkdaşların və könüllülərin dəstəyi bu prosesə müsbət təsir göstərir.
Metroda məlumatlandırma və istiqamətləndirmə tədbirləri gücləndirilib
Layihənin icrası ilə əlaqədar stansiyalarda sərnişinlərin yeni hərəkət sxeminə uyğunlaşması və düzgün istiqamətləndirilməsi məqsədilə məlumatlandırma və istiqamətləndirmə tədbirləri gücləndirilib. Stansiyaların bütün sərnişin zonalarında və giriş-çıxışlarında, eləcə də qatarlarda elanlar yerləşdirilir və səsləndirilir, məlumatlar videoformatda monitorlarda göstərilir, sxematik təsvirlər, ekspres avtobuslar, marşrutlar və sair barədə məlumatlar sərnişinlərin diqqətinə çatdırılır. 20 stansiya üzrə sərnişinlərə yeni hərəkət sxemi barədə məlumat verilir, zəruri istiqamətlər üzrə yönləndirmə aparılır.
Bundan əlavə, əməkdaşlar, ayrılmış əlavə işçi qüvvəsi və xüsusən də könüllülər sərnişinlərə operativ şəkildə dəstək göstərirlər. Görülən tədbirlərin nəticəsi olaraq ilk günlərdə müşahidə olunan çaşqınlığın əhəmiyyətli dərəcədə azalması və sərnişinlərin yeni hərəkət sxeminə uyğunlaşmasında müsbət dinamika müşahidə olunur.
Qırmızı və Yaşıl xətlər arasında asılılığa son qoyulacaq, stansiyalarda sıxlığı azalacaq
Qırmızı və Yaşıl xətlərin ayrılması layihəsinin əsas tikinti mərhələsinə başlanılıb və işlərin təxminən 11 ay davam etməsi nəzərdə tutulub. Layihə Prezident İlham Əliyevin Sərəncamı ilə təsdiqlənmiş “Bakı şəhərində və ətraf ərazilərdə nəqliyyat infrastrukturunun təkmilləşdirilməsinə dair 2025-2030-cu illər üçün Dövlət Proqramı”na uyğun icra olunur.
Bakı metrosunun gələcək inkişafı üçün strateji zərurət olan bu layihənin əsas məqsədi Qırmızı və Yaşıl xətlər arasında asılılığa son qoymaq, stansiyalarda sıxlığı azaltmaq, qatarlararası intervalı minimuma endirmək və hərəkətin dayanıqlılığını təmin etməkdir.
Sərnişinlərin müraciət və təklifləri operativ şəkildə nəzərdən keçirilir
Yeni nəqliyyat təşkilatı ilə bağlı sərnişinlər tərəfindən əməkdaşlara və könüllülərə gün ərzində ünvanlanan müraciət və təkliflər operativ şəkildə nəzərdən keçirilir. Daxil olan müraciətlər Bakı Metropoliteninin 964 əlaqə mərkəzi, eləcə də sosial media hesabları vasitəsilə qəbul olunur və cavablandırılır. Bununla yanaşı, aidiyyəti sahələrin rəhbər və işçi heyəti tərəfindən mütəmadi monitorinqlər aparılır. Toplanan məlumatlar emal və təhlil edilir, qəbul olunmuş qərarların nəticələri qiymətləndirilir.
Yaşıl xətt üzrə intervalın 2 dəqiqəyədək azaldılması mümkün olacaq
Hazırda əlavə ekspres marşrutlar metroda hərəkətin müvəqqəti məhdudlaşdırılması ilə əlaqədar sərnişinlərin alternativ nəqliyyat imkanları ilə təmin olunması məqsədilə fəaliyyət göstərir.
Tikinti işləri başa çatdıqdan sonra Qırmızı (“İçərişəhər–Həzi Aslanov”) və Yaşıl (“Dərnəgül–Xətai”) xətlər sərnişinlərə tam müstəqil infrastrukturla xidmət göstərəcək. Belə ki, Yaşıl xətt üzrə qatarların hərəkəti “Dərnəgül” stansiyasından başlayaraq “Cəfər Cabbarlı” vasitəsilə “Xətai” stansiyasına qədər davam edəcək və Yaşıl xətt üzrə interval 3 dəqiqə 30 saniyə olacaq. Beləliklə, “Cəfər Cabbarlı-Xətai” sahəsində mövcud olan 8 dəqiqəlik gözləmə intervalı ləğv ediləcək. Növbəti mərhələdə Y-15 stansiyasına qədər tunellər və dönmə infrastrukturu tamamlandıqdan sonra isə Yaşıl xətt üzrə intervalın 2 dəqiqəyədək azaldılması mümkün olacaq.
Metroda hərəkətin tam bərpasından sonra əlavə avtobus marşrutlarının fəaliyyətinin davam etdirilib-etdirilməməsi sərnişin tələbatı və sərnişin axınını nəzərə alınmaqla müəyyənləşdiriləcək.
Bölmənin digər xəbərləri
